Tapuykuna
◼ ¿Imatan bautizakuyta munaq rikuchinan huñunakuykunaman risqanwan, predicaq lloqsisqanwanpas?
Bautizakunanpaq decidikuymi imamantapas aswan importanteqa. Ichaqa manaraq umallikuna bautizakunanpaq aprobashaqtinkun, bautizakuyta munaqqa entiendenanmi Diospa kamachikuyninkunata, sut’itataqmi rikuchinan chayman hinapuni kawsay munasqanta.
Diosqa kamachiwanchismi huñunakunanchispaq, chaymi bautizakuyta munaqqa rikuchinan chay kamachikuy kasukushasqanta (Heb. 10:24, 25). Hinaspapas huñunakuykunapi tapuykunatan kutichinan. Chaymantapas Allin Yachachiq Kanapaq Escuelapipaschá kashan, ichaqa manan chayqa necesariochu bautizakunanpaqqa.
Cristianokunaqa predicananchismi, hukkunatapas Bibliamantan yachachinanchis, chaymi bautizakuyta munaqqa lloqsinanpuni predicaq (Mat. 24:14; 28:19, 20). ¿Hayk’a killakunan predicanan manaraq bautizakushaspa? Sut’itan rikuchinan tukuy tiempo sonqomanta predicay munasqanta, chayta rikuchinanpaqqa manan iskay kinsa killakunallachu pasanan (Sal. 78:37). Chaywanpas manan askha killakunataraqchu pasanan, yaqapaschá pisi killakunallapi chayqa sut’ita rikukunmanña. ¿Hayk’a horakunatan sapa killa predicanan? Hayk’a horatapunichus predicananmantaqa manan huk kamachikuy kanchu. Umallikunan qhawarinanku sapanka bautizakuy munaqkuna imaynapi tarikusqankuta (Luc. 21:1-4).
Umallikunan Bautizakuyta munaqkunawanqa huñunakunku, mana umallikuna kaqtintaq yanapakuq qharikuna. Sapanka bautizakuy munaqkunaqa manan kaqllachu kanku, chayraykun umallikunaqa otaq yanapakuq qharikunaqa allin yuyaywan qhawarinanku bautizakunankupaq hinachus kashanku icha manachu chayta. Bautizakuyta munaqqa rikuchinanmi cheqaqtapuni Jehová Diospa testigon kay munasqanta, Diospa llaqtanwan huñunakuytapas predicaytapas ancha chaninpaqmi qhawarinan. Hinaspapas bautizakuyta munaqqa manan askha watakunaña bautizasqa cristiano hina iñiyniyoqraqchu kanan. Sichus umallikunaq qhawarisqanman hina manaraq bautizakunanpaq hinachu kashan chayqa, sumaqllatan willananku imaraykuchus Bibliaq nisqanman hina manaraq bautizakuy atisqanta, yanapanankutaqmi astawan Bibliamanta yachashanallanpaq.