Diospa yachachisqan contrapi yachachikuykunatan thunishayku

1. ¿Imatan apóstol Pablo ñaupaq tiempopi ajllasqa cristianokunata niran?

APÓSTOL PABLON ñaupaq tiempopi cristianokunata niran: ‘Ama kay pacha runakuna jinachu kausaychis’, nispa (Rom. 12:2). Chay cristianokunaqa janaq pachaman rinankupaqmi ajllasqaña karanku. Chhaynaqa, ¿imaraykun chayta paykunata niran? (Rom. 1:7.)

2, 3. a) ¿Imaynatan Satanás Diosmanta t’aqayta munawanchis? b) ¿Imaynatan umanchismanta mana allin piensaykunata orqosunman sasaña kaqtinpas?

² Wakin cristianokunan kay pachapi runakunaq piensasqanman jina mana allinta piensayta qallariranku, chaymi Pabloqa llakisqa kasharan (Efes. 4:17-19). Chayqa noqanchistapas pasawasunmanmi. Satanasmi kay pachata kamachishan, payqa imaymana trampakunawanmi Diosmanta t’aqawasunman. Ejemplopaq, sichus imaymanayoq kayta munapayasunman chayqa, chay tumpallan Diosmanta t’aqawasunman. Chaymantapas imatas wasinchispi, escuelanchispi, juñukusqanchis runakunawanpas yacharanchis, chaytapas utilizanmanmi pay jina piensananchispaq.

³ ¿Atisunmanchu umanchismanta ‘allin perqachasqa jina kaqkunata’ orqoyta? (2 Cor. 10:4.) Apóstol Pablon kutichiran: “Noqaykuqa llapa pantasqa piensaykunata, Diosmanta yachay contrapi jatariq lliu jark’anakunata iman thunishayku, chaymantapas tukuy ima piensaykunatan presochayku, jinaspa Cristo kasukuqman tukuchiyku”, nispa (2 Cor. 10:5). Jehová Diospa yanapayninwanqa orqosunmanmi umanchismanta mana allin piensaykunata. Imaynan wakin medicamento cuerponchismanta venenota orqoyta atin, chhaynatan Diospa palabranpas yanapawasunman umanchismanta mana allin piensaykunata orqoyta.

PIENSASQANCHISTAN CAMBIANANCHIS

4. ¿Ima ruwaykunatan saqepuranchis Diosta servinapaq?

⁴ Jehová Diosta servinanchispaqqa Bibliapi yachasqanchisman jinan vidanchista cambiaranchis, mana allin ruwasqanchiskunatataq saqepuranchis (1 Cor. 6:9-11). Jehová Diostaqa anchatan agradecekunchis mana allin ruwaykunata saqepunanchispaq yanapawasqanchismanta.

5. ¿Ima iskay ruwaykunata ruwananchispaqmi Romanos 12:2 textopi kamachiwanchis?

⁵ Ichaqa, ¿ninanchischu: “Manañan imapipas cambianaychu”, nispa? Manan. Jatun juchakunataña saqepuranchis chaypas, cuidakunanchismi imaynallamantapas chay juchakunaman jujmanta ama urmananchispaq. ¿Imaynatan chayta ruwasunman? Apóstol Pablo nin: “Amataq kay pacha runakuna jinachu kausaychis [otaq piensaychis], aswanpas yuyayniykichista mosoqyachispa imayna kasqaykichista cambiaychis”, nispa (Rom. 12:2). Chhaynaqa cuidakunanchismi kay pacha runakuna jina piensaymanta. Chaymantapas imachus piensasqanchistan cambiananchis.

6. Mateo 12:43-45 textopi Jesuspa willasqan ejemplo, ¿imatan yachachiwanchis?

⁶ ¿Imatan Pablo nisharan: “Imayna kasqaykichista cambiaychis”, nispa? ¿Jawallanchista cambiananchismantachu nisharan? Manan. Aswanpas tukuypin cambiananchis: Imachus piensasqanchista, imachus sientesqanchista, imachus munasqanchista, imayna portakusqanchistapas (qhaway “¿Sonqomantapunichu cambiashanchis?” nisqa recuadrota). Chaymi tapukunanchis: “Cristo jina kanaypaq, ¿sonqomantapunichu cambiashani icha jujkunaq rikuwanallanpaqchu?”, nispa. Mateo 12:43-45 (leey) textopin Jesús juj ejemplota willaran, chay willakuymi kayta yachachiwanchis: Mana allin piensaykunatan umanchismanta orqonanchis, jinaspa Diospa munasqanman jina piensaykunata umanchisman junt’achinanchis.

“MOSOQYACHISHALLAYCHIS IMAYNACHUS PIENSASQAYKICHISTA”

7. ¿Imaynatan cambiasunman ukhunchispi imayna kasqanchista?

⁷ ¿Atisunmanchu ukhunchispi imayna kasqanchista cambiayta? Biblian niwanchis: “Mosoqyachishallaychis imaynachus piensasqaykichista, chaymantapas p’achakuychis mosoq runa kaywan; chayqa Diospa munayninman jinan kamasqa karan cheqaq chanin kaypi, junt’aq sonqo kaypi ima”, nispa (Efes. 4:23, 24). Rikusqanchis jina atisunmanmi cambiayta, ichaqa sasan. Kallpachakunanchismi mana allin ruwaykunata amaña ruwanapaq, chaymantapas ‘mosoqyachinanchismi imayna piensasqanchista’, chaypaqqa imachus munasqanchista, imayna portakusqanchista, imarayku imatapas ruwasqanchistan cambiashanallanchis.

8, 9. ¿Imatan yachanchis juj hermanonchista imachus pasasqanmanta?

⁸ Juj hermanonchismanta yachasun, payqa maqanakuykunapin puriq machaqmi karanpas. Qhepamanmi ichaqa vidanpi imaymana cambiokunata ruwasqanrayku bautizakuran, chayta rikuspankun llaqtanpi runakunaqa admirakuranku. Juj tardenmi ichaqa bautizakusqanmanta pisi tiempo qhepallaman juj machasqa runa hermanonchispa wasinta rispa imaymanata k’amiran paywan maqanakuyta munaspa. Qallariypiqa hermanonchisqa aguantakuranmi, ichaqa chay runan Jehová Diospa sutinta oqarispa imaymanata Diosta k’amiran, jinan hermanonchisqa manaña aguantakuspa maqarapuran. ¿Imaraykun chayta ruwaran? Bibliata estudiaspa yacharanña maqanakuy mana allin kasqanta chaypas, sonqonpi imayna kasqantan manaraq cambiaranraqchu.

⁹ Hermanonchisqa kallpachakushallaranmi cambiananpaq (Prov. 24:16). Jinan umalliqkunaq yanapayninwan iñiyninpi wiñaspa umalliq kapuran. Juj tutan ichaqa juñunakunanchis wasi jawapi juj machasqa runa juj umalliqta maqayta munaran. ¿Imatan hermanonchis ruwaran chayta rikuspa? Sumaqllatan k’umuykuspa chay machasqa runawan parlaran jinaspa wasinmanraq apapuran. ¿Imaraykun hermanonchis chayta ruwaran? Payqa mosoqyachiranmi imayna piensasqanta, chaymi humilde samp’a runaman tukupuran. Arí, sonqon ukhupi imayna kasqantan cambiapuran, chay ruwasqanqa Jehová Diostan jatuncharan.

10. ¿Imatan ruwananchis ukhunchispi imayna kasqanchista cambianapaq?

¹⁰ Ukhunchispi imayna kasqanchista cambianapaqqa askha watakunan tukuy atisqanchista kallpachakunanchis (2 Ped. 1:5). Askha wataña Jehová Diosta servishanchis chaypas manan chayllawanchu cambiaytaqa atisunman. Aswanpas cambiananchispaqqa tukuy atisqanchistan kallpachakunanchis. ¿Iman chaypaq yanapawasun? Qatimuqpi yachasun wakin ruwaykunamanta.

¿IMAYNATAN CAMBIASUNMAN IMAYNA KASQANCHISTA?

11. ¿Imaynatan Jehová Diosmanta mañakuy yanapawanchis imayna kasqanchista cambiananchispaq?

¹¹ Ñaupaqtaqa Diosmantan mañakunanchis. Salmo qelqaq jinan Diosta ninanchis: “Diosníy, ch’uya sonqota kamariway, cheqaq sonqoyoq kanaypaq mosoqyachiway”, nispa (Sal. 51:10). Diosmanmi willananchis imayna kasqanchista cambiayta munasqanchista jinaspa yanapayninta mañakunanchis. Ichaqa, ¿Jehová Dios yanapawasunmanchu cambiananchispaq? Arí, Ezequielpa tiemponpi rumi sonqo israelitakunatapas yanaparanmi. Paykunatan niran: ‘Chay rumi sonqoykichista qechupusqaykichis, jinaspan juj mosoq sonqota [otaq kasukuq sonqota] qosqaykichis’, nispa (Ezeq. 11:19). Jehová Diosqa liston kasharan israelitakunata yanapananpaq, noqanchista yanapawananchispaqpas liston kashan, chayqa anchatan kallpachawanchis.

12, 13. a) Salmos 119:59 textopi nisqanman jina, ¿imapin piensananchis? b) ¿Ima tapuykunatan ruwakunanchis?

¹² Iskay kaqpi, sapa p’unchaymi Bibliata tukuy atencionwan leenanchis jinaspa imachus yachasqanchispi piensananchis, chaymi yanapawasun umanchismanta mana allin piensaykunata orqonanchispaq (leey Salmos 119:59; Heb. 4:12; Sant. 1:25). Reparananchismi ima mana allin piensaykunas umanchispi kashan chayta, imakunapiraqchus urmashanchis chaytapas. Jinaspa chaykunata atipanapaq tukuyta kallpachakunanchis.

¹³ Chaypaqmi kay jina tapuykunata ruwakunanchis: “¿Envidiakunichu pimantapas? (1 Ped. 2:1.) ¿Alabakunichu may llaqtamanta kasqaywan, educacionniyoq, qolqeyoq kasqaywan? (Prov. 16:5.) ¿Jujkunamanta aswan allinpaqchu qhawarikuni qhapaq kasqayrayku otaq juj colorniyoq kasqayrayku? (Sant. 2:2-4.) ¿Gustawanchu Satanaspa kamachisqan pachapi imaymanakuna kasqan? (1 Juan 2:15-17.) ¿Gustawanchu qhelli ruwaykunata maqanakuykunata qhaway?”, nispa (Sal. 97:10; 101:3; Amós 5:15). Chay tapuykunaman sut’illanta kutichispan reparasun imakunapiraqchus cambiananchis kasqanta. Sichus mana allin piensaykunata umanchismanta orqosun chayqa, Jehová Diosninchistan kusichisun (Sal. 19:14).

14. ¿Imaraykun allin amigokunata ajllakunanchis?

¹⁴ Kinsa kaqpi, allin amigokunatan ajllakunanchis. Manaña reparanchischu chaypas pikunawanchus astawan juñunakunchis paykuna jinan piensayta qallarinchis (Prov. 13:20). Escuelapi, llank’ananchispi compañeronchiskunaqa manan yanapawanchischu Jehová Dios jina piensananchispaq. Juñunakuykunapin ichaqa allin amigokunata tarisunman, paykunaqa kallpachawanchismi munakuq kananchispaq allin kaqta ruwananchispaqpas (Heb. 10:24, 25).

‘IÑIYNINCHISPIN QAQATA SAYANANCHIS’

15, 16. ¿Imaynatan Satanás imachus piensasqanchista cambiayta munan?

¹⁵ Ama kayta qonqasunchu: Satanasqa imaymanatan ruwanqa imachus piensasqanchista cambiananchispaq. Imaymana yachachikuykunawanmi Bibliapi cheqaq yachasqanchista cambiananchista munan.

¹⁶ Satanasqa Evatan Edén huertapi tapuran: “¿Dioschu nirasunkichis: ‘Aman mijunkichischu huertapi llapa sach’a ruruta’?”, nispa (Gén. 3:1). Kay tiempopipas Diosta mana serviq runakunaqa chay jina tapuykunatan ruwawasunman imapi creesqanchismanta iskayananchispaq, yaqapaschá tapuwasunman: “¿Mana allinpaqchu Dios qhawarin qharipura warmipura casarakuyta? ¿Manachu Dios munan Navidadta cumpleañokunatapas festejananchista? ¿Manachu Dios munan yawarta churachikunanchista? ¿Manachu Dios munan expulsasqa familiaykiwan juñukunaykita?”, nispa.

17. a) Sichus pipas iskayananchista munaspa creesqanchismanta tapuwasunman chayri, ¿imatan ruwananchis? b) Colosenses 2:6, 7 textopi nisqanman jina, ¿imayna iñiyniyoqmi kasunchis chayta ruwaqtinchis?

¹⁷ Imakunapi creesqanchismantaqa convencesqan kananchis. Wakinmanta iskayashanchis chayqa investigananchismi. Manachus chayta ruwasun chayqa pisi-pisimantan astawan iskayasunman, mana allin piensaykuna umanchisman jamunman iñiyninchispitaq chiriyapusunman. Biblian niwanchis piensasqanchista cambiananchis kasqanta, chhaynapin allinta yachasun Diospa munaynin allinpuni, junt’asqapuni kasqanta (Rom. 12:2). Sichus sapa kutilla estudiasun chayqa, manan iskayasunchu Bibliapi yachasqanchis cheqaqpuni kasqanmanta. Jinaspapas manan iskayasunchu Diospa kamachikuyninkuna allinpuni kasqanmanta. Chayta ruwaqtinchisqa allin saphichasqa sach’a jinan ‘iñiyninchispi qaqata sayasunchis’ (leey Colosenses 2:6, 7).

18. ¿Iman yanapawasun llapa pantasqa piensaykunata rechazananchispaq?

¹⁸ Allin iñiyniyoq kananchispaqqa sapankanchismi kallpachakunanchis. Chhaynaqa piensasqanchistan mosoqyachishanallanchis, Diosninchiswan parlashanallanchis, santo espiritunta mañakushanallanchis, Bibliamanta yachasqanchispi piensashanallanchis, reparashanallanchis piensasqanchis allinchus kashan manachus chayta, allin amigokunatataq ajllakunanchis; paykunan yanapawasun imachus piensasqanchista cambiananchispaq. Chaykunata ruwaspan “llapa pantasqa piensaykunata, Diosmanta yachay contrapi jatariq lliu” jark’anakunatapas thunisun (2 Cor. 10:5).