Diospa Siminmanta yachachikuykuna
¿Imaynapin allinninchispaq Diospa kamachikuyninkuna?
Kaypin Bibliaykiwan tapukuyniykikunaman kutichiykunata tarinki. Munaqtiykiqa Jehová Diospa testigonkunan yanapasunkiman kay tapuykunata t’aqwinaykipaq.
1. ¿Imaraykun Diosta kasukunanchis?
Diosmi kamawarqanchis chaymi payta kasukunanchis. Jesuspas kasukurqanpunin (Juan 6:38; Apocalipsis 4:11). Diospa kamachikuyninkunata kasukuspaqa munakusqanchistan rikuchinchis. (Leey 1 Juan 5:3.)
Allinninchispaqmi llapa kamachikuyninkunaqa. Yachachiwanchis allinta kawsananchispaq hamuq tiempopi wiñay kawsayman aypananchispaqpas. (Leey Salmo 19:7, 11; Isaías 48:17, 18.)
2. ¿Imaynatan Diospa kamachikuynin yanapawanchis qhalilla kananchispaq?
Machaymanta Diospa kamachikuyninkunata kasukuyqa hark’awanchismi onqoykunamanta, ima ñak’ariymantapas. Nishuta tomayqa viciomanmi apawanchis mana allin ruwaykunamantaq urmachiwasunman (Proverbios 23:20, 29, 30). Jehová Diosqa manan hark’awanchischu pisilla tomananchistaqa. (Leey Salmo 104:15; 1 Corintios 6:10.)
Hinaspapas Diosqa manan munanchu envidianakuy, sinchi phiñanakuy huk mana allin ruwaykunapas sonqonchispi kananta. Chay kamachikuyninkunaman hina kawsasun chayqa qhalillan kasun. (Leey Proverbios 14:30; 22:24, 25.)
3. ¿Imaynatan Diospa kamachikuynin yanapawanchis warmi-qhari puñuypi?
Jehová Diosqa mana allinpaqmi qhawarin mana casarakuspa puñuyta (Hebreos 13:4). Diospa kamachikuyninta kasukuq casarasqakunaqa allintan kawsanku wawakunatapas sumaqta uywanku. Mana casarakuspa puñuqkunataq onqoyta tarinku, t’aqanakunku, maqanakunku, llakiq ñit’isqan kawsanku, wawakunapas mana taytayoq otaq mana mamayoq wiñanku. (Leey Proverbios 5:1-9.)
Diospa kamachikuyninta kasukusun chayqa allinpin paywan kasun, hukkunatapas manan k’irisunchu. (Leey 1 Tesalonicenses 4:3-6.)
4. ¿Imaynapin allinninchispaq kawsayta respetay?
Diospa qosqan regalota ancha chaninpaq qhawariq runakunaqa cigarro pitayta huk mana allin ruwaykunatapas saqepunkun (2 Corintios 7:1). Wiksapi kaq wawakunatapas Jehová Diosqa ancha allinpaqmi qhawarin (Éxodo 21:22, 23). Chaymi chay wawakunata mana wañuchinachu. Chaymantapas kawsayta ancha allinpaq qhawariqkunaqa wasinkuta, llank’anankuta otaq carronkutapas qhawarinku imayna tarikusqanta (Deuteronomio 22:8). Nitaq mana allin pukllaykunapichu pukllanku, aswanpas Diospa qosqan kawsayta ancha allinpaq qhawarinku. (Leey Salmo 36:9.)
5. ¿Imaynapin allinninchispaq yawarta respetay?
Diosqa ancha chaniyoqpaqmi yawartaqa qhawarin, yawarpi kawsay kasqanrayku (Génesis 9:3, 4). Diospa Kamachikuy Simi qosqanpipas yawartan qhawarichin kawsayta hina, chayqa allinninchispaqmi. ¿Imarayku? Huchanchiskuna yawarwan pampachasqa kasqanrayku. (Leey Levítico 17:11-13; Hebreos 9:22.)
Jesús ch’uya kasqanraykun yawarninqa ancha chaniyoq. Runakunarayku wañusqan qhepatan Diosman kawsayninta haywarqan, chay kawsaynintaq karqan chaniyoq yawarnin (Hebreos 9:12). Chay yawar hich’arisqanraykun wiñay kawsayta aypasunman. (Leey Mateo 26:28; Juan 3:16.)
Astawan yachayta munanki chayqa ¿Imatapunin Biblia yachachin? nisqa librota qhaway 12, 13 capitulokunata, chaytaqa Jehová Diospa testigonkunan ruwan.