Imaynata hukkunata yuyaymanachisunman
1. Bibliapi ¿ima willakuyta t’aqwisunchis, imanaqtintaq?
1 Hechos 13:16-41 textopi tarinchis Pisidia provinciapi Antioquía llaqta sinagogapi Pabloq discurso qosqanta, kayqa qhawachiwanchis imaynata hukkunata yuyaymanachisunman. Apostolqa yacharanmi uyariqninkunaq kawsasqankuta imayna yuyasqankutapas, chay rayku paykunapaq hina allin willakuykunata rimaran. T’aqwisunchis kay willakuyta, noqanchispas predicaspa kaqllata ruwananchispaq.
2. ¿Imatan yachanchis imayna Pabloq discurso qallarisqanmanta?
2 Uyariqninchiskunaq yachasqankumanta rimasun: Diospa munaynin hunt’akunanpaq Jesucristoq chaniyoq kasqanmantan Pabloqa rimanan karan, ichaqa manan chaymanta rimaspachu discursontaqa qallariran. Aswanmi, rimaran paypas uyariqninkunapas (yaqa llapanku Judío runakuna karanku) yachasqankumanta, chayqa karan: Judá llaqtamanta willakuy (Hech. 13:16-22). Noqanchispas, uyariqninchiskunaq yachasqankumanta rimaspan sonqonkuman chayasunchis. Imapunichus paykunaman qokusqanta yachananchispaqqa, allinta yuyaykuspa sumaqllata tapunanchis, makillataq uyarinanchis.
3. ¿Imanaqtinmi Pabloq uyariqninkunapaq sasa karan Jesusta Mesiasta hina chaskiyri?
3 Judá llaqtamanta willaspa, Pabloqa yuyarichiran uyariqninkunata, Diospa huk qespichiqta Davidpa familianmanta kachananpaq rimasqanmanta. Ichaqa, askha Judiokunaqa awqanakunapaq umalliqta suyasharanku, Roma suyuq ñit’isqanmanta kacharisqa kanankupaq, paykunaq suyuntaq hoqarikunanpaq. Kay Judiokunaqa yacharankupaschá Jerusalenpi kaq Judío umalliqkunaq Jesucristota karunchasqankuta, Romapi wañunanpaq kamachikuqkunaman saqesqankutapas. ¿Imaynatataq Pablo uyariqninkunata yachachinman iñinankupaq hina Jesús Mesías kasqanmanta?
4. ¿Imaynata Pablo yachayniyoqwanpuni yuyaymanachiran judío runakunata?
4 Uyariqninchispaq hina rimasun: Pabloqa yacharanmi uyariqninchiskunaq imayna yuyaykusqankuta, chay rayku Bibliawan paykunata yuyaymanachiran paykunaq yachasqankumanta rimaspa. Qhawasunchis; Jesusmanta rimaspaqa Davidpa miraynin kasqanta rikuchiran, askhapaq Diospa profetan hina reqsisqa Bautizaq Juanpa rimasqanmantapas (Hech. 13:23-25). Pabloqa rikuchiranmi; Jesusta karunchaspa, wañuchispapas Judío umalliqkunaqa, “Profetakunaq nisqanta hunt’arqanku” (Hech. 13:26-28). Chaymanta sut’incharan Jesucristoq kawsarinpusqan askhan rikusqankumanta, chaymantapas rimaran Bibliaq huknin textokunamanta, imayna hunt’akuran Jesuspa kawsarinpusqanwan (Hech. 13:29-37).
5. a) Griego runakunaman rimaspa ¿imaynata Pablo allicharan yachachisqanta paykunapaq hina? b) Predicashaqtinchis ¿imaynata qatikusunman Pabloq ruwasqanta?
5 Ichaqa Atenas llaqtapi kaq Areópago nisqapi griego runakunata rimaspaqa, hukniraqta yachachiran (Hech. 17:22-31). Hinaña kaqtinpas, kaq willakuyllata yachachiran, kallpachakusqantaq iskaynin kutipi allinpi tukuran (Hech. 13:42, 43; 17:34). Kunan p’unchaypas, servicionchis aswan allin kanqa uyariqninchiskunaq yachasqankumanta rimaqtinchis, kawsasqankuman, imayna yuyaykusqankuman hina yachachiqtinchispas.