Profetakunaq ruwasqanqa allinninchispaqmi: Miqueas
1. ¿Imatan profeta Miqueas tapukunman karqan, imaraykun nisunman willasqanqa mana yanqapaqchu kasqanta?
1 Tapukurqankichá: “¿Hayk’aqtaq kay millay pachari tukunqa?”, nispa. Profeta Miqueasmi willarqan Jehová Dios Israelpa chunka ayllunkunata Judá llaqtatapas thunichinamanta, chaywanpas payqa tapukurqanchá, “¿hayk’aqtaq thunisqari kanqa?”, nispa. Willasqanqa manan yanqapaqchu karqan. 740 watapi manaraq Jesús hamushaqtinmi Miqueaspuni rikurqan Samaria llaqta thunisqa kasqanta. (Miq. 1:6, 7). 607 watapitaq Jerusalén thunisqa karqan (Miq. 3:12). Chay hinaqa, ¿imaynatan Miqueasta qatikusunman?
2. ¿Imanaqtinmi pacienciawan suyana Diospa p’unchayninta, ichaqa imakunata ruwaspan suyananchis?
2 Pacienciakunanchismi. Miqueasmi nirqan: “Ñoqan ichaqa Señor Diospi makilla suyakusaq, qespichiwaqniy Diostan suyakusaq”, nispa (Miq. 7:7). Ichaqa, ¿mana imata ruwaspachu suyasharqan? Manan, aswanpas tukuy sonqowanmi Diospa Siminta willasharqan. Ñoqanchispas Diospa hatun p’unchayninta suyaspan ‘Dios sonqo purispa Diosllapaqña kawsananchis’ (2 Ped. 3:11, 12). Yuyarinanchismi Diospa pacienciakusqanrayku runakunaqa huchankumanta pesapakuspa Diosman kutirikamusqankuta (2 Ped. 3:9). Chaymi Biblia kallpachawanchis ñawpaq profetakuna hina pacienciakunanchispaq (Sant. 5:10).
3. ¿Imaraykun mañakushanallanchis Diospa espiritunta?
3 Jehová Diosqa yanapawasunmi. Miqueaspaqqa sasan karqan Diosta kasukuyqa, chaymi Diospa yanapayninta mañakurqan (Miq. 3:8). Jehová Diosqa yachanmi yanapana necesitasqanchista, chaymi payqa munan mañakunanchista. Dios serviyninchispi sayk’ushanchis chayqa, Diosmi kallpata qowasun llank’ayninchista hunt’ananchispaq (Sal. 84:5, 7; Is. 40:28-31). Askha iñiqmasikuna sut’ita reparanku Jehová Diospa yanapayninta chaskisqankuta, chaymi Diospa espiritunta mañakushanallanchis (Luc. 11:13).
4. ¿Imatan Miqueasmanta yachanchis?
4 Miqueaspaqqa Diospa munayninta ruwaymi aswan importante karqan. Diosta mana kasukuq runakuna ukhupiña kawsarqan chaypas hunt’aqmi karqan. Ñoqanchispaqpas sasan kay tiempopi hunt’aq kayqa, chaymi kallpachakunanchis ‘Diosninchista wiñay-wiñaypaq kasunanchispaq yupaychananchispaqpas’ (Miq. 4:5).