¿Imaynatan familianchisman predicasunman?
1. ¿Imaraykun allinta piensaspa familianchisman predicananchis?
1 Ima sumaqmi kanman Jehová Diosta adoraspa familianchiskunawan mosoq mundoman haykuyqa. Kay sumaq suyakuyqa cheqaqmi kanman familianchisman predicaqtinchis. Allintan ichaqa piensananchis, rimasqanchis sumaq kananpaq. Circuitopi superintendenten nin: “Pisi pisillamanta predicaspan familianchista rikch’arichisun uyarinanpaq, chayqa allinmi”. ¿Imaynatan chayta ruwasunman?
2. ¿Imaynatan sonqonchismanta interesakusqanchis familianchista rikch’arichinman?
2 Rikch’arichisun. Ñawpaqmanta allinta piensay iman familiaykita interesachinman (Pro. 15:28). ¿Imakunapin interesakun, ima sasachakuykunapin tarikun? Interesasqanman hinan revistapi huk temata otaq Bibliapi textotapas leesunman. Karupi tiyaqtinkuqa cartata apachisunman, telefonopipas rimasunman. Tarpuy cheqaqta sonqonpi mana sinchita rimapayaspa, Jehová Diosñan wiñachinqa (1 Cor. 3:6).
3. Familianchis ñoqanchispi interesakusqanta, ¿imaynatan aprovechasunman predicananchispaq?
3 Supaykunata runamanta qarqoruspan Jesusqa runata kamachiran: “Wasiykita ripuspa familiaykikunaman willamuy Señor [“Jehová”, NM] Diospa imaymana ruwapusqasuykita khuyapayasqasuykitawan, nispa” (Mar. 5:19). Payta uyarispaqa imaynataraqchá familianqa admirakuran. Manapaschá chhaynaqa sucedesunkichu, familiaykin ichaqa interesakunman ruwasqaykikunapi wawaykikunaq ruwasqanpipas. Escuela del Ministerio Teocraticopi discurso qosqaykimanta, asambleaman risqaykimanta, Betel wasita visitasqaykimanta, kawsayniykipi yanapasusqaykitapas willawaqmi. Kaykunan astawan sonqonta kicharinman Jehová Diosmanta organizacionninmantapas uyarinankupaq.
4. ¿Imakunapin mana pantananchischu familianchisman predicaspa?
4 Allinta piensana. Familianchisman predicaspaqa manan nishutachu rimapayana. Biblia estudiayta qallarishaspan huk hermanonchis pantasqanta yuyarin: “Sinchitan mamayta sayk’uchirani Bibliamanta tukuy yachasqayta willaspay, papaywanpas simipura hap’inakurayku”. Familianchismanta hukllapas Bibliamanta uyariyta munaqtinqa, huk kutipipas astawan uyariwananchispaq hinallatan rimana (Pro. 25:7). Mana reqsisqayki runaman hina predicay respetowan llamp’u simiwan pacienciawan (Col. 4:6).
5. ¿Imatan ruwasunman familianchis mana uyariyta munaqtin?
5 Huk tiempopin Jesusmanta familiankuna piensaranku mana yuyayninpi kasqanta (Mar. 3:21). Chay qhepamanmi ichaqa parientenkuna Jesuspi iñiranku (Hech. 1:14). Qallariypi familiaykiman predicaqtiykiqa manapaschá allintachu uyarisunki, ama chaywanqa pisipaychu. Imayna tarikusqanpas, imayna piensasqanpas cambianmanmi. Atikuqtinqa, imapas interesasqanmanta rimapayallay. Kusikuwaqmi yanapasqaykiwan wiñay kawsayman familiayki puririqtinqa (Mat. 7:13, 14).