¿Iman kallpachawanchis predicashanallapaq?
1. ¿Imapin tupan munakuy predicaywan?
1 Kay tiempopi Diospa Gobiernonmanta predicayqa ancha allinmi ima ruwaymantapas, chhaynapin kasukushanchis kay iskay kamachikuyta: Jehová Dios munakuyta runamasiyki munakuytapas (Mar. 12:29-31). Munakuymi kallpachawasun tukuy sonqowan predicashanallapaq (1 Juan 5:3).
2. ¿Imaynatan predicaspa rikuchinchis Diosta munakusqanchista?
2 Diosta munakuy. Satanasqa 6.000 wata hinañan Diospa sutinta qhellichashan, chayta ch’uyanchanapaqmi munakuy kallpachawanchis (2 Cor. 4:3, 4). Saqraqa runakunaq yuyaynintan tutayachishan, chaymi khaynata ninku: “Diosqa huchasapa runakunata infiernopi ñak’arichishan, Diosqa trinidadmi, otaq Diosqa mana runakunapi interesakunchu”, nispa. Wakin runakunataq ninku: “Diosqa manan kanchu”, nispa. ¿Manachu hanaq pachapi Taytanchismanta cheqaq kaqta yachanankuta munanchis? Allin Testigo kaspan Diospa sonqonta kusichinchis, chhaynapin Saqraq llullakusqanta sut’iman horqonchis (Prov. 27:11; Heb. 13:15, 16).
3. ¿Imaynatan predicaspa rikuchinchis runamasinchista munakusqanchista?
3 Runamasiykita munakuy. Sapa kuti pitapas predicaspaqa munakusqanchistan rikuchinchis. Yachanchismi kay p’uchukay tiempopi runakunaqa allin willakuykunata uyarinanku kasqanta. Nínive llaqtapi hinan kay tiempopi runakunaqa “manan reparankuchu allinkaqta mana allinkaqmanta” (Jon. 4:11). Paykunata predicaspaqa yanapasunmanmi ancha kusisqa kawsanankupaq (Is. 48:17-19). Yachachispan suyakuytapas qonchis (Rom. 15:4). Sichus paykuna uyarinqaku chayman hinataq kawsanqaku chayqa, qespichisqan kanqaku (Rom. 10:13, 14).
4. ¿Imatan Jehová Dios mana hayk’aqpas qonqanqachu?
4 Huk allin wawaqa tukuy tiempon taytan munakusqanta rikuchin, manan huk p’unchaytaraqchu suyan. Chhaynallatataqmi Jehová Diosta runamasinchista munakusqanchistapas rikuchisun tukuy tiempo predicaspa, manan wasin-wasinta rispallachu. Chayraykun maypiña kaspapas predicashanallanchis (Hech. 5:42). Sichus kallpachakusun chayta ruwanapaq chayqa, Jehová Diosqa manan hayk’aqpas qonqanqachu chay ruwasqanchista (Heb. 6:10).