¿Ima nirqanmi Jesús politicamanta?
EVANGELIO qelqakunapin Jesuspa predicasqanmanta willashan, chaypin yachanchis politicamanta ima yuyaykusqanta. Huk kutinmi 30 watanpi kashaqtin bautizakusqan qhepata, Saqra tukuy llaqtakunata kamachinanpaq munachirqan. Chaymantapas askha runakunan reyta churanankupaq hap’iyta munarqanku. Tiempoq pasasqanmantaq politicapi chaqrukunanta munarqanku. ¿Imatan Jesús ruwarqan chaykunata munachiqtinku?
Kay pacha kamachikuqta. Bibliaq willasqan hina Saqraqa “kay pacha lliw suyukunata” kamachinanpaqmi qhawarichirqan. Sichus chay munachisqanta chaskikunman karqan chayqa, imakunataraqchá runakunarayku ruwanman karqan. Ichaqa sut’itan yacharqan politicaqa mana runakunaq sasachakuyninta tukuchinanta, chaymi Saqraq munachisqanta mana chaskikurqanchu (Mateo 4:8-11).
Reyta. Jesuspa tiemponkunapiqa lliwmi munarqanku pillapas sasachakuyninkuta tukuchinanta. Jesuspa imaymana ruwasqanta rikuspan, politicapi chaqrukunanta munarqanku. Ichaqa, ¿imatan ruwarqan? Qatikuqnin Juanmi qelqarqan: “Reyta churanankupaq hap’irqonankuta yachakuspa, wakmanta sapallan orqota kutirqan”, nispa (Juan 6:10-15). Yapamantan Jesusqa mana munarqanchu politicapi chaqrukuyta.
Politicapi afanakuqta. Wañupunanpaq pisillaña kashaqtinpas chhaynallataqmi tarikurqan. Fariseo t’aqa runakunan herodespa partidonmantawan Jesusta tapukuq rirqanku. Fariseokunaqa Roma suyuq kamachikuyninmantan t’aqakuyta munarqanku herodespa partidontaq mana ima niqkupaschu Roma suyuq kamachikuyninmanta. Paykunan yachayta munarqanku Jesús ima partidoman sayapakusqanta chaymi tapurqanku, judío runakuna paganankuchu icha manachu Roma suyuman impuestota nispa.
Marcosmi qelqarqan Cristoq kutichisqanta: “‘¿Imaraykun wateqawankichis? Huk qolqeta qhawanaypaq apamuychis’, nispa. Paykuna qolqeta haywaqtinkutaq nirqan: ‘¿Piqpa uyantaq kaypi kashan, piqpa sutintaq kaypi qelqasqa kashan?’ nispa. Paykunataq nirqanku: ‘Rey Cesarpan’, nispanku. Hinan Jesusqa paykunata nirqan: ‘Rey Cesarpa kaqtaqa rey Cesarman qopuychis, Diospa kaqtataq Diosman qopuychis’”, nispa (Marcos 12:13-17). Chay nisqanmantan huk libro willan: “Payqa [Jesusqa] Mesiaspunin karqan ichaqa manan paykunaq [judiokunaq] yuyaykusqankuman hinachu karqan ‘politicapi mesiaschu’. [...] Jesuspa yachachikuyninkunaqa religionwan politicawan mana chaqrukunanpaq hinan karqan”, nispa (Teología Moral).
Cristoqa khuyapayaqmi waqchakunata, ñak’ariqkunata pisichasqakunatapas. Biblian willan chaykunata rikuspa llakikusqanta (Marcos 6:33, 34). Chaywanpas manan politicapi chaqrukurqanchu, nirqankuña chaypas.
Kaypi rikusqanchis hina Jesusqa manapunin politicapi chaqrukuyta munarqanchu. Kay tiempopi cristianokunari, ¿imaynatan politicapi chaqrukuyta qhawarinanku?