QALLARIYPI KAQ | ¿IMAYNATAN ATIPASUNMAN LLAKIPAKUYNINCHISTA?
Tukuy ladopin llakipakuy kan
“Mikhuyta rantiq riqtiymi galletasllata tarirqani, ichaqa, ¡sinchitan valesqa! Paqaristintaq manaña imatapas tarirqanichu” (Paul, Zimbabue)
“Qosay ‘ripusaqmi’ niwaqtinkun mana imanakuyta atirqanichu. ¿Pin wawaykunata uywaysiwanqa?” (Janet, Estados Unidos)
“Sirena qapariqtinmi pakakunaykuman phawani, bomba phataqtintaq pampaman thallani. Chay qhepamanpas khatatashallanin” (Alona, Israel)
Kunanqa “sasa tiempokunan” llapanchispaq kashan (2 Timoteo 3:1). Askha runakunan llakisqa kashanku tukuy imapas valesqanwan, guerrakuna kasqanwan, onqoykuna rikhurimusqanwan, terremotokuna, hukkunapas kasqanmantawan. Wakinqa manchasqa kashanku cáncer onqoyniyoq kanankumanta, wawanku otaq nietonku hamuq tiempopi imayna tarikunankumantapas.
Llapallanchispaqmi llakikuykuna kan. Mayninqa examenta qospa, llank’anata maskhashaspa jefewan parlana kaqtinpas khatatayraqmi hap’iwanchis. Mancharikuqtinchismi ima peligromantapas usqhaylla ayqenchis. Ichaqa tukuy tiempo manchasqa llakisqa kayqa manan allinchu. 68.000 runakunata huk estudio ruwakusqanpin yachakurqan pisillata llakipakuypas wañuyman apasqanta. Jesuspunin nirqan: “¿Mayqenniykichistaq atinman llakikushaspa, sayayninman huk chhikallantawanpas yapaykukuyta?”, nispa. Arí, sinchita llakikuspaqa manan astawanchu kawsasun. Chaymi Jesús nirqan: “Aman kawsayniykichismanta llakipakunkichischu”, nispa (Mateo 6:25, 27). ¿Imaynatan atipasunman llakipakuyta?
Yaqapaschá kunan allin kashanki, ichaqa qonqayllan ima llakipipas tarikusunman. Llakipi tarikuspaqa ñawpaqtan Diospa yanapayninta mañakunanchis, paypa promesankunapitaqmi confiananchis. Qatimuqpi yachasun imaynatan Paul, Janet, Alona llakipakuyninkuta atiparqanku chayta.