¿Imaraykun Dios munan mañakunanchista?
Amigon kananchistan munan
Allin amigokunaqa sapa kutillanmi rimanku. Diosninchispas invitawanchismi paypa amigon kananchispaq. Paypunin nin: “Qankuna waqyakuwankichis, qayllaykamuwaspan mañakuwankichis, ñoqataq uyarisqaykichis”, nispa (Jeremías 29:12). Dioswan rimaspan astawan payman asuykusun, hinan Diospas asuykamuwasun (Santiago 4:8). Biblian nin: “Diosqa llapa waqyakuqninkunaq sispallanpin kashan”, nispa (Salmo 145:18). Sichus Dioswan rimashallasun chayqa amigonmi kasun.
“Diosqa llapa waqyakuqninkunaq sispallanpin kashan” (Salmo 145:18)
Yanapaytan munawanchis
Jesusmi nirqan: “¿Mayqenniykichistaq wawaykichis t’antata mañakushaqtin rumita qowaqchis? Challwata mañakushaqtinpas, ¿mach’aqwayta qowaqchis? Qankunapas [...] allin kaqkunata wawaykichiskunaman qoyta yachankichismi, chaymantapas astawanraqmi hanaq pachapi kaq Yayaykichisqa allin kaqkunata mañakuqtiykichis qosunkichis”, nispa (Mateo 7:9-11). Arí, Diosqa interesakunmi ñoqanchispi, yanapaytan munawanchispas (1 Pedro 5:7). Diospunin munan llakikuypi tarikuqtinchis waqyakunanchista. Biblian nin: “Ama imamantapas llakikuychischu, aswanpas tukuy ima necesitasqaykichistapas Diosmanta mañakuychis, rogakuywan mañakuspaykichistaq Diosman graciasta qoychis”, nispa (Filipenses 4:6).
Runakunaqa Diostan necesitanchis
Allin yachaqkunan ninku: “Millonninpi runakunan necesitanku Diosmanta mañakuyta. Diospi mana creeqkunapas, Dios kasqanmanta iskayaqkunapas mañakunkun”, nispa.a Chaykunan rikuchin Diosman asuykunapaq kamasqa kasqanchista. Jesuspunin nirqan: “Kusisamiyoqmi huch’uyyaykukuspa Diosta maskhaqkunaqa”, nispa (Mateo 5:3). Diosmanta sapa kutilla mañakuspan payta maskhashanchis.
¿Ima allinkunatan chaskisunman Diosmanta mañakuqtinchis?
a 2012 watapin Centro de Investigación Pew nisqa willarqan, Estados Unidospi 100 runamanta 11 Diospi mana creeqkuna, Dios kasqanmanta iskayaqkunapas killapi huk kutillatapas Diosmanta mañakusqankuta.