Runakunaq sonqonta kuyurichisun Jehová Diospa sumaqllaña kayninkunata munakunankupaq
1 Predicaspaqa manan Bibliamanta qallariy yachachikuykunallatachu yachachinchis, aswanpas runakunata yanapanchis Jehová Diosta reqsinankupaq. Chaymantapas sonqonkuta kuyurichinchis sumaqllaña kayninkunata munakunankupaq. Allin sonqo runakuna Jehová Diosmanta cheqaqta yachaspankuqa, anchatan kallpachakunku ñawpa kawsayninkuta saqespa ‘[Jehová Diospa] kaqkuna hinapuni purinankupaq’ (Col. 1:9, 10; 3:9, 10).
2 Bibliata estudiachinapaq mosoq yachachina qelqa: Qallariymanta pachan Enseña libroqa allintapuni Jehová Diospa sumaq kayninkunata rikuchin. Ñawpaq kaq capitulonpi kay tapuykunata kutichin: ¿interesakunchu Dios qanpi?, ¿imayna Diostaq?, ¿asuykusunmanchu payman? Chaymantapas rikuchillantaqmi Jehová Diospa ch’uya kayninta (párr. 10); chanin kayninta, llakipayaq kayninta (párr. 11); munakuyninta (párr. 13); atiyninta (párr. 16), khuyapayakuq kayninta, sumaq sonqo kayninta, panpachakuq kayninta, pacienciayoq kayninta, cheqaq sonqo kaynintawan (párr. 19). Chay raykun 20 parrafopi nin: “Diosmanta astawan yachaspan reparanki cheqaq kasqanta, chaymi tanqasunki Diosta munakunaykipaq payman asuykunaykipaqpas”, nispa.
3 ¿Imaynatan Enseña librowan estudiachisqanchista yanapasunman Jehová Diosman asuykunanpaq? Sichus huk parrafopi Jehová Diospa imayna kasqanmanta rimakushanman chayqa, tapusunmanmi: “¿Imatataq kayri Jehová Diosmanta yachachisunki?” otaq “¿Imaynatan kay rikuchisunki Dios qanpi interesakusqanta?” nispa. Chay hinata tapuspanchisqa yachachishanchismi yachasqanpi yuyaymanananpaq, yanapashanchistaqmi Jehová Diospa sumaqllaña kayninkunata munakunanpaq.
4 Yuyarina recuadrota qhawachiy: Sapanka capitulota tukuspaykichisqa estudiachisqaykiman qhawachiy “Lo que la Biblia enseña” nisqa recuadrota, chaypi kaqkunamanta entiendesqanman hina rimananpaq. Rimarillaychistaq textokunamantapas. Estudiachisqayki sonqonmanta rimananpaqqa mayninpiqa tapuwaqmi: “¿Ima ninkitaq Bibliaq kay yachachisqanmanta?” nispa. Chayta ruwaspaqa manan capituloq allinninkunallatachu yuyarichinki, aswanpas reparankin estudiachisqaykiq imapipunichus creesqanta. Chhaynapin payqa Jehová Diosman asuykuyta qallarinqa.