Conciencianchista waqaychasun

1. ¿Iman 2013 watapi huk p’unchay huñunakuyninchispaq tema, imapin yanapawasun?

¹ Sapa p’unchaymi imaymana ruwaykuna conciencianchista waqllichinman. 2013 watapi huk p’unchay huñunakuyninchispaq temaqa: “Conciencianchista waqaychasun” nisqan; chayqa 2012 wata setiembre killamantapachan aparikunqa (1 Tim. 1:19). Chay huñunakuymi yanapawasun imaynatas Diospa qowasqanchis concienciata utilizashanchis chaypi yuyaymananapaq.

2. ¿Imakunatan kutichikunqa hatun huñunakuypi?

² ¿Ima tapuykunatan kutichikunqa? Concienciamanta qanchis tapuykunata:

• ¿Imakunan conciencianchista waqllichinman?

• ¿Iman yanapawasun conciencianchista yachachinapaq?

• ¿Imata ruwaspan runakunamanta manaña huchachasqachu kasunman?

• ¿Imatan rikuchinchis Bibliaq yachachikuyninkunapi yuyaymanaspa, chayman hina kawsaspapas?

• ¿Imatan ruwasunman hukkunaq conciencianta mana k’irinapaq?

• ¿Imaynatan wayna-sipaskuna qaqata sayankuman ima pruebapipas tarikuspa?

• ¿Ima allinkunan kanqa Bibliawan pusachikuqkunapaq?

3. ¿Imakunatan ruwasunman huk p’unchay huñunakuy allinninchispaq kananpaq?

³ Saqraqa imaymanatan ruwashan conciencianchista waqllichinanpaq, Jehová Diosmi ichaqa yanapawanchis chaykunata aguantanapaq. Bibliawan llaqtanwan iman munakuq Taytanchisqa niwanchis: “Kayninmi ñanqa, kayninta puriy”, nispa (Isa. 30:21). Payqa huk p’unchay huñunakuypi yachachikuykunawanmi yanapawanchis. Chayrayku kallpachakuy ch’isiyaq rinaykipaq. Tukuy yuyaywan uyariy, qhawariytaq imaynatas chayman hina kawsawaq chayta. Hinaspapas familiaykiwan t’aqwiriychis yachamusqaykichismanta. Diospa yachachikuyninkunaman hina kawsaspaqa allin concienciayoqmi kanchis, chaytaq yanapawanchis Saqraq kamachisqan pacha ama waqllichiwananchispaq (1 Ped. 3:16).