¿Yacharankichu?

Juj rumipi qelqakusqanmi Bibliapi imachus nisqanta yanapan

JUJ qelqasqa rumitan tariranku Hebrón llaqtaq qayllanpi wañusqakunaq p’ampakusqan t’oqopi chaytan qelqasqanku 700, 600 watakunapi manaraq Jesús jamushaqtin. Chay rumin kunan Jerusalén llaqtapi kaq museopi tarikushan, chay rumipi qelqakusqanqa khaynatan nin: “Hagavpa churin Hagaftan Yahweh Sabaot maldecichun”, nispa. ¿Imaynatataq kaypi qelqakusqanri yanapan imachus Bibliapi nisqanta? Chaypi qelqakusqanqa sut’itan rikuchin Diospa sutinqa ñaupa tiempopi Hebreo rimaypi YHWH letrakunawan qelqakusqanta. Chaymi chay tiempopi runakunapas sapa kutilla rimaqku Diospa sutintaqa. Chaymantapas wañusqakunaq p’ampakusqan t’oqopin Diospa sutinta paykunaq sutinkutawan qelqasqata tarillarankutaq.

Rimaykunamanta yachaq Rachel Nabulsin chay rumipi qelqakusqanmanta nin: “Askha kutitan YHWH suti rijurisqanmi rikuchin ancha importante Israel runakunapaq Judá runakunapaq kasqanta”, nispa. Chaymi rikuchin imaraykus Bibliapi askha kutita YHWH sutiwan Diospa sutin rijurisqanta.

Chay rumipi Yahweh Sabaot qelqakusqanqa kay ninantan nin: “Janaq pacha ejercitokunata kamachiq Jehová Dios”, nispa. Chaymi chay tiempopi runakunaqa chay sutitaqa rimaqkupuni. Chaymantapas Bibliapin rijurin 250 kutita “janaq pacha ejercitokunata kamachiq Jehová Dios” nispa. Chay sutikunaqa mastaqa rijurin Isaías, Jeremías, Zacarías nisqa qelqakunapin.