‘Kikin kawsayniykita qoy’ estudianteykiman
1. ¿Imatan ruwana estudiantekunata yanapanapaq?
1 Biblia estudiaqta bautizakunankama yanapanapaqqa manan yachachiyllachu yachachina, aswanmi ‘kikin kawsayninchistawan qonanchis’, chhaynapin paykuna iñiyninkupi wiñarinqaku (1 Tes. 2:7-9). Apóstol Pablopas chaytan ruwaq, chaymi mosoq cristianokunata nirqan: ‘Anchatapunin munakuykichis, imaynan mamaqa ñuñuq wawanta sumaqta uywan hinata’, nispa.
2. ¿Imanaqtinmi sapanka estudiantepi interesakuna? ¿Imaynatan chayta ruwasunman?
2 Sapankamantan interesakuna: Bibliamanta yachasqankuman hina ruwaspankun estudiantekunaqa manaña munankuchu mana allin runakunawan puriysikuyta (1 Ped. 4:4). Familiankupas manañapaschá sumaqtachu rikunqa (Mat. 10:34-36). Chaymi sapallanku rikukapunkuman. ¿Imaynatan yanapasunman? Munakuywan paykunapi interesakuspanchis. Experienciayoq misioneron nin: “Estudio qoyta tukuspaqa manan phawayllachu ripuna. Aswanmi qheparispa rimapayana huk ratullapas”, nispa. Chaymantapas allin reparaqmi kana, yanapanatapaschá necesitashanku. Sichus onqosqa kashan chayqa, waqyasunmanmi telefonopi otaq visitasunmanpas. Huñunakuypipas paykunawan kuskan tiyasunman, yanapasunmantaq wawankunata qhawaspa.
3. ¿Imatan ruwasunman estudiantekunata kallpachanapaq?
3 Iñiqmasikunapas yanapankumanmi: Predicasqayki p’unchay estudianteykiq wasin cercapi kashanki chayqa, huk ratulla visitaspayki reqsichiy predicaqmasiykikunata. Estudio qonayki p’unchaypas pusakuy huk-huk predicaqkunata, umallikunatapas pusawaqmi. Estudiota qallarinkiña chayqa, invitay huñunakuyman hamunanpaq. Chaypin iñiqmasinchiskuna kallpachanqa sumaq qhawarisqankuwan, familian hinataq kapunkuman (Mar. 10:29, 30; Heb. 10:24, 25).
4. ¿Ima premion kan kallpachakusqanchismanta?
4 Imaynan mana sayk’uspa wawankuta yanapaq tayta-mamakunapas anchata kusikunku wawanku Diosta serviqtin, chhaynallataqmi ñoqanchispas kusikusunchis estudiantekuna Diosta serviqtinku, chayraykun paykunaman ‘kawsayninchista qonanchis’ (3 Juan 4).