Tapuykuna

◼ ¿Imakunamantan casarakuy munaqkuna rimananku umalliqkunawan Huñunakuna Wasipi discursota chaskiyta munaspa?

Casarakuy munaqkuna Huñunakuna Wasipi discursota chaskiyta munan chayqa, Bibliaq nisqanman hinan imatapas ruwananku, chhaynapin Jehová Diosta hatunchanqaku. Chaymantapas chay Huñunakuna Wasipi imakuna ruwakusqanmi rikuchinqa Diospa llaqtan imayna kasqanta. Chayraykun umalliqkunaqa casarakuy munaqkunawan rimananku imakunatachus ruwakunqa chayta, chhaynapin “tukuy imatapas chaninninpi ruwa[kunqa], maychus ruwanaman hinapuni” (1 Cor. 14:40).

Chay casarakuy munaqkunaqa ñawpaqmantapachan huk cartata apachinanku comité de servicio nisqa umallikunaman. Chaytaqa mayqen iñiq t’aqapi comité de servicio nisqa umallikunamanpas apachikunmanmi. Chay cartapin willananku ima p’unchaychus ima horatachus chay discurso aparikunanta. Umalliqkunan ichaqa mana cambianqakuchu huñunakunanku horata. Chaymantapas casarakuy munaq warmi qharikunaqa Jehová Diospa kamachikusqanman hinan kawsashananku.

Diospa munasqanman hina imapas ruwakunanpaqqa comité de servicio nisqa umalliqkunamanmi casarakuy munaqkunaqa willananku imakunatachus ruwanqaku chayta. Umalliqkunan ichaqa mana munasqankuman hinachu imatapas kamachinqaku. Ichaqa, imapas mana allinta ruwakushan chayqa, willanankun casarakuy munaqkunaman, paykunataq kasukunanku umalliqkunaq nisqanta. ¿Ima takikunatan uyarikunan chay p’unchaypi Huñunakuna Wasipi kashaspa? Chaypiqa uyarikunan Kingdom Melodies (Melodías del reino) nisqa discokunallatan otaq takinchiskunamanta horqosqa takikunallata. Chaymantapas allintan qhawarinanku imayna allichasqachus kashan Huñunakuna Wasipi tiyanakuna t’ikakunapas chayta. Sichus fotokunata horqonqaku video nisqatapas grabanqaku chayqa, allin respetowanmi chaykunataqa ruwananku. Mana ima huñunakuypas kanqachu Huñunakuna Wasipi chayqa, yaqapaschá ensayakunman imaynatachus chay aparikunanmanta. Casarakuy munaqkunaqa manan imatapas k’askachinankuchu willakuykunata k’askachina tablapiqa. Ichaqa willakunmanmi casarakuy kasqanmanta Runaman Diosmanta yachachinapaq huñunakuypi, chhaynapi wakin cristianomasikunapas yachanankupaq.

Sichus casarakuqta pipas makinmanta hap’iykuspa Huñunakuna Wasi ukhuman pusayunqa chayqa, manan bautizasqa runallachu chaytaqa ruwanan, pipas chaytaqa ruwanmanmi. Ichaqa manan millay runamantachu reqsisqa kanan, nitaqmi Diospa kamachikuynin contrapi kawsaqchu kanan. Casarakuykunapi discursota ruwanankupaqqa umalliqkunan allin preparasqa kashanku, paykunan churasqa kashanku Diospa siminmanta yachachinankupaqqa. Chaymi huk umalliq kaqtinqa pay casarakuqkunapaq discursotaqa ruwanan (1 Tim. 3:2).

Discurso qoq umalliqpas allintan yachanan casarakuqkuna imakunatachus chay p’unchaypi ruwanqaku chayta. Chaymantapas chay umalliqqa paykunawanmi huñukunan, chaypitaq rimananku reqsinakushaspanku Diospa munasqanman hinachus kawsaranku icha manachus chaymanta; paykunaqa sut’itan willakunanku mana imata pakaspa. Sichus mayqenninkupas ñawpaqpi casarasqaña karan chayqa allintan rikuchinan hukmanta casarakunanpaq libre kasqanta (Mat. 19:9). Chaypaqqa rikuchinanmi umalliqman t’aqanakapusqan documentota.

Casarakuy munaqkuna umallikunaman sut’inta imatapas willakunqaku chayqa, llapallankupaqmi casarakuy p’unchayqa kusikuy p’unchay kanqa (Pro. 15:22; Heb. 13:17).