‘Khuyapayakuqpuni’ kasun

1. ¿Imatan runakuna usqhaylla necesitashanku?

¹ Manan hayk’aqpas sinchi askha runakunaqa yanapayta mañakurqankuchu. Kay pachapi sinchi sasachakuykuna kasqanraykun, tukuyneqpi runakuna llakiq ñit’isqan, mana suyakuyniyoq tarikunku. Arí, millonninpi runakunan yanapanata necesitashanku, chaytaqa llapa cristianokunan reparanchis. Paykunata khuyapayakuywan yanapayqa makinchispin kashan (Mat. 22:39; Gál. 6:10). ¿Imaynatan chay runakunapi interesakusqanchista rikuchisunman?

2. ¿Imaynatan rikuchisunman khuyapayakuq kasqanchista?

² Predicanapaqqa khuyapayakuymi kallpachawanchis. Diosllan cheqaq sonqochaqqa (2 Cor. 1:3, 4). Jehová Diosmi munan ñoqanchispas pay hina khuyapayakuq kananchista, kamachiwanchistaq allin willakuykunata runakunaman willanapaq (1 Ped. 3:8). Tukuy atisqanchista predicaspan “llakisqa sonqoyoqkunata” allinta sonqochasun. Diospa gobiernollanmi imaymana ñak’ariykunata tukuchinqa (Isa. 61:1). Jehová Diosqa serviqninkunata khuyapayaspan tukuchinqaña ñak’ariyta, sumaq kawsaytataq apamunqa (2 Ped. 3:13).

3. ¿Imaynatan Jesús hina runakunata qhawarisunman?

³ Jesús hinan runakunata qhawarinanchis. Askha runakunataña Jesús yachachiq chaypas, sapankankutan chaniyoqpaq qhawarirqan. Payqa allintan yacharqan sapanka runa Diosta reqsiy munasqankuta, chaymi pacienciawan yachachirqan. Mana michiqniyoq ovejakunata hinan Jesusqa runakunata qhawariq (Mar. 6:34). Sichus Jesuspa ruwasqanta hina ruwasun chayqa, khuyapayakuywanmi runakunata yachachisun, chaytaqa imayna kunkawan rimasqanchispi uyanchispi iman rikuchisun. Hinallataq predicayninchista ñawpaqman churaspa, runakunaq imayna tarikusqankuman hina predicaspapas (1 Cor. 9:19-23).

4. ¿Imaraykun “khuyapayakuq-kaywan” p’achawan hina p’achakunanchis?

⁴ Llapa nacionkunamantan waranqanpi runakuna sumaqta chaskikushanku Diospa Reinonmanta allin willakuykunata, paykunapi interesakusqanchistapas. “Khuyapayakuq-kaywan” p’achawan hina p’achakusun chayqa, khuyapayakuq Diosninchistan hatunchasun kusichisun ima (Col. 3:12).