Jehová Diosmi yachachiwanchis predicayninchista hunt’anapaq
1. ¿Imatan ñawpaqta Jehová Dios ruwan imatapas kamachiwaspanchis?
1 Jehová Dios serviqninkunata imatapas kamachispaqa yachachinmi imayna ruwanankuta. Noetan kamachirqan arcata ruwananpaq, manan kamachiy-kamachiyllachu kamachirqan aswanpas yachachirqanmi imayna ruwananta (Gén. 6:14-16). Ovejata michiq Moisestapas kamachirqanmi Faraonman Israelpi umallikunamanpas rinanpaq, kay simikunawantaq kallpacharqan: “Rillay, ñoqan rimachisqayki, imatachus rimanaykitan yachachisqayki”, nispa (Éxo. 4:12). Kunanpas Jehová Diosqa manan kamachiyllachu-kamachiwanchis allin willakuykunata willananchispaq. Aswanpas ñawpaqtan yachachiwanchis Bibliamanta Allin Yachachiq Kanapaq Escuelawan, Predicayta Yachanapaq Huñunakuywanpas. ¿Imaynatan ñoqanchis hap’ikusunman chay allin yachachikuykunata?
2. ¿Imatan ruwana Bibliamanta Allin Yachachiq Kanapaq Escuela yanapawananchispaq?
2 Bibliamanta Allin Yachachiq Kanapaq Escuela. Allin yachachiq kanaykipaqqa ñawpaqtan sapa huñunakuypaq allinta preparakunayki, Escuelapi discurso qoqkunatapas makillan uyarinayki (Pro. 27:17). Sapa huñunakuypaqtaq Benefíciese libroykita apanayki tarea ruwana cuadernoykita hina. Escuelapi umalliq, discurso qoqta yuyaychaqtinqa libroykipi qhawariy ima paginamanta yuyaychasqanta, allin yuyaychasqantataq qelqay chayman hina ruwanaykipaq. Ichaqa allinyanaykipaqqa qanpunin discursota qonayki. ¿Ñachu Escuelapiña kashanki? Discursoyki tupasuqtiykiqa allinta preparakuy libroq nisqanman hina ruwanaykipaq, yachasqaykiman hinataq predicanayki.
3. ¿Imatan ruwananchis Predicayta Yachanapaq Huñunakuy allinninchispaq kananpaq?
3 Predicayta Yachanapaq Huñunakuy. Chay huñunakuypi yachachikuykuna sonqoykiman chayananpaqqa, ñawpaqtan estudianayki preparakunaykitaq tapuykunata kutichinaykipaq. Pisillapi kutichisun chayqa hukkunapas kutichinqakun. Sichus demostracionkuna ruwasqankuta makilla qhawanki, nisqankutataq kasukunki chayqa sumaqtan predicanki. Hinaspapas Diosmanta Willasunchis qelqakunapi yanapakuykuna kaqtinqa alayrillapi waqaychay.
4. ¿Imaraykun Jehová Diospa yachachiwasqanchisman hina imatapas ruwananchis?
4 Imaynan Noepaqpas Moisespaqpas sasa karqan Jehová Diospa kamachisqanta hunt’ay, ñoqanchispaqpas pachantinpi allin willakuykuna willayqa sasa hunt’aymi (Mat. 24:14). Ichaqa Jehová Diosmi yachachiwaqninchisqa, sichus paypi confiasun yachachiwasqanchisman hinataq imatapas ruwasun chayqa, hunt’asunpunin kamachiwasqanchista (Isa. 30:20).