Llanp’u sonqokunata yachachisun Diospa ñanninta purinankupaq
1. ¿Imaynata yanapasunman hukkunata Cristoq qatikuqninkuna kanankupaq?
1 Ñawpaq kaq siglopi Cristoq qatikuqninkunataqa “Ñanta puriqkuna” nispa sutichaqku (Hech. 9:2, NM). Chayqa, cheqaq cristianokunaqa lliw ñanninkuta otaq imayna kawsasqankuta Cristoq yachachisqanman hina allichananku (Pro. 3:5, 6). Chay rayku Biblia estudiaqman yachachispanchis, manan Bibliaq yachachisqallantachu k’apakta yachachinanchis. Aswanqa yanapananchismi Jehová Diospa ñanninta purinankupaq (Sal. 25:8, 9).
2. ¿Biblia estudiaqta iman kuyurichinqa Diospa kamachikuyninkunata kasukunanpaq?
2 Jehová Diosta, Jesustapas munakunankupaq yanapay: Huchasapa runakunapaqqa sasan Diospa munayninman hinapuni yuyaykuy, rimay, ruwaypas (Rom. 7:21-23; Efe. 4:22-24). Chaywanpas, Diosta, Churintapas munakuspankun llanp’u sonqokunaqa kallpachakunku chayta ruwanankupaq (Juan 14:15; 1 Juan 5:3). ¿Imaynata yanapasunman Biblia estudiaqkunata chay munakuyta wiñachinankupaq?
3. ¿Imaynatan estudiaqkunata yanapasunman Jehová Diosta, Jesustapas astawan munakunankupaq?
3 Yanapay estudiaqta Jehová Diospa imayna kasqanta yachananpaq. Huk wayqenchis willan: “Estudiaqkunaqa manan munakunkumanchu mana reqsisqankutaqa, chaymi estudiayta qallarisqankumanta pacha qhawachini Diospa sutinta Bibliapi, makillataq kashani Jehová Diospa imayna kayninkunamanta yachachinaypaq”, nispa. Jesuspa ejemplonta rikuchiymi yanapawasun chayta ruwanapaq (Juan 1:14; 14:9). Diospa, Churinpa sumaq kayninkunapi estudiaqkuna yuyaymananankupaqqa, Enseña libroq sapanka capituloq tukuyninpi yuyarinapaq recuadrowanmi yanapasunman.
4. a) ¿Ima rayku wakin estudiaqkunapaq sasan predicayqa? b) ¿Imaynata yanapasunman estudiaqkunata predicayta qallarishaqtinku?
4 Ejemplonchiswan yachachisun: Yachachiq kayninchispi, pusaq kayninchispipas ruwayninchiskunawanmi Biblia estudiaqkunata yachachinanchis imachus Diospa ñanninta puriy kasqanta (1 Cor. 11:1). Qhawarisun; yaqa llapanku manchakunku iñisqankumanta mana reqsisqankunawan rimayta. Chay hinaqa, pacienciawan allin yuyaywan yachachinanchis, munakuspa, iñispa, mana manchakuspapas predicanankupaq, yachachinankupaqpas (2 Cor. 4:13; 1 Tes. 2:2). Estudiaqkunata pusay munasqanchismi sonqonchista kuyurichinqa, predicayta qallarishaqtinku paykunawan kuska predicanapaq.
5. ¿Imaynatan allin ejemplonchis estudiaqkunata yanapan, imachus Diospa kamachinkunata kasukuy kasqanta yachanankupaq?
5 Ejemplonchiswanqa yachachillanchistaqmi estudiaqkunata cristianoq kawsayninpi huk ruwaykunamantapas. Onqosqakunata waturikuqtinchis, huñunakuypi wayqe-pananchiskunata munakuywan napaykuqtinchispas rikunku munakuyninchista (Juan 15:12). Salón del Reino pichayta yanapaqtinchis, huk allin ruwaykunatapas ruwaqtinchismi yachanqaku yanapakuq kayta (Juan 13:12-15). Kapuqllanchiswan kawsasqanchista rikuspankun yachanqaku imachus ‘Diospa qhapaqsuyun otaq Reinon ñawpaqta maskhay kasqanta’ (Mat. 6:33).
6. ¿Imatan chaskisun Jehová Diosta servinankupaq llanp’u sonqokunata yanapasqanchismanta?
6 Anchatan kallpachakunanchis hukkuna Diospa Siminta yachanankupaq, Jesusta qatikunankupaqpas. Ichaqa kusikunchistaqmi llanp’u sonqokunaq “cheqaq-kaypi purisqanta” rikuspa (3 Juan 4).