Profetakunaq ruwasqanqa allinninchispaqmi: Jonás
1. ¿Imayna runa karqan Jonás?
1 ¿Imatan yuyaykunki profeta Jonasmanta rimaspa? Wakinkunaqa ninku: “Manchali runan karqan otaq mana sienteq runa karqan”, nispa. Ichaqa manan chhaynachu karqan, aswanpas huch’uyaykukuq, mana manchakuq, hukkunapi yuyaykuq ima karqan. ¿Imata ruwaspa pay hina kasunman? (Sant. 5:10.)
2. ¿Imaynatan Jonás huch’uyaykukuq kasqanta qatikusunman?
2 Huch’uyaykukuq. Jehová Diosmi Jonasta huk llank’ayta ruwananpaq kamachirqan, paymi ichaqa mancharikuspa huk cheqasman ayqekurqan, ¿imarayku? Asiria nación sinchi millay kasqanrayku, chaymi Nínive llaqtata nikurqan: “Runa wañuchiq llaqta”, nispa (Nah. 3:1-3). Chayraykun Jehová Diosqa Jonasta mana kasukusqanmanta anyarqan paytaq huch’uyaykukuspa uyarikurqan (Prov. 24:32; Jon. 3:1-3). Ñawpaqpi Diospa kamachisqanta manaña kasukuyta munarqanchu chaypas Diospa munayninta ruwarqan (Mat. 21:28-31). Ñoqanchisri, ¿predicashallasunmanchu anyasqaña kaspapas otaq mana uyarikuy munaq territoriopipas?
3. ¿Imaraykun mana manchakuspa, imaymanata ruwaspa predicayninchista aparishanallanchis?
3 Mana manchakuspa ruwaq. Jonasqa Tarsis ladoman ayqekusqanta repararqan barcopi llank’aqkunata sasachakuypi churasqanta, chaymi paykunarayku lamar-qochaman wikch’uyukurqan (Jon. 1:3, 4, 12). Chay qhepamantaq Nínive llaqtapiña Diospa kamachisqanta hunt’ashaspa, aswan llaqta ukhuman haykurqan, Nínive llaqta thunichisqa kananmanta willananpaq. Chaytaqa mana manchakuq runallan ruwayta atinman (Jon. 3:3, 4). ¿Imatan chaymanta yachanchis? Kay millay pachapi allin willakuykunata willashanallapaqqa Diospa yanapayninta necesitasqanchista (Hech. 4:29, 31). Chaymantapas tukuy tiemponchista, kaqninchistapas utilizananchis predicayninchista aparishanallapaq (Hech. 20:24).
4. ¿Imaraykun profetakunaq ruwasqankupi yuyaymanananchis?
4 Sapa kuti Diospa profetankunamanta willakuykunata leespan paykunaq ruwasqankupi yuyaymanasun. Chaymi tapukunanchis: “¿Imatan ruwayman karqan? ¿Imaynapin paykuna hina kayman?”, nispa (Heb. 6:11, 12). Diosmanta Willasunchis nisqa qelqapin lloqsimunqa Diospa hunt’aq profetankunamanta willakuykuna t’aqwirinanchispaq.