¿Preparasqachu kashanki hatun ñak’ariykunapaq?
1. ¿Ima raykun ñawpaqmanta preparakushananchis hatun ñak’ariykunapaq?
1 Sapa watan millonninpi runakuna, wakin iñiqmasinchiskunapas ñak’arinku allpa chhaphchikuqtin, hatun muyuq wayrakuna kaqtin, lloqllakuna kaqtin, lamar-qocha lloqsiriqtin, hukkunapipas. Chay ñak’ariykunaqa qonqayllan chayamun, mayqenninchispas chay ñak’ariypi rikukusunmanmi, chay rayku ñawpaqmanta preparakunanchis (Pro. 21:5).
2. ¿Ima raykun umalliqkunaman willananchis direccionninchista, telefononchispa numerontapas?
2 Manaraq ñak’ariy chayamushaqtin: Mayninpiqa autoridadkunaqa willankun hatun ñak’ariykuna qayllaykamushasqanta. Chhayna kaqtinqa uyarikunanchismi (Pro. 22:3). Ancianokunapas chay willakuyta uyarispan llapa wayqe-panakunata maskhaspa yanapananku preparakunankupaq. Chay ñak’ariy qhepatataq ancianokunaqa llapa wayqe-panakunata maskhananku imayna kasqankuta yachanankupaq, ima necesitasqankupipas yanapanankupaq. Sichus umalliqkuna mana yachankumanchu wayqe-panakunaq direccionninta telefononpa numerontapas chayqa, askha tiempotan usuchinkuman. Chaymi publicadorkunaqa secretarioman, estudio de libro umalliqmanpas qonanku direccionninkuta telefononpa numerontapas.
3. Sichus tiyasqaykiman chayallan ñak’ariykuna chayqa, ¿imakunatan ruwanayki?
3 Tiyasqaykiman hatun ñak’ariykuna chayallan chayqa, ancianokunaman willanayki huk ladopi tiyaq familiaykikunaq sutinta, telefononkuq numerontapas, chhaynapin ima ñak’ariy kaqtinpas paykunawan rimanankupaq. Ahinapin ancianokuna tarinqaku wasinkumanta ayqekuq wayqe-panakunata. Ancianokunan ñawpaqmanta allichankuman ñak’ariy chayamuqtin imakuna ruwanata, yaqapaschá huk listata ruwankuman chay ñak’ariypi imakuna necesitakusqanmanta, hinaspapas allichananku llaqtamanta lloqsina kaqtin mayman lloqsinata imayna lloqsinatapas, allichanallankutaqmi onqosqakunata yuyaq wayqe-panakunata yanapanankupaqpas. Llapanchismi ancianokunaq allichasqanman hina ruwananchis (Heb. 13:17).
4. Tiyasqaykiman hatun ñak’ariy chayaqtin, ¿imatan ruwanayki?
4 Ñak’ariy pasasqan qhepata: ¿Imatan ruwanayki llaqtaykipi hatun ñak’ariy kaqtin? Makilla kashay familiaykiq ima necesitasqanpi yanapanaykipaq. Atisqaykiman hina hukkunatapas yanapay. Usqhaylla maskhay huñunakusqayki grupopi ancianota otaq huk ancianotapas. Kaytaqa ruwanayki allinña mana allinña kashaqtiykipas. Yanapana kaqtiykiqa yuyariy kayta: wayqe-panakunaqa tukuy atisqankuta ruwashanku yanapanasuykipaq (1 Cor. 13:4, 7). Jehová Diosqa qhawamushasunki, manan saqerparisunkichu (Sal. 37:39; 62:8). Makilla kashay espiritualpi yanapanaykipaq, llakisqakunatapas kallpachanaykipaq (2 Cor. 1:3, 4). Atisqaykiman hinataq usqhaylla espiritual ruwanaykikunata kaqmanta qallariy (Mat. 6:33).
5. ¿Imaynatan cristianokuna qhawarinchis hatun ñak’ariykunata?
5 Hatun ñak’ariykunan kay pachapi runakunata sinchita llakichishan, noqanchismi ichaqa yachanchis pisi tiempollamanta ñak’ariykuna chinkapunanta (Apo. 21:4). Chaykamaqa atisqanchisman hina preparakusun hatun ñak’ariykunapaq, tukuy sonqowantaq allin willakuykunata willashallasun.