Qanmantan kashan jamuq tiempopi allin kanaykipaqqa

Jehová Diosqa 3.500 watakuna ñaupaqtan payta serviq runakunata niran imatachus ruwananku qhepaman allinta kausanankupaq chayta, paymi niran: “Willaykichismi wañuymantapas kausaymantapas, jinallataq saminchaymantapas ñakaymantapas. Ajllakuychis kausayta, qankunapas mirayniykichispas kausanaykichispaq”, nispa (Deuteronomio 30:19).

Qhepaman allin kausayniyoq kanankupaqqa allin kaqtan ruwananku karan. Noqanchispas chaytan ruwananchis. Bibliapin niwanchis imata ruwaspas allin kaqta ruwasunman chayta, chaypin nin: “Diosniykichis Señor Diosta munakuychis, payta kasuychis”, nispa (Deuteronomio 30:20).

¿IMAYNATAN DIOS MUNAKUSQAYKITA RIKUCHIWAQ?

BIBLIATAN ESTUDIANAYKI. Jehová Diosta munakunapaqqa ñaupaqtan yachananchis imayna kasqanta, Bibliapin willawanchis imaynachus pay kasqanta. Bibliata estudiaspan yachanki Jehová Diosqa munakuq kasqanta, allinninchispaq imatapas niwasqanchista. Chaymantapas Bibliapin niwanchis noqanchismanta llakikusqanta, chaymi munan mañakunanchista (1 Pedro 5:7). Payta reqsinaykipaq kallpachakunki chayqa, Diosqa achhuykamusunkin (Santiago 4:8).

YACHASQAYKIMAN JINA RUWAY. Diosta munakusqanchista rikuchinapaqqa kamachisqanman jinan ruwananchis, Bibliapin willashan imatachus kamachisqanta. Diosta kasukunki chayqa, Josué 1:8 textopi nisqanmi qanpi junt’akunqa, chaypin nin: “Chay jinapin tukuy ima ruwasqaykipas allinkama kasunki”, nispa.