Llapanchismi mosoqkunata yanapasunman Jesuspa yachachisqan kanankupaq
1 Jesuspa yachachisqan kaymanqa manan pipas chayanmanchu huk runaq yanapasqallanqa. Jehová Diosqa llapa ‘llank’aysiq-masinkunawanmi’ Biblia estudiaqkunata yanapan iñiyninkupi wiñanankupaq (1 Cor. 3:6-9). Sapankanchispas mosoqkunata yanapanchis manan huñunakuypi tapuykunata kutichispallachu, aswanmi yanapallanchistaq allin kawsayninchiswanpas, chhaynapin rikuchikunchis Jehová Diospa espiritun ñoqanchispi kasqanta (Juan 13:35; Gál. 5:22, 23; Efe. 4:22, 23). ¿Imakunatawanraqmi ruwasunman mosoqkunata yanapanapaq?
2 Llapanchis congregacionpi kaqkuna: Llapanchismi munakuyninchista rikuchina chayllaraq hamuqkunaman, chaypaqmi manaraq huñunakuy qallarishaqtin otaq huñunakuy tukuytapas paykunawan rimananchis. Chayllaraq huñunakuyman risqanta yuyarispa huk wiraqocha niran: “Huk p’unchayllapi aswan askha sumaq sonqo runakunata reqsirani ñawpaq iglesiaypi wawa kasqaymantapacha reqsisqay runakunamantaqa; manaña Jehová Diospa testigonkunata reqsiranichu chaypas, repararanin cheqaqtapuni munakuwasqankuta. Sut’itapuni repararani Jehová Diospa llaqtan tarisqayta”, nispa. Kay wiraqochaqa qanchis killa qhepallamanmi bautizakuran.
3 Bibliamanta estudiaqta kallpachashallaypuni iñiyninpi wiñasqanman hina. ¿Qatiykachaykunatachu aguantasharan? ¿Mana saqespachu huñunakuykunaman hamushan? ¿Kutichiranchu huñunakuypi huk tapuyllatapas? ¿Escuela del Ministerio Teocrático nisqamanchu haykurunña otaq ñoqanchiswan kuskañachu predicashan? Chhayna kaqtinqa niwaqmi: allintan espiritualpi wiñarishanki, nispa. Chhaynata nispaykiqa kallpachankin (Pro. 25:11).
4 Bibliamanta estudio qoqkuna: Wakin publicadorkunaqa wayqe-pananchiskunata pusarikunku estudiota qonankupaq, chhaynapi yanapanku estudiachisqanku runata wayqe-panakunawan reqsinakunankupaq. Qallariymantapacha Bibliamanta yachachisqaykikunata mink’ay huñunakuykunaman hamunankupaq. Huñunakuyman hamuqtintaq wayqe-pananchiskunaman reqsichiy. Bibliamanta yachachisqayki runa, ¿cigarro pitayta otaq chay hina viciokunata saqenanpaqchu kallpachakushan? ¿Pi familianpas hark’ashanchu Biblia estudiananta? Chhayna kaqtinqa maytachá yanapanman ñawpaqpi chhayna sasachakuykunata atipaq wayqe-panakunawan rimaqtinqa (1 Ped. 5:9).
5 Mosoqkunaqa necesitankun congregacionpa yanapananta. Sichus llapanchis mosoqkunapi interesakusun chayqa, yanapasunmi iñiyninkupi wiñanankupaq.