¿Diospa sonqon nananchu ñak’ariqtinchis?

¿IMARAYKUN DIOS HINALLATA QHAWAN CHAYKUNA SUCEDENANTA?

Isabel: ¿Imaynalla? Kay tratadotan wasimasiykikunaman saqemushani, ninmi: “¿Hayk’aqllapas kaykunata tapukurankichu?”, nispa. ¿Munawaqchu saqenayta?

Sofía: ¿Religionmantachu rimashan?

Isabel: Arí. Kaypin soqta tapukuykuna kashan. ¿Mayqenmantan...?

Sofía: Amaña rimapayawayñachu. Manan tiempoyki usuchiyta munanichu.

Isabel: ¿Imaraykun chayta ninki?

Sofía: Manan yachanichu Dios kanchus icha manachus chayta.

Isabel: Gracias sut’illanta willawasqaykimanta. Ichaqa, ¿chhaynatapunichu yuyaykurqanki?

Sofía: Manan, huch’uyllaraq kaspayqa iglesiamanmi riq kani, ichaqa unayñan mana ripunichu.

Isabel: ¿Unayñachu mana ripunki? Ay, qonqashasqani, sutiyqa Isabelmi.

Sofía: Ñoqaqtaq Sofía.

Isabel: Chhaynaqa reqsinakusun.

Sofía: Arí, reqsinakusunyá.

Isabel: Ñoqaqa manan yuyaykusqaykita cambianaypaqchu hamuni, ichaqa kayta tapuykusqayki: ¿Imaraykun Dios kasqanmanta iskayapurqanki?

Sofía: 17 wata ñawpaqtan mamay carropi accidentakurqan, chayraykun iskayapurqani.

Isabel: Maytan llakikuni chaywan. ¿Imaynan kunan mamayki kashan?

Sofía: Manan puriyta atipunchu.

Isabel: Chayqa, ¿sinchitachá llakichisunki?

Sofía: Arí. Manan chaytaqa qonqayta atinichu: Sichus Dios kan chayri, ¿imaraykun hinallata qhawan ñak’arinanchista?

¿NISUNMANCHU DIOSMANTA CHHAYNATA?

Isabel: Chhaynapi tarikuspaqa pipas chhaynata tapukunmanmi, allinmi tapukusqaykipas. Imamantapas ñak’arispaqa yachaytan munanchis imarayku chhaynapi tarikusqanchista. Ñawpa tiempopi tukuy sonqonkuwan Diosta serviq qharikunapas warmikunapas chay hinapin tarikurqanku.

Sofía: ¿Cheqaqta?

Isabel: Arí. ¿Yachayta munawaqchu pi chhaynapi tarikusqanmanta?

Sofía: Arí, munanin.

Isabel: Qhawariy Habacuc imatachus Diosta tapusqanta. Leesun Habacuc 1:2, 3 textokunata, ninmi: “Señor Diosnilláy, ¿hayk’aqkamataq waqyakamusqayki, manataq uyariwankichu? ¿Hayk’aqkamataq: ¡Sarunchashawankun! nispa qaparimusqayki, manataq qespichiwankichu? ¿Imanaqtintaq mana chaninkaqta rikuchiwanki?”, nispa. ¿Chhaynatachu qanpas tapukunki?

Sofía: Arí.

Isabel: Diosqa manan Habacuctaqa castigarqanchu chhayna tapusqanmanta, manataqmi pisi iñiyniyoqta hinachu qhawarirqanpas.

Sofía: Wau.

JEHOVÁ DIOSQA CHEQNIKUNMI ÑAK’ARIYKUNATA

Isabel: Diosqa rikumushanmi ñak’ariyninchiskunata, siententaqmi kanpas chaykunata rikumuspa, chaytan Biblia willawanchis.

Sofía: ¿Sientenmanchu Dios ñak’ariyninchiskunata rikuspa?

Isabel: Arí, chayta rikuchisqayki Éxodo 3:7 textopi. ¿Leerqowaqchu?

Sofía: Riki. Ninmi: “Señor Diosqa nillarqantaq: Allintan rikuni llaqtaypa Egipto suyupi muchushasqanta, uyarinin muchuchiqkuna hawa waqyakamusqankuta, yachanitaqmi ñak’arishasqankutapas”, nispa.

Isabel: Gracias. Leesqaykiman hina, ¿rikushanchu Dios runakunaq ñak’ariyninta?

Sofía: Yaqachus hina.

Isabel: Ichaqa manan rikushallanchu. Reparay kay tukupuyninpi nisqanta. Diosqa nirqanmi: “Yachanitaqmi ñak’arishasqankutapas”, nispa. ¿Chhaynata ninmanchu mana sienteq Dios?

Sofía: Manan.

Isabel: Ichaqa manan kaqllachu piqpa ñak’arisqantapas rikuywan, piqpa ñak’arisqantapas rikuspa sienteywanqa.

Sofía: Cheqaqmi chayqa.

Isabel: Ama chayta qonqaychu. Kashallantaqmi huk willakuypas. Chaymi tarikun Jueces 10:16 textopi, tukupuyninpin nin: “Hinan Señor Diosqa Israel runakunaq muchusqanta rikuspa pasaqtapuni llakikurqan”, nispa. ¿Imaynan Dios sientekurqan llaqtan ñak’arisqanta rikuspa? ¿Llakikurqanmi riki?

Sofía: Arí, chay hinatan nishan.

Isabel: Diosqa yanapaytapunin munawanchis, manapunitaqmi munanchu ñak’arinanchista. Ima llakipipas tarikuqtinchisqa, paypa sonqonpas nanallantaqmi.

¿IMARAYKUN HINALLATA QHAWAN ÑAK’ARIYNINCHISTA?

Isabel: Manaraq ripushaspay, ¿willariykimanchu huk yachachikuymantawan?

Sofía: Allinmi kanman.

Isabel: Bibliapin khaynata nin Diospa atiyninmanta. Leeypuway Jeremías 10:12 textota.

Sofía: Ninmi: “Atiyninwanmi Señor Diosqa kay pachata ruwarqan, yachayninwanmi teqsimuyuntinta takyachirqan, yuyayninwanmi hanaq pachatapas mast’arirqan”, nispa.

Isabel: Gracias. Pisillapi t’aqwirisun chay textoq nisqanta. ¿Imayna atiyniyoqmi Dios kanan karqan kay pachatapas tukuy rikusqanchistapas kamananpaq?

Sofía: Sinchi atiytan chaypaqqa necesitarqan.

Isabel: Diosqa atiyniyoq kaspanmi kay pachata kamarqan, ¿chaychu mana atinman ñak’ariykuna tukuchiyta?

Sofía: Atiyniyoqtaq chayqa tukuchinmanmi.

Isabel: Mamaykipi yuyaykuy. ¿Imaraykun sonqoyki nanan ñak’arisqanta rikuspa?

Sofía: Mamay kasqanraykun, hinaspapas paytaqa munakunin.

Isabel: Sichus atiyniyki kanman ñak’ariyninta tukuchinaykipaq chayri, ¿chinkachiwaqchu?

Sofía: Riki, chaytapunin ruwayman.

Isabel: Arí, chaytapunin ruwasunman. Bibliapin yacharqanchis Diosqa ñak’ariyninchiskunata rikushasqanta, chayta rikuspa sientesqantapas, atiyninpas kanmi tukuchinanpaq. ¡Maytan payqa munashan ñak’ariyninchiskuna tukuchiyta!

Sofía: Manan chaykunapiqa yuyaykusqanichu.

Isabel: Ichaqa, ¿imaraykun ñak’ariykunata manaraq Dios tukuchinraqchu?a

Sofía: Imaraykuchá.

Isabel: Telefonoykichus hina waqamushan. ¿Kutimuymanchu chaymanta astawan rimanapaq?

Sofía: Allinmi kanman, gracias.b