Diospa Siminta willashallasun mana manchakuspa
1 Cristianokunaqa yachanchismi predicashaqtinchisqa mana llapan runakuna chaskiwananchista (Mat. 10:14). Ichaqa, runakunaq mana uyarisqankuqa mana hark’awanchischu allin willakuykunata willananchispaq (Pro. 29:25). ¿Iman yanapawanchis mana manchakuspa Diospa Siminta willashanallanchispaq?
2 Apostol Pabloqa yacharanmi ‘Señor Jesucristota reqsiyqa may chaniyoqpuni kasqanta’, chaymi tanqaran “mana imamanta iskayrayaspan” rimananpaq (Fili. 3:8; 1 Tes. 1:5). Hinaña hukkuna qhawaranku yachachisqanta mana cheqaqta hina chaypas, paypaqqa “chay willakuykunaqa Diospa atiyninmi [karan], chaywanmi llapa iñiqkunata qespichin” (Rom. 1:16). Chay rayku, millay runakunaq ñawpaqenpipas ‘Señormanta mana manchakuspa rimaran’ (Hech. 14:1-7; 20:18-21, 24).
3 ¿Pitaq kallpachawaqninchisri? Pabloqa manan kallpanllawanchu mana manchakuspaqa predicaran. Silasmanta paymantawan rimaspa niran: “ñawpaqta Filipos llaqtapi muchusqaykuta, k’amisqa kasqaykuta, chaywanpas Diosninchismi kallpachawarqanku, hinan qatiykachakuyña kashaqtinpas mana mancharispa allin willakuykunata willarqaykichis”, nispa (1 Tes. 2:2; Hech. 16:12, 37). Qhepamanña, Roma suyupi preso kashaqtin, Pabloqa valekuran wayqepanakunata paypaq mañakunankupaq ‘mana manchakuspa allin willakuykunata willashanallanpaq’ (Efe. 6:18-20). Apostolqa Diospa Siminta willashallaranpuni mana manchakuspa, Jehová Diosman hap’ipakuspan manataq pay kikinmanchu (2 Cor. 4:7; Fili. 4:13).
4 Kaqllataqmi kunan p’unchaypipas. Huk wayqenchispaq sasan karan llank’ananpi Jehováq Testigon hina reqsichikuypas predicaypas, hinaspa Diosta mañakuspa predicayta qallariran. Huk llank’aqmasinsi qallariypi manan uyariyta munasqachu, ichaqa kawsarinpuy suyakuymanta rimaqtin, Biblia estudiayta qallariran. Chaymantapacha, wayqenchisqa predicallaranpuni maypiña, imaynapiña tarikuqtinpas. Qatiq llank’ayninpitaq 34 llank’aqmasinkunata yanapasqa bautizakunankukama 14 watapi. Cheqaqtapuni yachanchis, Jehová Diosqa kallpachawasunchismi wayqenchista hina, ‘siminta mana manchakuspa willashanallanchispaq’ (Hech. 4:29).