¿Munawaqchu Diospa llaqtanpi astawan yanapakuyta?

FERNANDOQA manchasqa jinan kashan.a Iskay umalliqkunan paywan rimayta munashanku. Juj kutikunapi watukuq umalliq jamuqtinmi, umalliqkunaqa Fernandota nirqanku imatas ruwanman Diospa llaqtanpi astawan yanapakunanpaq chayta. Tiempoq pasasqanman jinan Fernandoqa tapukun: “¿Jayk’aqllapas umalliq kaymanchu?”, nispa. Kay kutipin watukuq umalliqqa iñiq t’aqata jujmanta watukamushallantaq. ¿Ima ninqakun kunan umalliqkuna Fernandota?

Juj umalliqmi nin 1 Timoteo 3:1 textoq nisqanta, jinaspa nin: “Umalliqmi kapunki”, nispa. Fernandoqa makillan uyarisharqan imachus rimasqanta, jinan tapun admirasqa: “¿Allintachu uyarishani? ¿Cheqaypaq?”, nispa. Chay umalliqtaq jujmanta nin Fernando umalliq kapusqanta, jinan Fernandoqa anchata kusirikun. Chaymanta umalliq kapusqanta iñiq t’aqaman willakuqtinmi llapanku kusikunku.

¿Allinchu kanman Diospa llaqtanpi ima ruwanatapas chaskiyta munay? Arí, allinmi. Apóstol Pablon qelqarqan: “Pipas iñiqkuna qhawariq kayta munashan chayqa, ancha allin ruwaytan munashan”, nispa (1 Tim. 3:1). Chayta yachaspan askha iñiqmasikuna astawanraq wiñarinku iñiyninkupi. Chayraykun Diospa llaqtanpiqa waranqanpi allin yachachisqa umalliqkuna, yanapakuq qharikunapas kashan. Ichaqa, iñiq t’aqakunaqa wiñashallantaq chayqa, juj hermanokunapas kallpachakunankun “iñiqkunata qhawariq kanankupaq”. ¿Imaynatan chayta ruwankuman? Chaymantapas, ¿usqhayllachu umalliq kayta munananku, chayllapiñachu piensananku Fernando jina?

¿ASTAWAN YANAPAKUYTACHU MUNASHANKI?

Pablon nirqan: “Pipas iñiqkuna qhawariq kayta munashan chayqa, ancha allin ruwaytan munashan”, nispa. ¿Imatan chaywan nisharqan? Kaypi yuyaykusun, juj runaqa sach’api warkurayashaq sumaq frutata aypananpaqqa chutarikunraqmi ¿riki? Chhaynatan umalliq kayta munaqkunapas kallpachakunanku iñiqmasikunata sonqomanta yanapanankupaq, manan allin qhawarisqa kayta munaspachu chaytaqa ruwananku.

Iñiqkunata qhawariq kanapaq imayna cristianochus kanamantan willashan 1 Timoteo 3:2-7; Tito 1:5-9. Chaymanta rimaspan allin experienciayoq Raymond sutiyoq umalliq nirqan: “Noqapaqqa, imayna kasqanchismi aswan allinqa. Allin rimaq kaypas yachachiypas allinmi, ichaqa mana juchachana kaypas, allinta controlakuq kaypas, allin yuyaywan ruwaq kaypas, respetanapaq jina kaypas, sumaqta chaskiq kaypas, llamp’u sonqo kaypas ancha allinmi”, nispa.

Allin yuyaywan ruwaq iñiqmasiqa, imaymana qhelli ruwaykunamanta llullakuymanta ima cuidakuspan rikuchin mana juchachana kasqanta. Allintan controlakun, llamp’u sonqon, respetanapaq jinataqmi kausan; chayraykun iñiqmasikunaqa confianku sasachakuyninkupi yanapananpipas iñiq t’aqata allinta pusarinanpipas. Jujkunata sumaqta chaskiq kasqanraykun wayna-sipaskunata mosoqkunatapas kallpachan. Jujkunata yanapayta munaspan onqosqakunata sonqochan kuraqkunatapas yanapan. Chhayna runa kananpaqmi kallpachakun jujkunata yanapananpaq, manataq iñiqkunata qhawariq kananpaq ajllanankupaqchu.b

Iñiq t’aqapi umalliqkunaqa consejananku kallpachananku iman Diospa llaqtanpi astawan yanapakuyta munaqkunata. Ichaqa, astawan yanapakuyta munaq iñiqmasin kallpachakunan Bibliapi kamachikuykunata junt’ananpaq. Unay watakunaña umalliq Henryn nin: “Ajllasqa kayta munanki chayqa, tukuy atisqaykita kallpachakuy Bibliaq nisqanta junt’anaykipaq”, nispa. Eclesiastés 9:10 textoq nisqanmanta rimaspan nillantaq: “Imaña ruwanayki kaqtinpas tukuy kallpaykiwan chayta ruway. Umalliqkuna imatapas kamachisunkiku chayqa, allinta chayta ruwanaykipaq kallpachakuy. Iñiq t’aqapi imatapas ruwachisunkiku chayqa kusisqa chayta ruway, pampataña pichanayki kaqtinpas. Imachus ruwasqaykiqa, kallpachakusqaykiqa manan yanqapaqchu kanqa”, nispa. Chhaynaqa, jayk’aqllapas umalliq kayta munanki chayqa, allin llank’aq kay, Diosta servispa ima ruwasqaykipipas confianapaq jina kay. Juch’uyaykukuq kaymi kausayniykipiqa sut’i reparakunan, manan munapayaq kaychu nitaq jatunchakuq kaypaschu (Mat. 23:8-12).

WIJCH’UPUY MANA ALLIN PIENSAYKUNATA MANA ALLIN RUWAYKUNATAPAS

Wakin iñiqmasikunaqa iñiq t’aqapi ima ruwanatapas chaskiyta munaspapaschá umalliqkunata imatapas ninkuman otaq imatapas ruwankuman. Wakinqa umalliqkuna consejaqtinmi phiñakunku. Chhayna iñiqmasikunataqa kay tapuymi yanapanman: “¿Noqaq allinnillaytachu maskhashani, icha juch’uyaykukuspachu Jehová Diospa ovejankunata cuidayta munashani?”, nispa.

Manan qonqananchischu, umalliqkunaqa jujkunapaq “allin ejemplo” kanankuta (1 Ped. 5:1-3). ¿Imaynapin chhayna kankuman? Mana allin piensaykunatapas, mana allin ruwaykunatapas wijch’uspa, pacienciakuq kayta aguantaq kayta wiñachispa, manaña umalliqchu kankuman chaypas. Umalliq kaspapas pantaq runallapunin kashanqaku (Núm. 12:3; Sal. 106:32, 33). Chaymantapas, juj hermanotaqa manapaschá “conciencianqa imamantapas juchachanmanchu”, ichaqa manapaschá wakinqa chhaynatachu qhawarinkuman, chay hermanoqa pantashanmanpaschá imallapipas (1 Cor. 4:4). Chhaynaqa, sichus umalliqkuna consejasunkiku Bibliaman jina chayqa, uyarikuy ama phiñakuspalla. Chaymantataq imachus nisqankuman jina ruway.

¿SICHUS UNAYÑA SUYAKUSHANKI CHAYRI?

Wakin hermanonchiskunaqa unayña suyakushanankupaqmi piensanku. Sichus qanpas unay watakunaña kallpachakushanki “iñiqkunata qhawariq” kanaykipaq chayqa, ¿iman yanapasunkiman pacienciawan suyakunaykipaq? Allinmi kanman Proverbios libropi Bibliaq nisqanta yuyariy: “Runaqa suyakusqan mana hunt’akuqtinmi llakikun, munasqan hunt’akuqtinmi ichaqa sonqon kawsarin” (Prov. 13:12, Diospa Simin Qelqa).

Imachus suyakusqanchis mana junt’akuqtinqa llakikusunmanmi. Chaymi pasarqan Abrahantapas. Jehová Diosmi prometerqan wawayoq kananpaq, ichaqa manan usqhayllachu Abrahanwan Sarawanqa wawayoq kapurqanku (Gén. 12:1-3, 7). Edadniyoqña kapuspan wajakurqan: “Diosnilláy, ¿ima allinniypaqtaq kanman prometewasqaykiqa, mana wawayoq kashaqtiyri? Manataq wawata qowankichu”, nispa. Jujmantaña Jehová Dios promesanta yuyarichirqan chaypas, Abrahanqa chunka tawayoq watata jinaraqmi suyakurqan (Gén. 15:2-4; 16:16; 21:5, Diospa Simin Qelqa).

Chhaynaqa, ¿unayta suyakusqanraykuchu Jehová Diosta manaña kusisqachu servirqan? Manapunin. Abrahanqa manan iskayarqanchu Jehová Diospa rimasqan junt’akunanmantaqa, chayraykun suyakushallarqan. Apóstol Pablon nirqan: “Chay promesataqa pacienciawan suyakusqan qhepatañan Abrahanqa chaskiran”, nispa (Heb. 6:15). Tukuy atiyniyoq Diosqa, Abrahanpa piensasqanmantapas astawanraqmi bendecirqan. ¿Imatan yachasunman kay junt’aq sonqo runamanta?

Sichus umalliq kayta munashanki, unay watakunañachus suyakushankipas chayqa ama pisipaychu, confiashallay Jehová Diospi, kusisqalla payta servishay. Askha iñiqmasikunata iñiyninkupi yanapaq hermano Williammi nin: “Umalliq kanapaqqa necesitakunmi tiempota. Juj hermanoq imakuna ruway yachasqanpas imayna kasqanpas pisi-pisimantan reparakun, imayna portakusqanpi ima kamachisqatapas ruwasqanpi. Wakinmi piensanku allin cristiano kasqanchisqa rikukun umalliq kasqanchispin otaq importante ruwaykunapi yanapakusqanchispin nispa. Chhayna piensayqa manan allinchu, allin cristiano kasqanchisqa rikukun maypiña kashaspapas imapiña yanapakushaspapas Jehová Diosta junt’aq sonqowan servisqanchispin”, nispa.

Juj hermanon chunka wata más suyakurqan umalliq kananpaq. Ezequiel libropi juj capitulopi imatachus yachasqanmantan nirqan: “Jehová Diosqa carrontan, llaqtantan purichin munasqanman jina. Manan noqanchispa munasqanchisman jinachu imapas ruwakun, aswanpas pay allinpaq qhawarisqanman jinan. Maytaña umalliq kayta munashayman chaypas, manan noqaq munasqaychu otaq piensasqaychu aswan importanteqa. Manapaschá imatachus noqa munashani chaytachu necesitashayman Jehová Diospa qhawarisqanman jinaqa”, nispa.

Sichus jayk’aqllapas umalliq jina yanapakunki chayqa, yanapakuy iñiq t’aqa kusikuywan Diosta servinanpaq. Sichus manaraq umalliqchu kanki chayqa kallpachakuy pacienciawan suyakunaykipaq. Ñaupaqpi rimamusqanchis hermano Raymondmi nin: “Imaymanata munapayaqqa, manan jayk’aqpas contentakunchu. Imachus munasqallaykipi piensanki chayqa manan kusisqachu Jehová Diosta servinki”, nispa. Chhaynaqa, Diospa espiritunpa rurunta wiñachishallay, astawanqa pacienciakuq kayta. Bibliata estudiaspa iñiyniykita wiñachishallay. Diosmanta jujkunaman willanaykipaq yachachinaykipaq ima astawan kallpachakuy. Familiaykita yanapay Diosta servinankupaq kuska adoranaykichispaq ima. Kallpachakuy iñiqmasikunawan sumaqta kausanaykichispaq. Chhaynapin astawan ñauparishaspa kusikuyta tarinki.

Jehová Diosqa munan Bibliaq kamachisqanta junt’anaykipaq kallpachakunaykita, aswan allin cristiano kanaykita, iñiq t’aqata yanapanaykita iman. Chaymantapas Jehová Diospas llaqtanpas manan munanchu pisikallpayanaykita phiñakunaykitapas. Diosqa yanapanmi allin sonqowan serviqninkunata, chaymantapas bendicionnintan qomun. Manataqmi payqa llakichinchu bendicionkuna qosqanwanqa (Prov. 10:22).

Unayña suyakushanki chaypas, wiñashallawaqmi iñiyniykipiqa. Jehová Diosqa manan qonqanqachu Bibliaq nisqanta junt’anaykipaq kallpachakusqaykitaqa, familiaykita mana qonqaspa iñiq t’aqapi allinta llank’asqaykitapas. Imataña kamachisunkiku chaypas kusisqallapuni Jehová Diosta serviy.