Askha bendicionkunatan chaskirqayku

ESTADOS UNIDOS huknin llaqtapin huk hatun huñunakuy aparikurqan 1919 watapi, chaypin tayta-mamayqa reqsinakurqanku, chay watapitaqmi casarakurqanku. Ñoqaqa 1922 watapin nacerqani wawqey Paultaq 2 wata qhepaman. Esposayqa 1930 watapin nacerqan tayta-mamanpas Testigon karqanku. Abuelonkunapas Charles T. Russell. iñiqmasinchispa amigonmi karqanku.

1947 watapin esposaywanqa reqsinakurqayku, 1949 watapitaq 16 julio killapi casarakapurqayku. Ichaqa manaraq casarakuspaykun rimarqayku tukuy tiempo Diosta servinaykupaq, chaymi mana wawayoq kanaykupaq decidikurqayku. 1950 watapin 1 octubre killapin precursor kapurqayku, 1952 watapitaq iñiq t’aqata watukuq umalli kanaypaq invitawarqanku.

DIOSPA LLAQTANPI SUMAQ LLANK’AYKUNATA CHASKIRQAYKU

Ñoqapas esposaypas manan allin preparasqachu sientekurqayku llank’ayniykuta hunt’anaykupaq. Chaymi allin experienciayoq iñiqmasikunaq yanapayninta maskharqayku. Chaypaqmi Marvin Holien amigoypa yanapayninta mañakurqani, payqa unayñan watukuq umalli karqan. Nirqanin: “Esposayqa sipasllaraqmi mana experienciayoqtaqmi kanpas, ¿manachu pillapas esposayta yanapanman?”, nispa. Hinan payqa niwarqan: “Kashanmi Edna Winkle iñiqmasinchis, payqa unay tiempoñan precursora kashan, paymi esposaykitaqa allinta yanapanqa”, nispa. Chhaynataqmi karqan, chaymi Grace niwarqan: “Ednawan predicaspaqa thakmi sientekuq kani, payqa yacharqanmi sasa tapuykunaman kutichiyta, yachachiwarqantaqmi ima tapuymanpas kutichinaypaqqa ñawpaqta uyarinay kasqanta. ¡Payqa allintan yanapawarqan!”, nispa.

Estados Unidos nacionpi iskay llaqtakunapi kaq iñiq t’aqakunatan watakuq rirqayku. Chay qhepamantaq Nueva York llaqtapi wakin iñiq t’aqakunata watukunaykupaq cambiawarqanku, chaypin kasharqan Brooklyn Heights iñiq t’aqa, chay iñiq t’aqaqa huñunakurqan Betelpa Huñunakunan Wasipi, chaypin huñukurqanku unayña Betelpi serviq askha iñiqmasikuna. Discurso qosqay qhepamanmi Nathan Knorr iñiqmasi niwarqan: “Allintan reparachiwarqankiku imakunapiraq allinyanayku kasqanta, chay hinata ruwaspaqa allintan Diospa llaqtanpi yanapakushanki, ¡kusatan ruwashanki!”, nispa. Huñunakuy tukusqan qhepamanmi esposayman chayta willarqani. Chay llank’ayniykutan sinchi sasapaq qhawarirqayku chaymi preocupakusqaykurayku Betelpi alojakusqayku cuartopi waqarqayku.

Chay qhepamanqa huk cartatan chaskirqayku Galaad Escuelaman rinaykupaq, chay escuelaqa 1955 watapi febrero killapi tukunan karqan. Manaraq rishaqtiykun niwarqanku: “Chay escuelaqa manan misionero kanaykichispaqpunichu preparasunkichis aswanpas Diosta allinta servinaykichispaqmi”, nispa. Chayman riyqa ancha sumaqmi karqan ichaqa huch’uyaykukuq kaytan yachachiwarqanku.

Chay Escuela tukusqan qhepamanqa watukuq umallikunaq llank’asqanta qhawariq kanaypaqmi invitawarqanku. Indiana, Michigan, Ohio hatun llaqtakunapin llank’anayku karqan. 1955 watapin diciembre killapi ichaqa huk cartata chaskirqayku, chaypin Knorr iñiqmasiyku khaynata qelqamuwarqanku: “Sut’illanta willawaychis, ¿munawaqchischu Betelpi llank’ayta [...] otaq huk tiempollapas qhepakuyta, icha huk nacionman riytachu munankichis, otaq kaq llank’asqaykichispi qhepakuytachu?”, nispa. Ñoqaykuqa nirqaykun: “Mayqenpipas yanapakuykumanmi”, nispa. Chayllamanmi Betelman rinaykupaq niwarqanku.

KUSISQAN BETELPI SERVIRQAYKU

Betelpi servisqay tiempopiqa askha discursokunatan qorqani iñiq t’aqakunapi, hatun huñunakuykunapipas. Hinaspapas waynakunatan yanaparqani qhepaman hatun llank’aykunata allinta hunt’anankupaq. Chay qhepamanqa Knorr iñiqmasinchispa secretarionmi karqani, oficinanpin hallp’antinpi predicación aparikusqanta qhawarikuq.

Estados Unidos nacionpi Predicacionta Qhawariq T’aqapi llank’asqayqa sumaqmi karqan. Chaypin llank’arqani Thomas “Bud” Sullivan iñiqmasiwan, payqa unayñan umalli karqan. Fred Rusk iñiqmasipas allintan yanapawarqan. Huk kutinmi payta tapurqani: “Fred, ¿imanaqtinmi nishuta allichanki qelqasqay cartakunata?”, nispa. Payqa asirikuspan niwarqan: “Piwanpas rimaspa allinta entiendewananchispaqqa mayninpi kuti-kutirispa rimanchis. Cartata qelqaspan ichaqa sut’ita entiendenankupaq hina qelqananchis”, nispa. Hinan sumaqta niwallarqantaq: “Ama pisipaychu allintan ruwashanki tiempowanqa aswan allintaraqmi ruwanki”, nispa.

Betelpi servisqayku tiempopiqa esposayqa cuartokunata limpiaspa llank’arqan, chay ruwayqa anchatan gustaq. Kunankamapas chay tiempopi yanapasqan wakin waynakunan asirikuspa ninku: “Anchatan mamayqa kusikurqan puñuna mast’ayta yachachiwasqaykimanta”, nispa. Chaymantapas llank’arqanmi cartakuna chaskiypi apachiypi, revistakunata rakiypi, videokuna grabaypipas. Chaykunapi llank’aspan repararqan Jehová Diospa llaqtanpi imapipas maypipas llank’ayqa ancha allinpuni kasqanta. Kunankamapas chay hinatan yuyaykun.

BETELMANTA LLOQSIPURQAYKU

1970 watakunapi hinan tayta-mamayku yuyaqña kapusharqanku chaymi cuidanata necesitarqanku. Manan Betelmantaqa ripuyta munarqaykuchu. Ichaqa ñoqaykun tayta-mamaykuta cuidanayku karqan, hinan Betelmanta llosipurqayku kutimuy yuyaywan.

Chay qhepamanmi wasin-wasinta segurokunata vendespa llank’arqani. Chay llank’anayta qhawariq runan niwarqan: “Kay negocio allin kananpaqqa ch’isinkunatan astawanqa llank’ana, chay horastan runakunaqa wasinkupi tarikunku, chay ratopin aswan importante wasinkuman riy”, nispa. Hinan ñoqaqa nirqani: “Allinmi chay niwasqayki. Ichaqa religioniypin ruwanaykuna kan manataqmi hayk’aqpas chaykunataqa saqerqanichu nitaq kunanpas saqeyta munanichu. Wakin ch’isinkunaña llank’asaq chaypas martesninta juevesninta ichaqa mana atisaqchu huñunakuyniykunaman rinayrayku”, nispa. Jehová Diosqa anchatan bendeciwarqan paypa munayninta ñawpaqman churasqaymanta.

Mamayqa 1987 watapin julio killapin wañukapurqan kurak runakunata cuidananku wasipi, ñoqaykuqa chaypin kasharqayku. Huk enfermeran esposayta nirqan: “Señora Allen phaway wasiykita, samakamuy. Llapaykupas yachaykun suegrayki yanapasqaykita”, nispa.

Chay watapin diciembre killapi Betelman kutinaykupaq solicitudta hunt’arqayku. Chay qhepallamanmi esposayta cáncer de colon nisqa onqoyta tarirqanku. Operachikusqan qhepamanqa qhaliyapurqanmi chay onqoymanta. Chay tiempopin sucursalmantan huk cartata chaskirqayku, chaypin niwarqanku iñiq t’aqallaykupi qhepakunaykupaq. Chaymi predicacionpi allinta yanapakunaykupaq decidikurqayku.

Tiempowanmi Texas llaqtapi huk llank’anata munachiwarqanku hinan decidekurqayku chay llaqtaman ripunaykupaq. Hinaspapas chay llaqtaqa q’oñin karqan chaymi allinpaq qhawarirqayku saludniykupi yanapawanankupaq. Chay llaqtapiqa 25 watañan kashayku, chaypi iñiqmasikunaqa anchatan munakuwanku askha amigokunayoqtaqmi kaykupas.

KAWSAYNIYKUPI YACHASQAYKU

Esposayqa cáncer de colon, tiroides nisqa onqoyniyoqmi karqan kunantaq cáncer de seno nisqa onqoywan kashan, chaywanpas kusisqan kawsan. Payqa allin esposan karqan tukuy sonqowantaqmi yanapawarqan. Paytan tapurqanku: “¿Imaynatan kusisqa kawsankichis?”, nispa. Hinan payqa nirqan: “Qosayqa amigoymi, sapa kutillanmi parlayku, iskayniykun imatapas ruwayku manataqmi hayk’aqpas phiñachinakuspaqa puñuykuchu”, nispa. Mayninpiqa kanpunin imallamantapas phiñachinakuyqa chaywanpas kallpachakuykun pampachanakunaykupaq. Chay ruwasqaykuqa yanapawarqankupunin.

Kaykunatan kawsayniykupi yacharqayku sasachakuykunapi tarikuspa:

1.  Jehová Diospin confiananchis ima permitesqantapas aceptananchismi (Prov. 3:5, 6; Jer. 17:7).

2.  Ima ruwananchispaqpas Bibliaq kamachikusqanman hinan ruwananchis. Iskayllatan akllakusunman: Kasukuyta otaq mana kasukuyta (Rom. 6:16; Heb. 4:12).

3.  Diospa allin qhawarisqan kaymi imamantapas aswan allinqa. Diospa Gobiernonmanta willaytan ñawpaqman churananchis qhapaq kaqkunata maskhanamantaqa (Prov. 28:20; Ecl. 7:1; Mat. 6:33, 34).

4.  Tukuy tiemponchiswan Jehová Diosta servinanchispaqmi mañakunanchis. Imachus ruway atisqanchispin kallpachakunanchis manataqmi mana atisqanchispichu (Mat. 22:37; 2 Tim. 4:2).

5.  Llaqtallantan Jehová Diosqa allinpaq qhawarin bendecinpas (Juan 6:68).

Jehová Diostaqa 75 más watakunan sapankayku servirqayku, casarasqa hinataq 65 wataña. ¡Chay tiempopi Diosta servisqaykuqa ancha munaymi karqan! Jehová Diosmantan mañakuyku hallp’antinpi iñiqmasikunapas Diospi confiaspa askha bendicionkunata chaskinankupaq.