Yuyaypi Jesús hina kasun
1. ¿Imayna yuyayniyoqmi Jesús karan?
1 Manaña hayk’aqpas Diospa Churinta rikuranchischu chaypas, paypa vidanmanta, servicionmanta Bibliapi leespan munakunchis (1 Ped. 1:8). Papanpa munayninta ruwananpaqmi, Jesusqa cielopi hatunchasqa kawsayninta saqespa Allpaman hamuran, kaypin hukkunata serviran mana imata mañaspa, vidantapas runakunarayku qoran (Mat. 20:28). Diospa Palabranmi kamachiwanchis: “Qankunapas Cristoq yuyaynin hina yuyayniyoq kaychis.” ¿Imaynatan pay hina kasunman? (Fili. 2:5-8.)
2. ¿Ima problemapin askha cristianokuna tarikunchis, iman yanapawasun chay problema venceyta?
2 Sayk’usqa kaspanchis. Mana huchayoqña Jesús karan chaypas sayk’uranmi. Huk kutinmi, “viajasqanku qhepata sayk’usqa” kashaspa, unayta predicasqa samaritanaman (Juan 4:6). Kunan p’unchaypas askha cristianokunan chhayna tarikunchis. Semanantin llank’asqanchisrayku sayk’usqa kaspan mayninpiqa mana facilchu predicananchispaq tiempo qokuy. Sapa kutin servicioman lloqsispan ichaqa reparanchis espiritualpi kallpachawasqanchista (Juan 4:32-34).
3. ¿Imaynapin Jesús hina kasunman yachachiy munasqanchispi?
3 Huk kutinmi Jesusqa discipulonkunantin samanankupaq ch’inniq ladoman risharanku. Chayta yachaspan askha runakuna, ñawpasqaku paykunata suyanankupaq. Jesusqa manan phiñakusqachu aswanmi “paykunata khuyapayaspa” “imaymanamanta yachachisqa” (Mar. 6:30-34). Bibliamanta hukkunaman yachachinapaqqa Cristo hinan kananchis. Runakunata cheqaqta munakuspan mana pisipanachu yanapasqanchispi. Sichus mana estudiota qonchischu chayqa, manan desanimakunachu estudio tarinanchispaq kallpachakusqanchispi.
4. ¿Imaynatan precursor auxiliar kasqanchis yanapawasunman yuyayninchispi Cristo hina kananchispaq?
4 Ñawpaqpi churasun espiritual kaqkunata. Precursor auxiliar kaymi yanapawasun espiritualpi ocupasqa kananchispaq. Sipas hermananchismmi qelqaran: “Amigaypa mamanmi iskayniykuta animawaranku huk killata precursora paywan kuska kanaykupaq. Kusikunin chay ruwasqaywan. Hermanokunata allinta reqsisqaywanmi kusikuni, pisi tiempomantaqa familiayta hinañan qhawarini. Sumaqmi ñoqapaqqa karan Jehovamanta huk runakunawan rimaypas, Reinomanta sumaq cheqaqkuna yachachiypas. Chaykunan yanapawan Jehovawan, organizacionninwanpas cercapi kanaypaq.” (Sal. 34:8).
5. ¿Imaraykun kallpachakunanchis Jesuspa yuyaynin hina yuyayniyoq kananchispaq?
5 Llapanchismi huchayoq cuerponchiswan maqanakunchis Jehová Diospa munaynin ruwananchisrayku (Rom. 7:21-23). Kay mundopiqa paykunallapaq imapas munasqankutan lliwpas ruwanku, ñoqanchismi ichaqa mana chhaynachu kananchis (Mat. 16:22, 23). Jehová Diosmi santo espiritunwan yanapawasun chaykuna atipananchispaq (Gál. 5:16, 17). Diospa mosoq mundonman haykunanchista suyakuspa, yuyayninchispi Jesús hina kasun: Reinoq interesninta, runamasinchispa interesnintawan ñawpaqpi churasun (Mat. 6:33; Rom. 15:1-3).