Jehová Dios kamachikushaqtinqa lliupas kusisqan kausaranku

¿Imaraykun necesitanchis Diospa gobiernonta?

Qallariypiqa kamaqninchis Jehová Diosllan kamachikuq karan, payqa munakuywanmi kamachikuran. Munakuq kasqanraykun Edén huertata ruwaran, chaypiqa askhan mijuykunaqa karan, chay huertamanmi runakunata churaran. Chaymantapas juj sumaq llank’aytan paykunaman qoran (Génesis 1:28, 29; 2:8, 15). Jehová Diosta kasukunkuman karan chayqa thajpichá kausashasunman karan.

Adanmi jap’ishan Evaq qosqan mana mijunan frutata — Adanwan Evawanqa manan Diosta kasukurankuchu

Biblian willan juj ángel Diospa autoridadninta mana respetasqanta, paymi karan Satanás. Satanasqa niranmi: ‘Dios jinan allinkaqta mana allinkaqta reqsiq kankichis’, nispa. Chaywanmi nisharan runakunaqa kusisqan kankuman Diosta mana kasukuspaqa. Satanaspa chay nisqantan Adanwan Evawanqa kasukuranku (Génesis 3:1-6; Apocalipsis 12:9).

Adanwan Evawanqa Jehová Diosta mana kasukusqankurayku Edén huertamanta wijch’uchikapuranku, chhaynapitaq wiñay kausayta chinkachipuranku, imaymana onqoykunapitaq tarikurankupas (Génesis 3:17-19). Mana kasukusqankuraykun wawankupas mana allinkunapi tarikullarankutaq. Bibliaq nisqan jina “juj runallawanmi juchaqa kay pachapi rijuriran, wañuytaq jucharayku rijuriran” (Romanos 5:12). Jucharaykun juj mana allinkunapas rijurimullarantaq. Biblian nin: ‘Runaqa runamasinta mana allinta ruwananpaqmi munaychakun’, nispa (Eclesiastés 8:9). ¿Ima ninantaq chayri? “Runakunalla kamachinakuspaqa manan allinqa kankumanchu” ninantan nin.

RUNAQ KAMACHIKUYNIN QALLARIN

Nemrod jatunchakuspa sayashan. Qhepanpitaq askha runakuna torreta sayarichishanku — Nemrodqa Jehová Dios contran jatariran

Bibliaq willasqanman jinaqa ñaupaq kaq kamachiqqa Nemrodmi karan, payqa Dios contran jatariran. Chaymantapachan askha kamachikuqkuna runakunata sufrichiranku. Kinsa waranqa watakuna ñaupaqta jinan rey Salomón niran: ‘Rikullaranitaqmi kay pachapi tukuy sarunchaykunatapas. Ñak’arishaqkunan waqasharanku, manataq pipas paykunata sonqochaykuq karanchu, muchuchiqninkuqa atiyniyoqmi kasharanku’, nispa (Eclesiastés 4:1).

Kunan tiempopas kaqllataqmi kashan. 2009 watapin Naciones Unidas nisqa organizacionmanta juj willakuy lloqsimuran, chaypin nin: “Askha runakunan piensanku gobiernokunaq kausanpin kay pachapi imaymana llakikuykuna kashan”, nispa.

CHAYQA CAMBIANQAN

Kay pachapiqa allin gobiernon necesitakun, chaytaqa Diosnillanchismi apamunqa.

Runaq kamachisqan pachapi askha fotokuna: 1) juj warmi qhelli callepi wawanta jap’iyukuspa waqashan; 2) kuraq runa hospitalpi onqosqa kashan; 3) soldadokunan armankuwan guerrapi t’ojachikushanku; 4) huelga ruwaqkunan phiñasqa pancartantin purishanku; 5) juj warmi ususintin wasinkuta chayaspa rikunku punkuq ventanan p’akisqa kashaqta; 6) jatun q’osñi llaqtapi chimeneakuna, luzmanta cablekuna ima rikukushan — Manan mayqen gobiernopas runakunaq ñak’ariynintaqa tukuchiyta atinkuchu

Diosmi juj gobiernota paqarichin chay gobiernon llapa gobiernokunata “ñut’uspa tukunqa, wiñaypaqtaq kanqapas” (Daniel 2:44). Chay gobiernotan millonninpi runakuna mañakunku yayayku mañakuypi (Mateo 6:9, 10). Chay gobiernopiqa manan Dioschu kamachimunqa, aswanpas jujtan churaran kamachinanpaq. ¿Pitan ajllaran?