¿Imatan profetakuna Diosmanta willawanchis?
Ñaupa tiempomantaraqmi Jehová Diosqa profetankunawan willachiran imatachus runakunapaq ruwanqa chayta. Chaykunata leespan yachasunman Diospa bendicionninta chaskinanchispaq imachus ruwananchista. Qatimuqpin yachasun kinsa profetakunamanta.
ABRAHÁN
Diosqa maymantaña kaqtinchispas chaskiwasunmanmi, llapa runatataqmi bendeciyta munan.
Diosmi profeta Abrahanta prometeran: “Kay pacha lliu ayllukunapaqmi samincha kanki”, nispa (Génesis 12:3).
¿Imatan chaymanta yachasunman? Diosqa anchatan munakuwanchis, munantaqmi llapa kasukuq runakunata bendeciyta.
MOISÉS
Diosninchisqa khuyapayakuqmi yanapantaqmi payta reqsiy munaqkunata.
Tukuy atiyniyoq Diosninchismi profeta Moisesman atiyta qoran milagrokunata ruwananpaq. Chaywanpas Moisesqa Diostan niran: “Rogakuykin yuyaykusqaykikunata yachachiwanaykipaq, qanta reqsinaypaq sumaqllatapuni qhawariwanaykipaqwan”, nispa (Éxodo 33:13). Diosqa kusikuranmi Moisespa mañakusqanwan, chaymi yachayta qoran yanaparantaqmi imayna Dioschus kasqanta yachananpaq. Jinan Moisesqa yacharan Jehová Diosqa ‘khuyapayakuq sumaq sonqo Dios kasqanta’ (Éxodo 34:6, 7).
¿Imatan chaymanta yachasunman? Diosta reqsinanchispaq kallpachakusun chayqa, yanapawasunmi payta reqsinanchispaq. Bibliapin niwanchis imaynatachus payta adorasunman chayta, imaynatachus bendicionninta chaskisunman chaytawan.
JESÚS
Jesusqa khuyapayakuqmi karan imaymana onqoyniyoq runakunatataq qhaliyachiran
Diosqa wiñaypaqmi bendeciwasun Jesuspa yachachisqanta ruwasqanta yachaqtinchisqa.
Bibliapiqa willawanchismi Jesuspa imachus ruwasqanmanta yachachisqanmantapas. Diosmi Jesusman atiyta qoran askha milagrokunata ruwananpaq, chaymi ñausakunata qhawarichiran, roqt’okunata uyarichiran, wist’ukunata purichiran, wañupuq runakunatapas kausarichiran. Chaykunata ruwaspan Jesusqa rikuchiran jamuq tiempopi imatachus Diosninchis ruwanqa chayta. Chaymantapas willaranmi chay bendicionkunata chaskinanchispaq imachus ruwananchis kasqanta, niranmi: “Paykuna wiñay kausayta chaskinankupaqqa qan sapallan cheqaq Diostan reqsinanku, reqsinallankutaqmi kachamusqayki Jesucristotapas”, nispa (Juan 17:3).
Jesusqa khuyapayakuq, sumaq sonqo, munakuqmi karan. Chaymi niran: “Noqamanta yachaychis, jinan samakuyta tarinkichis; noqaqa llamp’u sonqon kani, k’umuykukuq sonqoyoqtaqmi kanipas”, nispa. Jinan askha qharikunapas warmikunapas payta qatikuranku (Mateo 11:29). Chay tiempopi qharikunaqa mana allintan warmikunata trataranku, Jesusmi ichaqa sumaqllata, munakuywan, respetowan paykunata qhawariran.
¿Imatan chaymanta yachasunman? Jesusqa anchatan runakunata munakuran, pay jinan noqanchispas runamasinchista munakunanchis respetananchis.
JESUSQA MANAN DIOSCHU
Bibliapiqa willanmi jujlla Diosninchis kasqanta, Jesustaqmi Diospa siminta willawaqninchis karan (1 Corintios 8:6). Jesusqa sut’itan niran Diosqa paymanta aswan atiyniyoq kasqanta, nillarantaqmi kay pachaman Dios payta kachamusqanta (Juan 11:41, 42; 14:28).a
a Jesusmanta astawan yachanaykipaq leey La fe verdadera, la puerta a una vida feliz nisqa folletopi 8, 9 yachachikuykunata, chay folletoqa www.pr2711.com nisqanpin kashan.