Payqa ‘ñantan reqsirqan’

GUY HOLLIS PIERCE iñiqmasiqa umalliq t’aqamantan karqan, paypa kawsayninmi kay pachapi tukupurqan 18 marzo killapi 2014 watapi, 79 watanpi kashaqtin. Payqa Cristoq wawqenkuna hinan suyakuyninta chaskirqan hanaq pachapi kawsarichisqa kaspa (Heb. 2:10-12; 1 Ped.3:18).

Pierce iñiqqa Auburn (California) llaqtapin nacerqan 6 noviembre killapi 1934 watapi, 1955 watapitaqmi bautizakurqan. 1977 watapin casarakurqan Penny esposanwan, paykunaqa askha wawakunayoqmi karqanku. Chaymi payqa huk tayta hina karqan iñiqmasinkunapaqpas. 1982 watapin esposanwan kuska precursor karqanku. 1986 watamantapachataqmi chunka hukniyoq wata karqan watukuq umalli Estados Unidos nacionpi.

1997 watapin Pierce iñiqqa esposanwan kuska Estados Unidos Betelpi Diosta servirqanku. Pierce iñiqqa predicacionta qhawariq t’aqapin llank’arqan, 1998 watapitaqmi Betelpi llank’aqkunamanta encargakuqkunata yanaparqan. 2 octubre killapi 1999 watapin umalliq t’aqaq ruwasqan hatun huñunakuypi willakurqan Pierce iñiqmasi umalliq t’aqamanta kapusqanta. Qhepa watakunamanmi payqa llank’arqan kaykunapi: Betelpi llank’aqkunamanta encargakuspa, yachachikuykuna qelqaymanta encargakuspa, qelqakuna ruwaymanta encargakuspa, encargakuq t’aqakunata umalliqkuna kaspa ima.

Pierce iñiqqa manan phiña uyachu kaq, payqa asi-asillan puriq; chaymi imaymana clase runakuna paywanqa allin sientekuqku. Ichaqa astawanqa chhaynaqa sientekuqku munakuq huch’uyyaykukuq kasqanraykun, Diospa kamachikuyninkunata respetasqanrayku, tukuypi Diospi iñisqanraykupiwan. Payqa nillaqpunin kayta: “Intiq lloqsimunanmantaraqchá iskayasunmanpas Diospa promesankuna hunt’akunanmanta iskayanamantaqa”, nispa. Chaytan llapa runakunaman willayta munaq.

Pierce iñiqqa tutallamanta sayarispan tutakama llank’aq Diosta servinanpaq. Iñiqmasinkunata kallpachananraykun pachantinta viajaq, manan hayk’aqpas “manan tiempoy kanchu” nispaqa niqchu yanapayta mañakuqtinkuqa. Iñiqmasikunaqa manan qonqankuchu munakuq kasqanta Bibliawan kallpachakuq kasqantapas.

Pierce iñiqtaqa anchatachá extrañanku esposan, soqta wawankuna, nietonkuna, bisnietonkuna, iñiypi wawankunapas. 22 marzo killapi 2014 watapin umalliq t’aqamanta Mark Sanderson huk discursota qorqan Pierce iñiqmasiq suyakuyninmanta, leerqanmi Jesuspa kay nisqanta: “Yayaypa wasinpiqa askha wasikunan kashan [...]. Rispaymi qankunapaq wasita wakichimusaq, kutimuspataq pusakapusqaykichis, maypichus ñoqa kashani chayllapitaq qankunapas kanaykichispaq. Maymanchus rishasqaytaqa yachankichismi, chayman riq ñantapas reqsinkichistaqmi”, nispa (Juan 14:2-4).

Pierce iñiqqa saqewanchismi. Ichaqa anchatan kusikunchis suyakuyninta chaskinanpaq ‘ñanta reqsisqanmanta’.