Runaman Bibliamanta yachachiymi usqhaylla aparikushan
1 Manaraq kay Hallp’amanta ripushaspan Jesús qatikuqninkunata kamachiran: “Rispa llapa suyu runakunata yachachimuychis, yachachisqaykuna kanankupaq”, nispa. Chay kamachikuyta hunt’anankupaqqa Hallp’antinpi runakunamanmi willananku karan munaqkunamantaq yachachinanku karan (Mat. 28:19, 20; Hech. 1:8). ¿Chay kamachikuy chaskisqanku sasachu karan hunt’anankupaq? Manan. Soqta chunka phisqayoq wataña chay kamachikuyta hunt’ashaspan apóstol Juan niran: “Diosta munakuspanchisqa kamachikusqankunatan kasukunchis, kamachikuyninkunaqa manataqmi sinchi sasachu”, nispa (1 Juan 5:3).
2 Bibliaq willasqan hina, ñawpa tiempopi cristianokunaqa tukuy sonqowanmi Jesuspa kamachisqanta hunt’aranku (2 Tim. 4:1, 2). Chaytaqa manan hunt’anankuraykullachu ruwaranku, aswanmi Jehová Diosta tukuy sonqowan hatunchayta munaspa hinallataq runakuna qespichisqa kanankuta munaspa (Hech. 13:47-49). Jesuspa qatikuqninkunaman tukupuqkunallataqmi hukkunamanñataq yachachiranku chaywanmi ñawpa tiempopi cristianokunaqa usqhaylla yapakuran (Hech. 5:14; 6:7; 16:5, Edición 1988).
3 Runakunata yachachiymi yapakushan: Chay llank’ayqa kay watakunapin astawanraq yapakushan. Waranqanpi runakunañan allin willakuykunamanta yachanku chayman hinataq kawsashankupas (Luc. 8:15). Kay millay pacha tukukapunanpaqmi tiempo aswan pisillaña kashan. Chaymi “allin yuyayniyoq hunt’aq kamachi” askha yanapaykunata apachimushan allin sonqoyoq runakunaman cheqaq kaqta yachachinanchispaq (Mat. 24:45).
4 ¿Imatapunin Biblia yachachin? nisqa librotan 2007 watapi chaskiranchis. 2006 watapi enero killapi Reinopaq Servicionchispitaq lloqsimuran: “Enseña [Imatapunin] nisqa libroqa, akllasqa qelqanchismi estudio qonapaq” nisqa tema, chaypi nin: “Kay libroqa ruwakuran Bibliamanta estudio qonapaq akllasqa qelqanchis kananpaq. [...] Enseña nisqa libroqa anchatapunin yanapawasun hukkunata yachachinapaq Jesuspa yachachisqankuna kanankupaq”, nispa (Hech. 13:48).
5 2005 watamanta enero killamanta Reinopaq Servicionchispin lloqsimuran: “Diosta servinankupaq hina estudiota qosun” nisqa tema, chaypin kayta niran: “Estudiantepas, yachachiqpas atisqankuman hinallan estudiananku”, nispa. Llapallanchismi munanchis estudiantekuna usqhaylla bautizakunankuta ichaqa yachasqankuta entiendespa chayman hina kawsasqankun aswan allinqa. Sichus yachachiqpas estudiantepas sapa semana yachanankupaq kallpachakunqaku chayqa usqhayllan estudiaqqa bautizoman chayanqa. Imatapunin nisqa librota tukuqqa ñan Diospa munasqanman hinaña kawsashanan.
6 Askha runakunatañan yanapakushan: Willakuykunaq nisqan hina ¿Imatapunin Biblia yachachin? nisqa librowanmi predicacionpi askha runakunata yanapakushan. África cheqasmanta huk warmin Testigokunata mana allinpaq qhawariran, ichaqa Diospa Simintan yachayta munaran. Huk kutinmi Ingrid sutiyoq iñiqmasinchis chay warmiwan rimaran, Imatapunin nisqa librota qhawarichiqtintaq kusikuran. Estudiota munachiqtintaq chaskikuran ichaqa libropi kaq llapa textokuna taqwinankutan munaran. Kunanqa rishanñan huñunakuykunaman, huñunakuypi tapuykunamanpas kutichishanñan, predicacionmanpas lloqsiytañan munashan.
7 Marilyn sutiyoq iñiqmasinchismi wasin-wasinta predicashaspa Melanie sutiyoq, wawayoq sipas warmiwan tuparan. Chay sipasqa astawanmi yachayta munaran chaymi iñiqmasinchisqa huk tratadota saqeran qheparankutaq hukpi tupanankupaq. Askha kutita risqan qhepamanñan wasinpi tariran. Marilyn nin: “Imatapunin nisqa libromantan yachachiyta qallarirani. Melanieqa yachasqanman hinañan kawsashan. Huk kutinmi Imatapunin nisqa libropi payllamanta leesqa Navidad fiestamanta. Hinaspan manaraq Navidad fiesta chayamushaqtin qonqaylla niwaran, kay watallañan Navidad sach’ata hap’isaq nispa”, nispa.
8 Estudiantekunaqa manan kaqtakamachu ñawparinku: Bibliamanta yachachiqkunapas estudiantekunapas manan kaqllachu kanku. Wakin estudiantekunan usqhaylla iñiyninkupi wiñanku wakintaqmi ichaqa unaypiraq. Yachachisqayki runa, ¿allin educaciontachu chaskiran? ¿Munakunchu allin kaqkunata? ¿Dios sonqo runachu? Chaykunamantan kanqa iñiyninpi wiñayninqa. Hinaspapas manan llapa estudiantekunachu “tukuy sonqo” estudianku nitaq ñawpa tiempopi Berea llaqtapi runakuna hinachu sapa p’unchay estudiankupas (Hech. 17:11, 12).
9 Chayrayku 1998 watapi abril killamanta Nuestro Ministerio del Reino nisqa qelqapi lloqsimuran: “Se buscan más estudios bíblicos” nisqa tema, chaypin kayta niran: “Manan llapa estudiantekunachu kaqtakama ñawparinku yachasqankupi. Wakinqa pisitan munakunku allin kaqkunata manataqmi yachasqankuta usqhayllachu umankupi hap’inku. Wakintaq imaymana ruwanayoq kasqankurayku mana tiemponku aypanchu sapa semana huk capitulota estudianankupaq”, nispa. Chaywanpas estudiantekunaq atisqankuman hinallan Bibliamanta yachachinanchis.
10 Kunanmi astawanraq kallpachakunanchis cheqaq yachachikuykunata runakunaman yachachinanchispaq tiempo aswan pisillaña kasqanrayku. Hinaspapas, Bibliamanta yachay munaqkunata tarinanchispaqña mañakushanchis chaypas mañakunallanchistaqmi yachachisqanchis runakunapaqpas. Chhaynapin “sapa p’unchay [...] kay pachaq p’uchukanankama” runakunata yanapasun bautizakunankupaq (Mat. 28:20).