¿Atinqachu wawayki allin yuyaywan kutichiyta?
1. ¿Imatan ruwaranku wakin wayna-sipas Testigokuna, yawarta churayta munaqtinku? Huk ejemplota willay.
1 ¿Imamantataq allinta kutichinan? Yawar churachikuymanta. 1991 watamanta, 15 de junio Atalayapi “Jehová Diospa yachachisqanman hina puriy” nisqa temapi yachachisqan hina, Testigokunaq wakin wawanku qaqata sayaspa qhawarichiranku tayta-mamanku hina, allin yuyaywan yawarmanta Diospa kamachisqanta kasukusqankuta. ¿Ruwanmanchu wawayki chhaynata?
2. ¿Imaninmi suyunchispi leykuna wayna-sipaskuna mana yawar churachikunanmanta, imatataq tayta-mamakunapas yachananku chaymanta?
2 ¿Imanintaq ley? Perú suyupi leymi nin, wayna-sipaskunaqa decidinkumanmi imayna hanpichikuyta, nispa. Wakin leykuna nin, wayna-sipaskunata hanpinankupaqqa uyarinankuraqmi juezkunapas otaq hospitalpi llank’aqkunapas, nispa (Código de los Niños y Adolescentes, Artículo 9). Chhaynallataqmi huk suyukunapi leykunapas. Ejemplopaq, Estados Unidos suyupi tribunalmi 17 watayoq pananchis yawarta mana churachikuy munasqanmanta, khaynata decidiran: “Sichus sut’itapuni allin yuyayniyoq kasqanta, imapas ruwasqanta reparakusqantapas rikuchin chayqa, yuyayniyoq wawakunapaq leymi, derechota qon imayna hanpichikuy munasqanwan hanpichikunanpaq”. Hospitalpi llank’aqkuna otaq juezkunapas yaqapaschá wayna-sipaswan rimayta munanqaku, allin yuyayniyoq kasqanta reparanankupaq, yawar churachikuyta mana munasqanta yachanankupaqpas. Wayna-sipasqa yachananmi imayna onqosqa tarikusqanmanta, imayna hanpichikuyta akllasqanmanta sasachakuykunamantapas; chaymantapas yachanallantaqmi yawarmanta allin explicayta, Diospa kamachisqanpi iñisqanmantapas.
3. ¿Ima tapuykunapin tayta-mamakuna yuyaymanananku, ima rayku?
3 ¿Imaninqa wawayki? ¿Atinkumanchu wawaykikuna chay temamanta rimayta? ¿Sonqonkupichu kashan ‘ama yawarta mikhunapaq’ Diospa kamachikusqan? (Hech. 15:29; 21:25.) ¿Willanmanchu iñisqanmanta Bibliawan? ¿Tayta-mamanku mana chaypi kaqtin, allintapunichu mana manchakuspa kutichinqaku medicokuna, wañupunki niqtinkupas? ‘Sapankataq imaynapipas rikukunku’ chayqa, ¿imaynatan wawankuta yachachinkuman imapipas tarikuqtinku Dios sonqo kayninkuta rikuchinankupaq? (Ecl. 9:11; Efe. 6:4.)
4, 5. a) ¿Imata ruwananku tayta-mamakuna, imaynatan chayta ruwankuman? b) ¿Ima yanapaykunan kan chayta ruwanankupaq?
4 Tayta-mamakuna imatan ruwananku: Dios imaynatan yawarta qhawarin, chaytan wawaykichisman yachachinaykichis (2 Tim. 3:14, 15). Razonamiento libropi 345-348 paginakunapi astawan yachankichis. Familiantin t’aqwiychis. 348-350 paginakunapin “Pipas niqtin...” nisqanmanta sapanka huñunakusqaykichispi wawaykichiswan practicaychis, imapi iñinku, ima rayku, chay tapuykunata kutichinankupaq (1 Ped. 3:15). Kay sasachakuykuna atipanapaq kallantaqmi kay yanapaykuna, ¿Cómo puede salvarle la vida la sangre? nisqa folleto, 2004 watamanta, 15 de junio Atalayapipas, 14-24 paginakunapi. Chaymantapas, Asistencia médica sin transfusiones. Necesidades y derechos del paciente, La negativa a la sangre. La medicina acepta el reto —chayqa DVD Alternativas a las transfusiones. Serie documental nisqapin kan— chaykunan sut’inta willawanchis mana yawarwan hanpichikuypas operachikuypas allinpaq kasqanta. ¿Qhawarankichischu familiaykiwan kay peliculakunata?
5 Wawaykichista yanapaychis yawarmanta ‘mayqenchus Diospa munaynin kasqanta reparanankupaq’. Chhaynapi tarikuqtinku, Diospa munayninman hina allin yuyaywan kutichinankupaq (Rom. 12:2).