Jehová Diosqa valoranmi “amén” nisqanchista
JEHOVÁ DIOSQA ancha allinpaqmi qhawarin payta servinanchispaq tukuy ima ruwasqanchista (Mal. 3:16). Ejemplopaq, askha kutitan “amén” nispa ninchis. ¿Valoranchu chay nisqanchista? Arí valoranmi. ¿Imatan nishanchis “amén” nispa? ¿Imaynatan Bibliapi chay simita utilizakun? Chaymantan kunan yachasun.
LLAPAN RUNAKUNAN “¡AMÉN!” NISPA NINANKU
“Amén” nisqa simiqa hebreo rimaymantan jamun, chayqa “junt’aq kay” “confianapaq jina kay” ninanmi, quechua rimaypitaq “chhaynapuni kachun” “chay jina kachun” ninanta nin. Pipas juramentota ruwaspa “amén” nispa niqtinqa, ima rimasqanpas cheqaqpuni kasqantan rikuchisharan; chayman jinataq castigasqa otaq bendecisqa kanan karan (Núm. 5:22). Ima promesata ruwaspapas “amén” nispa niqqa tukuy atisqantan ruwanan karan promesanta junt’ananpaq (Neh. 5:13).
Deuteronomio libropi 27 capitulopin Israel llaqta “amén” nispa niranku. Israelitakuna prometesqa allpaman jaykusqanku qhepamanmi Ebal orqoq Guerizim orqoq wayq’onpi juñukuranku Diospa leyninta uyarinankupaq. Ichaqa manan uyarillarankuchu, aswanpas sapa kuti “amén” nispan rikuchiranku chay leykuna aceptasqankuta (Deut. 27:15-26). Chay kutipin qharikunapas, warmikunapas, wawakunapas juj nisqalla fuerte kunkawan kutichiranku “amén” nispa (Jos. 8:30-35). Chay p’unchaypi nisqankutaqa manachá jayk’aqpas qonqarankuchu. Junt’arankutaqmi rimasqankuwan. Biblian nin: “Israel runakunaqa Josuepa kausanankaman Señor Diosta serviranku, jinallataq Señor Diospa Israel runakunapaq imaymana ruwasqanta rikuq kuraq taytakunaq kausanankama”, nispa (Jos. 24:31).
Rimasqan cheqaqpuni kasqanta qhawarichinanpaqmi Jesuspas “amén” nispa niran. Mayninpin manaraq imatapas willashaspa “cheqaqtapunin niykichis” nispa niran, chayqa “amén” niyllataqmi. Mayninpitaq rimayta tukuspa iskay kutita “amén, amén” nispa niq (Mat. 5:18; Juan 1:51). Chhaynapin rikuchiran rimasqan cheqaqpuni kasqanta. Jesusllan chhaynataqa rimayta atiran. ¿Imarayku? Payllan autorizasqa karan Diospa nisqanta junt’achinanpaq (2 Cor. 1:20; Apo. 3:14).
RUNAKUNAN “¡AMÉN!” NISPA NIRANKU, DIOSTATAQ YUPAYCHARANKU
Israelitakunaqa “amén” nispan niranku Diosmanta mañakuspa payta alabaspa ima (Neh. 8:6; Sal. 41:13). Pipas Diosmanta mañakusqan qhepamanmi llapallanku “amén” nispa niqku, chhaynapin rikuchisharanku imachus mañakusqanwan acuerdopi kasqankuta. Chaymi yanaparan llapallanku kusisqa Diosta adoranankupaq. Juj kutinmi rey David Diospa arcanta Jerusalén llaqtaman aparan, chaypin Diosman takiranku Davidpa ruwasqan takita. Chay takipiqa sonqomantan Diosman mañakusharanku (1 Crón. 16:8-36). Chhaynata Diosmanta mañakusqankuta uyarispankun llaqtantin niranku: “¡Amén! ¡Señor Diosqa yupaychasqa kachun!”, nispa. Juj nisqalla kutichispaqa astawanraqchá kusikuranku.
Ñaupa tiempopi cristianokunapas “amén” nispan niranku Jehová Diosta jatunchanankupaq. Biblia qelqaqkunapas cartankupin “amén” nispa nillarankutaq (Rom. 1:25; 16:27; 1 Ped. 4:11). Apocalipsis libropi nisqan jina, angelkunapas “¡amén! ¡Alabasqa kachun Jehová Diosqa!” nispan ninku (Apo. 19:1, 4). Chaymantapas cristianokunaqa juñunakuyninkupi mañakushaspan “amén” nispa niqku (1 Cor. 14:16). Ichaqa sonqomanta chayta ninankupaqqa tukuy yuyaywanmi uyarinanku karan, entiendenankutaqmi karan imachus mañakusqanta.
¿IMARAYKUN IMPORTANTE “AMÉN” NIY?
Qhawarimusqanchis jina mañakusqanchis qhepaman “amén” niyqa ancha importanten. Sapallanchispi mañakushaspa “amén” nispa nisqanchisqa sonqomanta mañakusqanchistan rikuchin. Pipas Diosmanta mañakusqan qhepaman fuertetaña otaq sonqollanchispiña “amén” nispa ninchis chayqa, chay mañakuywan acuerdopi kasqanchistan rikuchinchis. ¿Ima razonkunan kallantaq “amén” ninapaq? Qatimuqpi chaymanta yachasun.
Chaywanmi Diosta adorashanchis. Pipas Diosmanta mañakushaqtinqa tukuy yuyaywanmi uyarinanchis, chayta ruwaspan Diosta adorashallanchistaq. Jinaspapas sonqomanta “amén” ninanchispaqqa tukuy yuyaywanmi uyarinanchis Diosmanta mañakusqanta.
Hermanonchiskunawanmi jujllachawanchis. Pipas llapanchispaq mañakusqantaqa juj nisqallan uyarinchis (Hech. 1:14; 12:5). Mañakuyta tukusqan qhepaman llapallanchis “amén” nisqanchispas jujllachawanchismi. Sonqollanchispiña alto kunkawanña “amén” nisqanchiswanmi Jehová Diosta nishanchis: “Uyariykuwayku mañakusqaykuta”, nispa.
“Amén” nispaqa Jehová Diostan jatunchashanchis
Jehová Diostan jatunchanchis. Jehová Diosqa valoranmi payta adorananchispaq tukuy ruwasqanchista (Luc. 21:2, 3). Payqa yachanmi sonqonchispi ima kasqanta. Telefonopi juñunakuyta uyarispa “amén” nisqanchistapas valoranmi. Chhaynapin hermanonchiskunawan kuska Jehová Diosta jatunchashanchis.
“Amén” nisqanchisqa manapaschá valorniyoqpaq jinachu qhawarikunman, ichaqa manan chhaynachu. Perspicacia libropin willan: “Amén nispaqa rikuchishanchis confiasqanchista, ima nisqanchismantapas seguro kasqanchista, cheqaq suyakuyniyoq kasqanchistapas”, nispa. Chaymi sapa kuti “amén” nispaqa Jehová Diosta kusichinchis (Sal. 19:14).