Familiapaq horario: congregacionpi huñunakuykuna
1 Cristiano tayta mamakunaqa munankupunichá wawanku Jehová Diosta munakunankuta, servinankutapas, chhaynapi Diospa prometesqan mosoq allpapi wiñaypaq kawsanankupaq. ¿Imaynatan wawankuta yachachinkuman kawsayninkupi ñawpaqtaraq Jehová Diosta yupaychanankupaq? Kawsayninkuwanmi (Pro. 20:7). Testigo mamanta yuyarispan huk hermana, niran: “Manan hayk’aqpas tapunakuraykuchu risunchu icha manachu huñukuyman”, nispaqa. Chayqa sonqonkamaraq chayasqa.
2 ¿Familiayki entiendenchu imapaqmi congregacionpi huñunakuykuna? Huñunakuypi yachasqanchis, wayqe pananchiskunawan tupasqanchispas, kallpachawanchismi Jehová Diospa munayninta ruwashanallanchispaq (Isa. 54:13; Rom. 1:11, 12). Ichaqa, huñunakunchis ‘huñunasqa runakunaq qayllanpi’ Jehová Diosta hatunchanapaqmi (Sal. 26:12). Huñunakuykunaqa Jehová Dios munakusqanchista, yupaychasqanchistapas rikuchinapaqmi.
3 ‘Allintapuni reparakunanchis.’ Huñunakuyninchis ch’uya kasqanta yachaspan ‘allintapuni reparakunanchis’, mana hayk’aqpas huk ruwaykunarayku huñunakuyninchista saqenanchispaq (Efe. 5:15, 16; Heb. 10:24, 25). Familiapaq horariota ruwaspaqa, congregacionpi huñunakuytaraq ñawpaqman churay, amataq ima ruwaywanpas hark’achikuychischu huñunakuyman rinaykichista. Familiaykipaq ñawpaqtaraq ima ruwaykunamantapas huñunakuykunata churay.
4 ¿Manachu kusikunchis wayqe pananchiskuna huñunakuyman asambleakunamanpas rinankupaq hatun sasachakuykuna atipasqankumanta, leespa? Yaqapaschá qanpaqqa mana nishu sasachu huñunakuykunaman riyqa, ichaqa atipashankichá ima sasachakuykunatapas. Satanasmi sasachakuykunaman churashan Diospa kamachinkunata, mana Jehová Diosta yupaychanankupaq. Tayta mamakunaqa yachananku, huñunakuykunaman familiantin rinankupaq kallpachakusqankutaqa, wawakuna reparasqanta. Kallpachakushallankichis chayqa, ejemploykichistan wawakunaqa mana hayk’aqpas qonqanqakuchu.