Sapa p’unchay Jehová Diosta hatunchasun
1. ¿Ima ruwanapaqmi kallpachakuna? ¿Imaraykun chayta ruwana?
1 Rey Davidmi Jehová Diosta niran: ‘Sapa p’unchaymi hatunchasqayki’, nispa (Sal. 145:2, 7, 21). Ñoqanchispas sapa p’unchaymi Jehová Diosta hatunchananchis (Sal. 37:10; 145:14, 18; 2 Ped. 3:13).
2. ¿Imaynatan sapa p’unchay familiapi Jehová Diosta hatunchasunman?
2 Familiapi: Familiawan kuska Bibliata estudianapaq, sapa p’unchaypaq textokuna leenanchispaq, huñunakuypaq preparakunanchispaqpas askha qelqakunan kan; chaykunan yanapawanchis familiawan kuska iñiyninchismanta sumaqta rimananchispaq. Askha familiakunan p’unchaypi huk kutillatapas familiankuwan kuska mikhunku, chhaynapi sumaqta parlarispa Diosta hatunchanankupaq. Chhayna sumaq rimanakuy familiapi kananpaqqa tayta mamakunan astawan kallpachakunanku, chaymi yanapanqa wawankuwan sumaqta ‘kasuchikuspa’ Jehová Diosmanta yachachinankupaq (Efe. 6:4; Deu. 6:5-7).
3. ¿Imatan ruwasunman iñiqmasinchiskunawan kuska kashaqtinchis?
3 Iñiqmasinchiskunawan: Predicacionpi, huñunakuykunapipas iñiqmasinchiskunawan kuskan Jehová Diosta hatunchasunman (Pro. 15:30; Fili. 4:8; Heb. 13:15). Paytataq llapanchispas munakunchis chayqa, sapa kutillan parlananchis sumaq kasqanmanta (Sal. 106:1).
4. Maypiña kashaspapas, ¿imaynatan Jehová Diosta hatunchasunman?
4 Mana iñiq runakunawan kashaspa: Manaña sapa p’unchay wasin wasinta predicanchischu chaypas, atisunmanmi llank’aqmasinchiskunaman, compañeronchiskunaman, otaq mayqen reqsisqanchismanpas Diospa munayninmanta pisillatapas willayta, chhaynapi paykunapas suyakuyniyoq kanankupaq (Sal. 27:14; 1 Ped. 3:15). Huk hermanamanta yachasunchis. Paysi avionpi viajashaspa ladonpi tiyaq señoraman predicasqa, chaysi chay señoraqa anchata kusikuspa hermanaman willasqa sutinta maypi tiyasqantawan, chhaynapi hukpi rimanashallankupaq. Kay pachapi sasachakuykuna astawan yapakushaqtinpas, Jehová Diospa llaqtanqa “allin willakuykunatan” willashallan lliw uyariy munaqkunaman. Chay willakuykunan runakunaman suyakuyta qon, kallpachantaqmi Jehová Diosta hatunchanankupaq (Isa. 52:7; Rom. 15:11).
5. ¿Imaraykun Jehová Diosta hatunchananchis? ¿Pikunatan chaywan yanapashanchis?
5 ¡Maytachá Jehová Diosqa kusikun serviqninkuna sapa p’unchay hatunchasqankumanta! Imaynan tukuy ima kamasqakunapas sapa p’unchay Diospa qhapaq-atiyninmanta sut’ita willan, chhaynallatataqmi ñoqanchispas wasinchispi kaspa, huñunakuykunapi, maypiña kashaspapas Jehová Diosta hatunchananchis, chhaynapin manaraq Diosta serviqkunata yanapashanchis ñoqanchiswan kuska servinankupaq (Sal. 19:1-4).