¿Ima suyakuymi kan wakchakunapaq?
1 Jesusqa anchatan khuyapayaran wakchakunata, chaymi yarqasqakunata mikhuchiran, onqosqakunatapas qhaliyachiran. Ichaqa, astawan wakchakunata yanaparan ‘Diosmanta allin willakuykunata willaspa’ (Mat. 11:5). Kay tiempopi allin willakuykuna willasqanchisqa yanapashanmi wakchakunatapas (Mat. 24:14; 28:19, 20).
2 Cheqaq suyakuy: Askha wakcha runakuna tukuy sonqomanta iglesiankupaq qolqeta qonku, umalliqninkuna: Chayta ruwaqtiykiqa aswan allinmi kanki, niqtinku. Biblian ichaqa nin: Wakcha kaytapas imaymana sasachakuykunatapas Diospa Reinollanmi chinkachinqa, nispa (Sal. 9:18; 145:16; Isa. 65:21-23). Bibliaq yachachisqanta runakunaman willaqtinchisqa cheqaq suyakuytan paykunaman qoshanchis, yanapashanchistaq Diosman asuykunankupaqpas (Mat. 5:3).
3 Fariseokunaqa sinchitan wakchakunata pisichaqku, suticharankutaq ‛am ha·’á·rets nispa, chayqa “común runakuna” ninantan nin. Jesusmi ichaqa ancha chaniyoqpaq qhawariran wakchakunaq kawsayninta (Sal. 72:13, 14). Jesús hina kanapaqqa wakchakunatan munakunanchis khuyapayananchistaq (Pro. 14:31). Manan hayk’aqpas pisichaq hina rimasunmanchu wakcha runakunamantaqa, nitaq wakcha kasqankuraykuchu manaña paykunaman predicasunman. Ama kayta qonqananchischu: Astawanqa wakchakunan Diospa llaqtanman haykumushanku Reinomanta allin willakuykunata uyarispa.
4 Yanapaytan chaskishanku: Pipas Bibliaq nisqanman hina kawsaqqa manañan nishutachu ñak’arinqa wakcha kayninwan. Ejemplopaq, Bibliaq kamachisqanta kasukuqtinqa manañan qolqenta tukunqachu machaykunapi, qolqepaq pukllaykunapi, cigarro pitaypi, hukkunapipas, manataqmi qellapaschu kanqa (Pro. 6:10, 11; 23:21; 2 Cor. 7:1; Efe. 5:5). Chaymantapas, Bibliaqa kamachinmi tukuy imaymanapi allintapuni purinapaq, “tukuy sonqowan” llank’anapaqpas; chhayna llank’aqqa maypipas khuyay munasqan (Col. 3:22, 23; Heb. 13:18). Askha patronkunata tapuspa kayta yachakun: patronkunaqa astawan contratayta munanku allin llank’aq honrado runakunallata.
5 Jehová Diosqa sinchitan llakikun wakchakunaq ñak’arisqanta qhawaspa. Chaymi, pisi tiempollamanta Churin Jesucristo ‘waqyakuq wakchata qespichinqa’ (Sal. 72:12). Chaykamaqa, Bibliaq sumaq willakuyninkunata willaspa llapa runakunaman wakchakunamanpas suyakuyta qoshallasun.