Kawsay qoq yachachiy
1 ¡Ima sumaqmi Diospa Siminmanta cheqaqta yachaspa, runakunaq ñawin k’ancharisqanta rikuyqa! Diosmanta, munasqanmantapas runakunaman yachachiyqa kusichiwanchismi, kay yachachiyqa wiñay kawsanankupaqmi kanman (Juan 17:3).
2 Ima raykun aswan allin: Kay p’unchaykunapiqa imatapas estudiakunmanmi imaymananmanta (Ecl. 12:12). Chhaynaña kaqtinpas, chay yachachiykunaqa manan ‘Diospa musphana ruwasqankunawanqa’ tupanchu (Hech. 2:11). ¿Atiranchu kay pachapi yachachiykuna runakunata Kamaqninman asuykachiyta, paypa munasqanmanta yachachiytapas? ¿Entiendechiranchu runakunata, iman suceden wañuqtinchis, ima raykun ñak’ariykuna kasqantapas? ¿Qoranchu ima suyakuytapas? ¿Yanaparanchu familiakunata aswan kusisqa kawsanankupaq? Manan. Kawsaypi importante tapuykunataqa Diospa yachachisqallanmi kutichinman.
3 Diospa yachachiyninmi qowanchis kay pachapi yachachiykuna mana qowasqanchista: allin kawsanapaq yachachiykunata. Diospa Simin Qelqapi iñiqkuna, yachachisqantapas kasukuqkunaq sonqonpiqa manañan kanchu yana-runa, yuraq-runa, q’ello-runa cheqnikuy, ayllunkumanta hatunchakuspa hukkunamanta t’aqakuy, suyunkuta yupaychaypas (Heb. 4:12). Biblian yanapan askha runakunata manaña maqanakuq, k’aminakuq, wañuchinakuq kanankupaq, ‘mosoq runa-kaywan p’achawan hina churakunankupaqpas’ (Col. 3:9-11; Miq. 4:1-3). Diospa yachachiyninqa kallpachallantaqmi millonninpi runakunata, mana saqey atiy vicionkuta, Diospa cheqnisqan millay kasqankutapas saqepunankupaq (1 Cor. 6:9-11).
4 Ima raykun usqhaylla ruwana: Hatun Yachachiqninchismi reparachiwanchis imayna p’unchaykunapi tiyasqanchista. Anyanapaq profeciakunapin kan kay tiempopaq hina willakuykuna, chaytan allpantinpi willananchis (Apo. 14:6, 7). Yachanchismi Cristo hanaq pachapi kamachikusqanta, teqsimuyuntinpi pantasqa religionkuna chinkananta, kay pachapi kamachikuqkunata Diospa Reinon tukuchinantapas (Dan. 2:44; Apo. 11:15; 17:16). Chay rayku lliw runakuna usqhaylla yachananku Diospa churasqan kamachikuqmanta, lloqsipunanku hatun Babiloniamanta, iñiywantaq Jehová Diospa sutinta waqyakunanku (Sal. 2:11, 12; Rom. 10:13; Apo. 18:4). ¿Munanchischu yanapayta atisqanchisman hina, llapa runakunata kay kawsay qoq yachachiywan?