Diosta munakusqanchisraykun predicanchis
1. ¿Imatan Jesús ruwaran Diosta munakusqanrayku?
1 Jesusqa Diosta munakusqanraykun kay pachapi predicaran, tukuy imaymanatapas ruwaran, chaymi pay kikin niran: “Kay pacha runakuna[n] yachanqa Yayata munakusqayta, paypa kamachiwasqanta ruwasqaytapas”, nispa (Juan 14:31). Ñoqanchispas pay hinallataqmi predicaspa rikuchinchis Dios munakusqanchista. ¡Ima munaymi chayta ruwayqa! (Mat. 22:37; Efe. 5:1, 2.)
2. ¿Imatan ruwananchis Diosta munakusqanchisrayku?
2 “Sutiyki yupaychasqa kachun”: Jehová Diosta munakusqanchisraykun maypiña tarikuspapas predicashanallanchis paymanta Gobiernonmantawan, chhaynapin yanapakusun sutin yupaychasqa kananpaq (Sal. 83:18; Eze. 36:23; Mat. 6:9). Jesús hinan ñoqanchispas munanchis Jehová Diospa sutin yupaychasqa kananta, munaynin ruwakunantapas; chay munasqanchistan rikuchinanchis predicayninchiswan (Mat. 26:39).
3. ¿Iman yanapawasun sasachakuykunata atipanapaq?
3 Diosta munakusqanchisraykun sasachakuykunata atipanchis: Jehová Diosta munakusun chayqa manan imapas predicayninchispi pisipachiwasunchu (1 Cor. 13:4, 7). Jesusqa imaymana sasachakuypiña tarikuran chaypas, manan pisiparanchu predicayninpi. ¿Imarayku? Jehová Diosta tukuy sonqo munakusqanrayku, paypa kamachisqanta ruway munasqanraykupiwan (Juan 7:5; 1 Ped. 2:18-23). Ñoqanchispas Diosta munakusqanchisraykun ima sasachakuytapas aguantasun. Chaypaqmi tukuy yuyaywan Jesuspa ruwasqanta qatikunanchis, chhaynapin predicayninchista mana pisipaspa hunt’asun. Mayninpin ichaqa mana iñiq familianchis hark’awasqanchisrayku, onqosqanchisrayku, sinchi kuraqña kasqanchisrayku otaq predicasqanchista mana uyariyta munasqankurayku sinchi llakisqa tarikusunman; chhaynaña kaqtinpas, Jehová Diosta munakusqanchisraykun tukuy atisqanchista ruwasun predicashanallanchispaq.
4. ¿Ima ruwaytan atinchis Diosta munakuqkuna?
4 Diosta tukuy sonqo munakusun chayqa manan pisipasunchu. ¡Ima munaymi predicaspa chay munakuyta rikuchiyqa! Llapanchismi chay ruwayta atinchis (1 Cor. 13:13). Chay hinaqa, ñataq Diospa sutin wiñaypaq yupaychasqa kanan tiempo chayamushanña chayqa, kallpachakusun ‘munakuyninchis aswan-aswantaraq wiñananpaq’ (Fili. 1:9; Mat. 22:36-38).