Llakisqa sonqoyoqkunata kusirichisun
1 Runakunaqa manan hayk’aqpas kay tiempopi hina kusirichinata necesitarankuchu. Chayrayku Kamachikuq Jesucristota qatikuqkunaqa anchata kallpachakunchis ‘llakisqa sonqoyoqkunata kusirichinapaq [otaq sonqochanapaq]’ (Isa. 61:1).
2 Imaynata sonqochana: Runakunata sonqochanapaqqa allin yuyaywanmi predicananchis kallpachanapaq hinataq. Bibliapi tarikuq cheqaq kaymanta Diospa sumaq promesankunamantawanmi astawanqa willananchis, chaymi pisillata rimananchis millay kawsaymanta pantasqa yachachikuykunamantapas. Ichaqa manan chayraykuchu manaña Armagedonmanta rimasun. Jehová Diosmi kamachiwanchis ‘khuyapayanan p’unchay chayamusqanmanta willanapaq, awqanchiskunaman paypa ayni-kutichinan p’unchay hamunantawan willanapaq’. Ichaqa manan Armagedonllamantachu rimananchis, aswanpas ‘Qhapaqsuyumanta [Reinomanta] allin willakuykunatan’ astawanqa willananchis (Isa. 61:2; Eze. 3:18; Mat. 24:14).
3 Wasin-wasinta: Askha runakunan llakikunku onqosqankumanta, munakusqanku runaq wañusqanmanta, mana chanin kaymanta, qolqe pisichikuymantawan. Chayrayku Diospa kamachinkunaqa predicasqanku runakunata khuyapayananku, imaynan Cristopas llakisqa warmita ‘khuyapayaran’ hinata (Luc. 7:13; Rom. 12:15). Huk otaq iskay textotaña leepunki sasachakuypi tarikuq runakunaman chaypas, ‘usqhaylla uyariqmi kanayki’ imayna sientekusqanta yachanaykipaq (Sant. 1:19). Chhaynapin yachanki imayna sonqochayta.
4 Reparasqaykiman hinataq kayta niwaq: “Kay sumaq kallpachaq simikunata Bibliamanta leeripusqayki”, nispa. Allin yuyaywanmi runakunata uyarinanchis manan sapa pantasqankumantachu ninanchis manan chhaynachu nispaqa. Aswanpas, llakisqa sonqoyoqkunataqa Bibliawanmi kallpachananchis, sonqochananchispas. Razonamiento a partir de las Escrituras nisqa qelqapin allin yanapaykunata tarinki, “Estímulo” nisqa temapi, 144-148 paginakunapi. Chaymantapas saqellawaqtaqmi Consuelo para los deprimidos nisqa tratadota chay runawan kuska t’aqwinaykipaq.
5 Maskhashallay llakisqa sonqoyoqkunata: ¿Kashanmanchu pillapas familiaykipi otaq wasimasiyki, llank’aqmasiyki, escuelapi yachaqmasiykipas sonqochanapaq hina? ¿Watukuwaqchu chay runakunata Bibliawan kallpachanaykipaq? Imamantachus llakikusqankuta reparanki chayqa yachankin imayna sonqochayta. Wakin wayqe pananchiskunan cartata qelqanku otaq telefonomanta waqyanku. Imaynaña kaqtinpas, runamasinchista munakuymi kallpachawasun khuyapayakuq kananchispaq, Bibliawan sonqochananchispaqpas (Luc. 10:25-37).
6 Predicaspaqa llakisqa sonqoyoq runakunatawanmi kallpachananchis, mana suyakuyniyoqkunamanpas sumaq suyakuyta willananchis. Chaytapunin llapa runakunaqa necesitanku. Ñoqanchismi allin sonqoyoq runakunataqa sonqochasun sumaq suyakuytapas qosunchis kusikuywan Diospa promesankunamanta willaspa. Yuyarisunpuni llakisqa sonqoyoqkunata kusirichinapaq.