¿Imaynatan Diosmanta mañakunanchis uyariwananchispaq?
Jehová Dios kikinmi mañakusqanchistaqa uyarimun (Salmos 65:2). Maypipas ima horapipas Diosmantaqa mañakusunmanmi alto kunkawan otaq sonqollanchispi. Diosqa ancha munakuq taytanchismi, chaymi payqa munan “Papáy” nispa ninanchista (Mateo 6:9). Jehová Diosqa yachachiwanchismi imayna mañakunanchista.
JEHOVÁ DIOSMANTAQA JESUSPA SUTINPIN MAÑAKUNANCHIS
“Yayamanta sutiypi imatapas mañakuqtiykichisqa qosunkichismi” (Juan 16:23).
Chaywanmi Jesusqa nisharan Jehová Diosllaman mañakunanchispaq, manan idolokunamanchu, santokunamanchu, angelkunamanchu nitaq wañuqkunamanchu mañakunanchis. Jesuspa sutinpitaqmi mañakunanchis, chayta ruwaspan Jesuspi iñishanchis. Jesusmi niran: “Noqallantapunin pipas Yayamanqa chayanqa”, nispa (Juan 14:6).
SONQONCHISPI IMACHUS KASQANTAN WILLAKUNANCHIS
“Sonqoykichista payman mast’ariychis” (Salmos 62:8).
Jehová Diosman mañakuspanchisqa munakuq papanchisman jinan tukuyta willakunanchis. Manan juj libromantachu leenanchis nitaq umanchispi jap’isqanchistachu sapa kuti rimananchis. Aswanpas respetowanmi sonqonchispi imachus kasqanta willakunanchis.
DIOSPA MUNASQANMAN JINAN IMATAPAS MAÑAKUNANCHIS
“Imataña Diospa munayninman jina mañakusunchis chaypas, Diosqa uyariwasunmi” (1 Juan 5:14).
Bibliapin Diosqa willawanchis runakunapaq imatachus ruwananta, imatachus ruwananchista munasqantapas. Mañakusqanchista uyariwananchispaqqa paypa munasqanman jinan mañakunanchis. Chaypaqqa Bibliatan estudiananchis, chhaynapin Diosta astawan reqsisunchis mañakusqanchistataq uyariwasun.
¿IMAKUNAMANTAN MAÑAKUSUNMAN?
Imakunatas necesitanchis chaykunatan mañakusunman. Imakunatas kausananchispaq necesitanchis chaykunamantan mañakusunman. Chaymantapas mañakusunmanmi allinta tantekuspa imatapas ruwanapaq, ima llakitapas aguantananchispaq, juchanchismanta perdonawananchispaq, allin iñiyniyoq kananchispaq, mana allinkunamanta cuidawananchispaqpas (Lucas 11:3, 4, 13; Santiago 1:5, 17).
Jujkunapaqpas mañapusunmanmi. Wawankuta sumaqta uywaq tayta-mamakunaqa llapa wawanku munanakuspa kausanankutan munanku. Jehová Diosqa papanchismi, payqa yanapanakuspa kausananchistan munan. Chaymi payqa munan qosanchispaq, esposanchispaq, wawanchiskunapaq, amigonchiskunapaqpas mañapunanchista. Jesuspa qatikuqnin Santiagon niran: “Jujkuna-jujkunapaqtaq Diosmantapas mañapuychis”, nispa (Santiago 5:16).
Diosta agradecekunapaq. Bibliapin willawanchis Diosqa runakunapaq allinkuna ruwasqanta, ninmi: “Allinkunata ruwaspan reqsichikuran pichus kasqanta: parata parachimuspa, chajrakunata tiempollanpi ruruchispa, mijuytapas askhanpi qospa ima; chaykunawanmi sonqoykichistapas kusirichin”, nispa (Hechos 14:17). Diosninchisqa imaymanapin yanapawaranchis, chaykunata yuyarisun chayqa anchatan payta agradecekusun. Kamachikuyninkunata kasukuspan astawanqa agradecekushanchis (Colosenses 3:15).
AMA PISIPASPA MAÑAKUSHALLAY
Mayninqa manan usqhayllachu Diosqa mañakusqanchisman kutichimuwanchis. Chaywanchu nisunman: “Diosqa manan yanapayta munawanchu”, nispa. Manan. Aswanpas Diosqa mañakushanallanchistan munan, chayta kaypi qhawarisunchis.
Stevenmanta yachashallasun, qallariypin paymanta yachamuranchisña, paymi nin: “Diosmanta mana mañakuspaqa manan llakikuyniyta atipaymanchu karan”, nispa. Payqa Biblia estudiaytan qallariran chaypin yacharan mana pisipaspa Diosmanta mañakuy allinpuni kasqanta. Paymi nillantaq: “Maytan Diosta agradecekuni amigoykunawan yanapachiwasqanmanta, kunanqa aswan kusisqan kashani”, nispa.
Jennymanta yachallasuntaq, payqa sonqonpin niran: “Diosqa manan uyariwanmanchu”, nispa. Paymi nin: “Sinchi llakisqa kashaspan Diosta rogakurani: ‘Yanapaway imaraykun mana valeqpaq qhawarikuni’, nispa. Chhaynata mañakuspaymi repararani sonqoyña juchachawashaqtinpas, Diosninchis munakuwasqanta, mana pisipanaychu kasqantapas”, nispa. Yennyn nillantaq: “Mañakusqaymi yanapawaran Jehová Diosta munakuq amigoyta jina, munakuq papayta jina qhawarinaypaq. Payqa yanapawashallanmi manan saqewanchu, kamachikusqanta kasukusaq chayqa yanapawashallanqan”, nispa.
Isabelmi nin: “Wawayqa manaña qhalichu chaypas kusisqan kausakushan, chayta rikuspan reparani mañakusqayta Dios uyarimusqanta”, nispa
Isabelmantañataq yachasun, paytaqa onqoq kashaqtinmi doctorkuna niranku: “Wawaykiqa manan qhalichu nacemunqa”, nispa. Chaywanqa sinchitan llakikuran, jujkunaqa abortananpaqmi kallpacharanku. Isabelmi nin: “Manan imatapas ruwayta atiranichu Diosllamantan mañakurani askha kutita”, nispa. Doctorkunaq nisqan jina Isabelpa wawanqa manan qhalichu nacemuran. Chhaynaqa, ¿manachu Dios Isabelta uyariran? Arí uyariranmi. ¿Imaynatan yanaparan? Isabelmi nin: “Waway nacesqanmantaqa chunka tawayoq watañan pasarun, payqa Diospa qowasqan sumaq regalon, manaña qhalichu chaypas kusisqan kausakushan, chayta rikuspan reparani mañakusqayta Dios uyarimusqanta”, nispa.
Isabelpa willawasqanchisqa Bibliapi nisqantan yuyarichiwanchis, chaypin nishan: “Señor Diosníy, juch’uyyaykukuqkunaq mañakusqantaqa uyarinkin, qanmi paykunataqa kallpachanki, makillan wajakamusqankutaqa uyarinki”, nispa (Salmos 10:17). Kaypi qhawarisqanchis jina, Diosmantaqa mana pisipaspan mañakushanallanchis.
Jesusqa askha kutipin Diosmanta mañakuran, wakinmi Bibliapi kashan. Qatikuqninkunaman Diosmanta mañakuyta yachachisqantaqa askha runakunan yachanku. ¿Imatan chay mañakuymanta yachasunman?