Diosqa pisi tiempollamantan ñak’ariykunataqa tukuchinqa

“Señor Diosnilláy, ¿jayk’aqkamataq wajakamusayki, manataq uyariwankichu? ¿Jayk’aqkamataq: ¡Sarunchashawankun! nispa qaparimusayki, manataq qespichiwankichu?” (Habacuc 1:2, 3). ¿Diospi mana confiasqanraykuchu Habacuc chayta niran? Manan. Payqa Diospa sonqonpaq jinapunin imatapas ruwaq. Chaymi Diosqa paymanqa willaran ñak’ariykunata jayk’aq tukuchinanta (Habacuc 2:2, 3).

Sichus sufrishanki otaq pitapas sufriqta rikuspaqa nisunmanmi “Diosqa manan imatapas ruwanchu” nispa. Biblian ichaqa niwanchis: “Wakinña piensanku Jehová Dios unaymanta promesanta junt’ananpaq chaypas, manan payqa unaymantachu junt’anqa, aswanmi payqa qankunawan pacienciakushan; chaymantapas payqa manan munanchu pipas wañunantaqa, aswanmi munan lliupas juchankumanta pesapakunanta”, nispa (2 Pedro 3:9).

¿JAYK’AQTAQ DIOSRI ÑAK’ARIYKUNATA TUKUCHINQA?

Pisi tiempollamantan. Jesusmi willaranña “kay tiempopas tukukapunanpaqña kashaqtin” imaymana pasananta, chaytataq kay tiempo runakuna rikunanku karan (Mateo 24:3-42). Kay tiempopin chay willasqanqa junt’akushan, chaymi rikuchiwanchis Diosqa sufrimientotaqa tukuchinqapunin.a

¿Atinmanchu Dios ñak’ariykuna tukuchiyta? Arí, chaytan Jesús rikuchiran kay pachapi kashaspa. Yachasun wakinmanta.

Sinchi wayra kaqtin. Juj kutinmi Jesús apostolninkunawan Galilea qochanta purisharanku, chayllamanmi qallariran wayrantin parantin barconkupas chinkaykapusharanñan. Chaypin Jesús rikuchiran paypas Taytanpas tiempota controlanankupaq atiyniyoq kasqankuta (Colosenses 1:15, 16). Niranmi: “¡Ch’inlla kay! ¡Upallay!”, nispa. Wayrataq thanipuran, jinan thaj kapuran (Marcos 4:35-39).

Onqoykuna kaqtin. Askha runakunan yacharanku Jesusqa ‘ataque onqoyniyoqkunata, mana kuyuriy atiqkunata’, juj onqoyniyoqkunatapas jampiy atisqanta. Biblian Jesusmanta nin: “Llapan onqosqakunatapas qhaliyachiran”, nispa (Mateo 4:23, 24; 8:16; 11:2-5).

Yarqay kaqtin. Predicaspa purisqanpin Jesusqa iskay kutipi Papanpa atiy qosqanta utilizaran, pisi mijunallamantan milagrota ruwaspa askha runakunaman mijuchiran (Mateo 14:14-21; 15:32-38).

Wañuy kaqtin. Jesús kay pachapi kashaspaqa kinsa runakunatan kausarichiran, jujtaqa tawa p’unchay wañusqa kashaqtañan. Chaywanmi rikuchiran Jehová Diosqa atiyniyoq wañusqakunata kausarichinanpaq kasqanta (Marcos 5:35-42; Lucas 7:11-16; Juan 11:3-44).