¿Imaynatan tapuykunata kutichina?
1. ¿Imaraykun Jesús hina kutichinanchis tapuwaqninchiskunaman?
1 Jesusqa allintapunin kutichiq runakunaq tapukusqanta, chaytan kunankamapas lliw runakuna yuyarinku. Ñoqanchispas Jesús hinan kutichinanchis predicasqanchis runakuna imatapas tapuwaqtinchisqa (1 Ped. 2:21).
2. ¿Imaynatan yachasunman imayna kutichiyta?
2 Uyariqmi kananchis: Jesusqa repararqanmi imaraykus runakuna imatapas tapukusqanta. Chhaynallataqmi ñoqanchispas imarayku tapuwashanchis chayta yachanapaqqa yaqapaschá huk tapuykunata tapunanchis kanqa. Yaqapaschá pipas tapuwasunman: “¿Jesuspi iñinkichischu?” nispa; ichaqa chay runa yachaytapaschá munashan imarayku mana Navidadta festejanchischu chayta. Sichus yachasunchis chay runa imamanta yachay munasqanta chayqa, atisunmi paykunawan tapunakuspa rimayta (Luc. 10:25-37).
3. ¿Maypin tarisunman Bibliamanta tapuykunapaq allin kutichiyta?
3 Bibliawan kutichisun: Bibliawanpuni tapuykunata kutichiymi aswan allinqa (2 Tim. 3:16, 17; Heb. 4:12). Razonamiento libropas yanapawasunmanmi tapuykunaq kutichiyninta tarinapaq. Wakin runakunan ichaqa, Bibliata mana Diospa Siminta hinachu qhawarinku, chaywanpas sumaqllatan qhawachisunman Bibliaq nisqanta. Chaymantataq niwaq Bibliapi kaq yachachikuykuna ñawpaq tiempomantaraq ancha allinpuni kasqanpi yuyaymanananpaq. Jesús hina ruwasunchis chayqa, “qolqepi ch’olqochisqa qori manzana hinan” kanqa kutichiyninchis, allin tupasqa, uyarinanpaq hina (Pro. 25:11).
4. ¿Imaraykun mana llapa tapuwaqninchiskunaman kutichinachu?
4 ¿Llapa tapuykunatachu kutichinanchis? Sichus mana yachankichu huk tapukuypa kutichiyninta chayqa, sut’illantan niwaq: “Manan yachanichu, ichaqa maskhamuymanmi hinaspa kutimuspa kutichiykiman tapukuyniykita”, nispa. Chhaynapin paypi interesakusqaykita reparaspa yaqapaschá wakmanta kutinaykita munanman. Sichus chay runa mana uyariyta munanchu aswanpas hap’inakuyllata munan chayqa, amaña astawanqa paywan rimaychu; chaytan Jesuspas ruwarqan (Luc. 20:1-8). Wakinqa manaña Diosmanta yachayta munankuchu chaypas, imapipas pantachiwananchisraykun ñoqanchiswan rimayta munanku. Chhayna runakunawan tupaspaqa sumaqllatan pasapuna, hinaspa Diosmanta yachay munaqkunata maskhana (Mat. 7:6).
5. ¿Imatan Jesusmanta yachanchis tapuykunata kutichinapaq?
5 Jesusqa yacharqanmi “cheqaq-kaymanta” willananpaq, runakunaq tapuynin kutichinanpaqpas Jehová Diospa yanapayninta necesitasqanta (Juan 18:37). Jesusqa allintapunin yachachiwanchis ‘wiñay kawsaypaq sonqoyoq’ runakunaq tapukuyninta kutichinapaq (Hech. 13:48, NM).