¿Iman necesitakun allin yachachiq kanapaq?
1. ¿Imaynan kanan Bibliamanta allin yachachiq?
1 ¿Imaynan kanan Bibliamanta allin yachachiq? ¿Allin estudioyoq runachu? ¿Askha watakunañachu yachachiq kanan? ¿Chayta ruwananpaq hinachu kanan? Manan. Aswanpas munakuqmi kanan. Munakuyqa Diospa llapa kamachikuyninkunapin hunt’akun, Jesuspa qatikuqninkunapas munakuq kasqankupin reqsichikunku hinaspapas munakuyqa Jehová Diospa sumaq kayninmi (Juan 13:35; Gál. 5:14; 1 Juan 4:8). Chhaynaqa, allin yachachiq kanapaqqa munakuyninchistan rikuchinanchis.
2. ¿Imaraykun runakunata munakunanchis?
2 Runakunata munakuy. Allin Yachachiq Jesusqa runakunatan anchata munakuq, chaymi uyariqku (Luc. 5:12, 13; Juan 13:1; 15:13). Sichus runamasinchista munakusun chayqa, maypi tarikuspapas predicasunpunin. Qatiykachasqaña kasun, mana uyariqmanña tukunqaku chaypas manan upallakusunchu. Tukuy yuyaywanmi uyarisun predicasqanchis runakunata necesitasqankuman hinataq predicasunpas. Hinaspapas tiemponchistan t’aqasun estudio qonapaq sapakutin yachachinapaq preparakunanchispaqpas.
3. ¿Imaynatan Bibliaq yachachikuyninta munakusqanchis yanapawasun predicananchispaq?
3 Bibliaq yachachikuyninkunata munakuy. Jesuspas anchatan Bibliaq yachachikuyninkunataqa munakuq, chaymi ancha valorniyoq kaqkunawan rikch’anachirqan (Mat. 13:52). Sichus Diospa yachachikuyninkunata anchata munakusun chayqa, tukuy sonqomantan predicasun chaymi uyariwaqninchiskunapas kaqllatataq kutichiwasun. Mana atisqanchispi yuyaykunamantaqa munakuymi yanapawasun mana manchakuspa allinta predicanapaq.
4. ¿Imatan ruwananchis munakuyninchis yapakunanpaq?
4 ¿Imaynatan munakuyninchis yapakunman? Sichus runakunaq llakisqa kawsasqankupi yuyaykusun chayqa, khuyapayaspan munakusun, Jehová Diospa munakuyninpi, Churinpa munakuyninpi yuyaymanaypas yanapawallasuntaqmi (Mar. 6:34; 1 Juan 4:10, 11). Hinaspapas sapakutin Bibliata estudiaspa yuyaymanaspa iman astawan Bibliaq nisqanta munakusun. Munakuyqa santo espirituq rurunpa huk sumaq kayninmi (Gál. 5:22). Chhaynaqa, munakuyninchis yapakunanpaqqa Jehová Diostan rogakunanchis santo espirituntataq mañakunanchis yanapawananchispaq (Luc. 11:13; 1 Juan 5:14). Estudioyoqña kanchis, askha watakunaña yachachiq kanchis, chayta ruwanapaq hinaña kanchis otaq manaña chaypas, llapallanchismi atisunman allin yachachiq kayta sichus munakuq kasun chayqa.