“Diosman achhuykuychis, jinan paypas qankunaman achhuykamusunkichis” (Santiago 4:8)
¿Uyarinpunichu Dios mañakusqanchista?
Jayk’aqllapas tapukurankichu: “¿Uyarinchu Dios mañakusqayta?”, nispa. Manan qanllachu chaytaqa tapukuranki. Askha runakunan llakipi tarikuspa Diospa yanapayninta mañakunku, chaywanpas sasachayninkuqa kashallanmi. Chhaynaqa, ¿manachu mañakusqanchista uyarin? Diosqa uyarinpunin mañakusqanchista sonqonpaq jina kaqtinqa, chaytan Bibliapi niwanchis. Chaymanta astawan yachasun.
DIOSQA UYARINMI MAÑAKUSQANCHISTA
“Qanqa mañakusqatan uyarinki, llapa runan jamusunkiku” (Salmos 65:2).
Wakin runakunaqa allin sientekunallankupaqmi Diosmanta mañakunku. Ichaqa manan llakipi tarikuspa allin sientekunallanchispaqchu Diosmantaqa mañakunanchis. Bibliapin nin: “Jehováa Diosqa llapa wajakuqninkunaq sispallanpin kashan, jayk’an cheqaq sonqowan wajakuqninkunaq qayllallanpin kashan [...]; wajakusqankutan uyarin”, nispa (Salmos 145:18, 19).
Chay jinaqa Jehová Diosqa serviqninkunaq mañakusqantaqa uyarinpunin. Diosqa munakuywanmi niwanchis: “Chay p’unchaypin qankuna wajakuwankichis, qayllaykamuwaspan mañakuwankichis, noqataq uyarisaykichis”, nispa (Jeremías 29:12).
DIOSQA MAYTAN MUNASHAN MAÑAKUNAYKITA
“Diosmantapas mañakushallaychispuni” (Romanos 12:12).
Bibliapin niwanchis Diosmanta sapa kuti mañakunanchispaq. Jehová Diosqa munanmi mañakunanchista (Mateo 26:41; Efesios 6:18).
¿Imaraykun Dios munan mañakunaykita? Juj taytaqa anchatan kusikun juch’uy erqechan yanapayninta mañakuqtinqa riki. Taytanqa yachanpasñachá wawanpa imachus necesitasqanta, ichaqa wawanpa mañakusqanta uyarispan reparan paypi confiasqanta munakusqantapas. Chhaynallataqmi noqanchispas Jehová Diosmanta mañakuspan rikuchishanchis paypi confiasqanchista munakusqanchistapas (Proverbios 15:8; Santiago 4:8).
DIOSQA LLAKIKUNMI QANMANTA
“Tukuy llakipakuyniykichista payman saqeychis, payqa qankunamantan llakikun” (1 Pedro 5:7).
Diosqa munakuwanchismi llakikuntaqmi noqanchismanta, chaymi munan mañakunanchista. Payqa yachanmi imapi tarikusqanchista, chaymi yanapayta munawashanchis.
Rey Davidqa mañakullaqpunin Jehová Diospa yanapayninta, willakurantaqmi imayna sientekusqantapas (Salmos 23:1-6). Chaymi Diosqa payta anchata munakuran, llapa mañakusqantataq uyariqpas (Hechos 13:22). Noqanchismantapas llakikunmi, chaymi mañakusqanchista uyarin.
UYARIWASQANRAYKUN JEHOVÁ DIOSTAQA MUNAKUNI
Salmos librota qelqaqmi chayta niran. Chay librota qelqaqqa manan iskayaranchu Jehová Dios mañakusqanta uyarisqanmanta, chaymi Diospa qayllanpipas kashanman jina sientekuran, karantaqmi kallpan tukuy llakikuyninkunata aguantananpaq (Salmos 116:1-9).
Sichus mana iskayasunchu mañakusqanchista Dios uyariwasqanchismanta chayqa, mañakushallasunmi. Yachasun España nacionpi tiyaq Pedromanta. Paypa churintas 19 watanpi kashaqtin carro saruspa wañuchisqa. Chhaynapi tarikuspas Pedroqa Diosman willakusqa llakikuyninta, sapa kutintaqsi mañakuq sonqonta tiyaykachinanpaq yanapananpaqpas. ¿Uyariranchu Dios mañakusqanta? Pedron nin: “Jehová Diosqa uyariwaranmi. Payqa noqatapas esposaytapas iñiqmasikunawanmi yanapachiwaran sonqoykutapas tiyaykachiran”, nispa.
Diosqa amigonchiskunawan yanapachiwaspanchismi mayninqa mañakusqanchisman kutichimun
Wawanku wapuranña chaypas, Diosmanta mañakusqanmi Pedrotapas familiantapas yanaparan. Pedroq esposanmi willakun: “Diosmanta mañakusqayqa yanapawaranmi llakikuyniyta aguantanaypaq. Jehová Diosqa entiendewaqmi llakikuyniyta, chaymi mañakusqay qhepaman sonqoy tiyaykuq”, nispa.
Bibliaq nisqanta, askha runakunaq willakusqankuta qhawarispan sut’ita reparanchis Diosqa mañakusqanchista uyarimusqanta. Ichaqa manan llapa runaq mañakusqantachu uyarin. ¿Imaraykun wakin runaq mañakusqanta mana uyarinchu?
a Jehová nisqan Diospa sutinqa (Salmos 83:18). Diospa Simin Qelqa Bibliapi qhaway “Sut’inchasqa simikuna” nisqapi “Dios” nisqata, chaypin willashan Diospa sutin Jehová kasqanta.