Yanapasun sasata leeq runakunata
1. ¿Imaraykun sasa kanman sasata leeq runakunawan Bibliata estudiay?
1 Predicasqanchispin sapa kutilla tarinchis Bibliamanta yachay munaq runakunata. Ichaqa pisita otaq mana leeyta yachasqankuraykun manchakunku Bibliata otaq huk qelqakuna leeyta. Chaymi paykunaman estudiota munachispaqa manapaschá allinchu kanman Imatapunin librowan qallariypi estudiayqa. ¿Imaynatan paykunata yanapasunman? Chaypaqmi kunan qhawarisun 20 más nacionkunapi pisita leeq runakunata imayna yanapasqankumanta.
2. ¿Ima qelqakunan kashan sasata leeq runakunata yanapanapaq?
2 Sasata leeq otaq mana leeyta yachaq runakunata yanapanapaqqa Diosta uyariy, otaq Diosta uyarispaqa wiñaypaqmi kawsanki folletokunawanmi yachachisunman. Chay folletokunawan yanapachikuspan Estados Unidos nacionpi huk precursor runakunata tapuykun mayqenwan estudiay munasqanta. Kenia nacionpi sucursalmi willan chay ladopi tiyaq runakuna qelqakunapi willakuykunata uyarispa astawan entiendesqankuta. Sasata leeq runakunaqa manan educacionniyoq runakuna hinachu tapuywan kutichiywan yachachikuyta umankupi hap’inku. Chaymi wakin iñiqmasikuna ¡Diosmanta hamuq allin willakuykuna!, Diospa amigonmi kasunman otaq Bibliamanta willakuq libroy nisqa qelqakunawan estudiota qallarinku.
3. ¿Imakunatan yuyarina sasata leeq runakunawan Bibliata estudiaspa?
3 Kallpachasun. Sasata leeq runakunaqa pisipaqmi qhawarikunku p’enqakunkutaqmi sasata leesqankumanta. Chaymi kusisqa kanankupaq hina estudiota aparina. Sasataña leenku chaypas, allin yuyayniyoqmi kanku usqhayllataqmi imatapas umankupi hap’inku, chaymi respetowan paykunataqa qhawarina (1 Ped. 3:15). Hinaspapas sapa kutillanmi allinkuna ruwasqankumanta “kusa” ninanchis, chaymi paykunata kallpachanqa estudiota mana saqenankupaq.
Leeyta mana yachaqkunaqa pisipaqmi qhawarikunku p’enqakunkutaqmi kanpas. Chaymi kusisqa kanankupaq hina estudiota aparina
4. ¿Imaynatan yanapasunman sasata leeq estudiantekunata ñawpaqmanta preparakunankupaq?
4 Sasata leeq runakunapas preparakuyta atinkumanmi estudianankupaq, chaymi kallpachananchis chayta ruwanankupaq. Sudáfrica nacionpin wakin iñiqmasikuna estudiantekunata kallpachanku allinta leeq familiankuwan otaq amigonkuwan yanapachikunankupaq. Gran Bretaña nacionpin huk iñiqmasi estudiantekunaman marcasqa qelqanta qhawachin, paykunapas chay hinata marcanankupaq. India nacionpin huk iñiqmasipas estudiantekunata kallpachan hukpi estudianankupaq dibujokunata qhawaspa chaypi yuyaymanashanankupaq.
5. ¿Imaraykun pacienciayoq kananchis sasata leeq runakunawan Bibliata estudiaspa?
5 Pacienciayoq kasun. Sasata leeq runakunawan estudiaspaqa importante yachachikuykunatan astawanqa yachachinanchis, chaytataq allinta entiendechinanchis. Paykunawan estudiota qallarispaqa iskay kinsa parrafokunallatan estudiananchis, 10 otaq 15 minutota hinallataq. Hinaspapas pacienciayoqmi kananchis estudiante susigollawan leeqtin. Diosta astawan munakusqanman hinan kallpachakunqa aswan allinta leenanpaq. Chaypaqmi ichaqa qallariymantapacha kallpachananchis huñunakuykunaman rinanpaq.
6. ¿Imaynatan estudiantekunata yanapasunman allinta leenankupaq?
6 Sichus huk estudiante leeyta yacharunqa chayqa astawanmi iñiyninpi wiñarinqa (Sal. 1:1-3). ¿Imaynatan estudiantekunata yanapasunman allinta leenankupaq? Wakin iñiqmasikunaqa estudiota tukusqanku qhepamanmi, Kallpachakuy leenaykipaq qelqanaykipaq nisqa folletowan leeyta yachachinku. Gran Bretaña nacionpipas wakin iñiqmasikunan estudiantekunata kallpachanku abecedario nisqata yachanankupaq, Bibliapi textokunata maskhaspa leenankupaq, fácil entiendena qelqakunata leenankupaq ima. Sichus estudiante pisikallpayanqa chayqa, yuyarichiy imakunachus yachasqanta. Yanapay Diospi confiananpaq paypa yanapayninta mañakunanpaq ima (Prov. 16:3; 1 Juan 5:14, 15). Kallpachashallasun chayqa, paypas kallpachakunqan aswan allinta leenanpaq.
7. ¿Imaraykun mana manchakunachu sasata leeq runakunaman Bibliamanta yachachiyta?
7 Jehová Diosqa munakunmi educacionniyoq, mana educacionniyoq runakunatapas (Job 34:19). Payqa sonqonkupi imayna kasqankutan astawanqa qhawashan (1 Crón. 28:9). Chaymi mana manchakunachu sasata leeq runakunaman Bibliamanta yachachiyta. Diosqa imaymana yanapaykunatan qowanchis paykunata yanapanapaq. Fácil entiendena qelqakunawan yanapasqanchis qhepamanqa Imatapunin librowanmi yachachiyta qallarisunman. Chaymi paykunata yanapanqa aswan allinta yachanankupaq.