¿Imaynatan divorciasqakunata yanapasunman?

Yaqachá pillatapas divorciasqata reqsishanki. Kay tiempopiqa manan admirakunapaqchu chayqa. Polonia nacionpi divorciomanta estudiasqankupin yacharqanku, astawanqa 30 watankupi kashaqkuna, kinsa otaq soqta wata casarakusqallankuman divorciakusqankuta. Ichaqa manan chay edadpi kaqkunallachu divorciakunku.

España nacionpi familiakunamanta rimaq institucionmi willan, Europa ladopi “iskay casarasqakunamanta huk divorciakapusqanta”. Hatun llaqtakunapipas chay hinallataqmi.

LLAKIQ QATIRISQANMI KANKU

¿Imaraykun divorciakunku? ¿Imaynan divorcio qhepaman sientekunku? Casarasqakunata yanapaq doctoran nin: “Divorcioqa rikuchin casarasqakuna manaña kuskachu kayta munasqankutan”, nispa. Nillantaqmi: “Chay qhepamanqa llakiq qatirisqanmi kanku, sinchi phiñasqa, pesapakuspa ima. Hinaspapas engañasqa p’enqasqa iman sientekunku, mana ima ruwayta atispa”, nispa. Chaymi mayninpiqa wañuchikuytaraq munanku. Nillarqantaqmi: “Divorciopaq papelkuna lloqsimusqan qhepamantaq ch’usaq sonqo, mana piniyoq sientekunku. Yaqapaschá divorciakuq runaqa tapukunman: ‘¿Imatataq kunanri ruwasaq? ¿Imapaqñataq kawsaniri?’”, nispa.

Ewana willakun divorciakusqan qhepaman imayna tarikusqanta. Paymi nin: “Divorciakusqay qhepamanmi wasimasiykunapas, llank’aqmasiykunapas ‘divorciada’ nispa sutichawarqanku, chaymi sinchita p’enqakurqani. Iskay wawayoqtaq karqani chayqa, ñoqallan taytapas mamapas kanay karqan. Sinchi phiñasqan kasharqani”, nispa. Iñiq t’aqapi 12 wataña umalli kashaqtinmi, Adam iñiqmasipas chhayna llakipi tarikurqan. Paymi nin: “Sinchi pisichasqan sientekuni, chaymi llapa runamanta karunchakuyta munani phiñasqataq tarikunipas”, nispa.

SASACHAKUYNINKUTA ATIPANANKUPAQ KALLPACHAKUNKU

Hamuq tiempopi imayna kanankumanta llakikuspan, divorciasqakunaqa sasachakuyninkuta atipanankupaq kallpachakunku. Yaqapaschá yuyaykunku “manan pimanpas imapas qokunchu” nispa. Divorciakuymanta rimaspan huk periodista nirqan: “Chay qhepamanqa manan imatapas ñawpaqpi hinachu ruwananku, sasachakuyninkutapas sapallankuñan allichananku”, nispa.

Stanisław iñiqmi nillantaq: “Iskay ususichaykunatan mamanku mana visitanayta munaqchu. Chaymi yuyaykurqani: ‘Manan imapaqpas valeniñachu, Jehová Diospas wikch’upuwanmi’, nispa. Chaymi wañuyllataña munarqani. Tiempowanñan repararqani mana chhaynachu kasqanta”, nispa. Wanda iñiqmasitapas hamuq tiempopi imayna kananmi llakichiq. Chaymi nin: “Ñoqaqa yuyaykurqani llapallanku qonqapuwanankutan, iñiqmasiykunapas manaña ñoqatapas wawaykunatapas yuyarikunankuta. Kunanraqmi reparani iñiqmasiykunaqa mayta cuidawasqankuta, wawaykuna Diosta servinankupaq yanapawasqankutapas”, nispa.

Rikusqanchis hina, chhayna llakipi tarikuqkunaqa imaymanakunatan yuyaykunku. Yaqapaschá mana valeqpaq hina sientekuspa, mana yanapanapaq hina kasqankuta yuyaykunku. Hinaspapas yaqapaschá hukkunaq mana allin ruwasqankuta qhawayta qallarinqaku, chayraykun ninkuman: “Iñiqmasikunaqa mana munakuyniyoqmi kanku, manataqmi entiendewankuchu”, nispa. Ichaqa tiempowanñan reparanku iñiqmasikuna imaymanapi yanapasqankuta; paykunarayku sacrificiokuna ruwasqankuta manaña “gracias” nirqankuchu chaypas. Stanisławpas Wandapas qhepamanñan iñiqmasikunata agradecekurqanku.

SAPALLANKUN SIENTEKUNKU

Maytaña kallpachakusunman yanapananchispaq chaypas, divorciasqa iñiqmasinchiskunaqa maynillanpipas sapallankun sientekunqaku. Astawanqa cristianakunan chay hinata sientekunku. Alicja nin: “Pusaq watañan divorciakusqaymanta, chaywanpas pisipaqmi mayninqa qhawarikuni. Chhayna tarikuspayqa, lliwmantan karunchakuni sinchitataq waqanipas”, nispa.

Chhaynapi tarikuqkuna sinchi llakisqaña, phiñasqaña otaq imaynaña tarikunku chaypas, manan iñiqmasikunamanta karunchakunankuchu. Biblian nin: “[Karunchakuqqa] llapa allin yuyaychaykunatapas manan munanchu”, nispa (Prov. 18:1). Ichaqa, manan sapa kutillanqa warmi kashaspaqa qhari iñiqmasiman asuykunanchu yanapayta maskhapa, nitaq qhari iñiqmasipas chaytaqa ruwananchu. Chayta ruwankuman chayqa, yaqapaschá qhelli huchapi urmankuman.

Imaymana llakikuykunapin divorciasqa iñiqmasinchiskunaqa tarikunku. Mayninqa mana piqpa munasqan hinan sapallanku sientekunku. Chayraykun tukuy atisqanchista yanapananchis imaynan Jehová Diospas ruwan hinata (Sal. 55:22; 1 Ped. 5:6, 7). Tiempowanqa, anchatan agradecekunqaku cheqaq amigokunayoq kasqankumanta (Prov. 17:17; 18:24).