Allin kaqta ruway: Bibliapi yuyaychaykunaqa confianapaq jinan

Sichus conciencianchispa nisqanman jinalla otaq runakunaq piensasqankuman jinalla imatapas ruwasunman chayqa, manapaschá ruwasqanchisqa allinchu kanqa. Bibliapin willashan imaraykus chay pasanman chayta. Chaymantapas willashanmi imatas ruwananchis kusisqa thaj kausananchispaq chaytapas. Bibliapi kaq consejokunaqa confianapaq jinapunin.

JEHOVÁ DIOSPA PUSARIWANANCHISTAN NECESITANCHIS

Bibliaq nisqanman jinaqa, runakunaqa Jehováa Diospa yanapaynintan necesitanchis, manan noqallanchismantaqa imatapas allintaqa ruwayta atisunmanchu (Jeremías 10:23). Chaymi Diosqa simin qelqata qowanchis chaywan yanapachikuspa allin yuyaywan imatapas ruwananchispaq. Payqa anchatan munakuwanchis, manan munanchu comunta imatapas ruwaspa llakipi ñak’ariypi tarikunanchistaqa (Deuteronomio 5:29; 1 Juan 4:8). Chaymantapas kamaqninchisqa yachayniyoq Diosmi, allintan payqa sapankanchistapas reqsiwanchis, chaymi payqa allinta yuyaychawanchis (Salmos 100:3; 104:24). Ichaqa manan pitapas obliganchu kamachikuyninkunata kasukunanpaqqa.

Adanmanta Evamantawan yachasun. Jehová Diosqa llapa imachus necesitasqankutan paykunaman qorqan, chhaynapi thaj kusisqa kausanankupaq (Génesis 1:28, 29; 2:8, 15). Chaymantapas kamachikuykunatan qorqan, chay kamachikuykuna qosqanqa manan sasa junt’aychu karqan. Ichaqa paykunamantañan karqan Diosta kasukunqakuchus icha manachus chayqa (Génesis 2:9, 16, 17). Yachasqanchis jina, Adanwan Evawanqa manan Jehová Diospa kamachisqanta kasukurqankuchu, aswanpas piensasqankuman jinan mana allinta ruwarqanku (Génesis 3:6). Kunanrí, ¿imaynan runakuna kashanku piensasqankuman jinalla allin kaqta ajllakuspa? ¿Thajchu kusisqachu kashanku? Manan. Runakunaqa Diospa yuyaychasqanta mana kasukuspan ñak’ariyllapi llakikuyllapi tarikushanku (Eclesiastés 8:9).

Maymantaña kasunman chaypas Bibliaqa sumaqtan yuyaychawanchis allinta piensaspa imatapas ruwananchispaq (2 Timoteo 3:16, 17; qhaway “Pachantinpi runakunapaq munay libro” nisqa recuadrota). Qatiqninpin yachasun imaynatas Biblia yanapawasunman chayta.

¿Imaraykun nisunman “Bibliaqa Diospa Palabranmi” nispa? (1 Tesalonicenses 2:13). Chaymanta yachanaykipaq jaykuy jw.org nisqa paginaman, jinaspa qhaway ¿Pin Bibliata yuyaychanman karqan? nisqa videota.

¿IMARAYKUN WAKIN RUNAKUNA MANA BIBLIAPI CONFIANKUCHU?

Wakin runakunaqa manan creenkuchu Biblia runakunata yanapananpi. Kaypin wakin razonkuna kashan imaraykus chhaynata piensanku chaymanta:

Wakin runakunan ninku: “Bibliapi imachus nisqanqa manan tupanchu”, nispa.

Cheqaq kaq: Biblia leeyta qallarispaqa yaqapaschá piensasunman wakin textokuna juj partekunawan mana tupananpaq. Ichaqa sichus allinta t’aqwirisun maypis chaykuna pasarqan, ima tiempopis pasarqan, ima costumbreyoqsi chay tiempopi runakuna karqanku, imaynatas chay tiempopi Bibliata qelqaqkuna piensarqanku chayta chayqa; sut’itan reparasun Bibliaq nisqanqa llapallan tupasqanta.

Chaymanta astawan yachanaykipaq jaykuy jw.org nisqa paginaman, jinaspa maskhay “¿Se contradice la Biblia?” nisqa yachachikuyta.

Wakin runakunan ninku: “Bibliapi creeq runakunaqa aswan mana allinkunatan ruwanku. Chhaynaqa, manachá Bibliaq yachachisqanqa allinchu kanman”, nispa.

Cheqaq kaq: Bibliata leeq runakunaq mana allinkuna ruwasqankumantaqa manan Bibliachu juchayoq. Bibliapiqa ñan willarqanña imaynas wakin religioso umallikuna pastorkunapas mana allin ejemplo kanankuta. Chaymantapas willanmi imaynas “paykunaq causanpi runakuna cheqaq ñanmanta millayta rimananku” karqan chaytapas (2 Pedro 2:1, 2).

Wakin religioso umallikunapas pastorkunapas manan Bibliaq yachachisqanman jinachu kausanku, chaymanta astawan yachanaykipaq jaykuy jw.org nisqa paginaman, jinaspa maskhay “La religión, ¿un gran negocio?” nisqata.

Wakin runakunan ninku: “Bibliaqa runakunatan cheqninachin”, nispa.

Cheqaq kaq: Bibliaqa runakunatan yanapan respetowan jujkunata qhawarinankupaq. Bibliaq nisqanman jinaqa kay ruwaykunan mana allinchu:

Jujkunamanta aswan allinpaq qhawarikuy (Filipenses 2:3).
Jujkunaq imachus creesqankumanta burlakuy (1 Pedro 2:17).
Jujkunata noqanchis jina piensanankupaq obligay (Mateo 10:14).

Bibliaq nisqanman jinaqa, Jehová Diosqa munakuqmi, chanintan imatapas ruwan. Payqa munan noqanchispas pay jina kananchistan (Romanos 9:14).

Chaymanta astawan yachanaykipaq jaykuy jw.org nisqa paginaman, jinaspa maskhay “¿Nos ayuda la Biblia a ser tolerantes?” nisqata.

DIOSQA BIBLIAWANMI PUSARIWANCHIS

Bibliapin willashan imaynatas Jehová Dios ñaupaqmantapacha runakunata sumaqta pusarirqan yuyaycharqan chayta. Sichus Bibliata leenki chayqa allintan reparanki imakunatas Jehová Dios allinpaq mana allinpaq qhawarin chayta, imakunas yanapawasunman imakunas mana chaytapas (Salmos 19:7, 11). Chay consejokuna qosqanqa manan ñaupa tiempopi runakunallapaqchu karqan, kay tiempopipas sapa p’unchaymi kausayninchispi yanapawasunman.

Qhawasun imanispas Jehová Dios Proverbios 13:20 textopi yuyaychawanchis chayta. Chaypin nishan: “Yachayniyoqkunawan puriqqa yachayniyoqmi kapunqa, mana yuyayniyoqkunawan juñukuqmi ichaqa mana allinpi tarikunqa”, nispa. Chay yuyaychasqanqa anchatan kay tiempopi runakunata yanapashan. Chhayna consejokunaqa askhan kashan simin qelqapi (qhaway “Bibliapi yuyaychaykunaqa ancha allinpunin” nisqa willakuyta).

Yaqapaschá tapukushanki: “¿Imaynapin yachayman Bibliapi yuyaychaykuna kay tiempopaq allin kasqanta?”, nispa. Qatimuq yachachikuypin wakin runakunaq imachus willakusqankuta yachasun.

a Diospa sutinqa Jehová nisqan (Salmos 83:18).

BIBLIAPI YUYAYCHAYKUNAQA ANCHA ALLINPUNIN

Bibliataqa yaqa 2000 wata ñaupaqtaraqmi qelqayta tukurqanku, chhaynaña kaqtinpas imachus yachachisqanqa kay tiempopi runakunatapas allintan yanapashan. Runakunaqa tukuy atisqankutan ruwanku kusisqa kanankupaq ima ruwasqankupas allin kananpaq (Eclesiastés 1:9). Biblia ñaupa libroña chaypas, chaypi kaq yuyaychaykunaqa yanapawasunmi kusisqa kananchispaq, allinta imatapas ruwananchispaq.

Honrado kanapaq

“Tukuy imapin honrado kayta munayku” (Hebreos 13:18).
“Suwakuqpas amaña suwakuchunñachu, aswanpas llank’achun” (Efesios 4:28).

Jujkunawan sumaqta kausanapaq

“Sapanka jujpa allinninta maskhachun, amataq paypa allinnintaraqchu” (1 Corintios 10:24).
“Qankunapura paciencianakuychis, perdonanakuychis” (Colosenses 3:13).

Allin yuyaywan imatapas ruwanapaq

“Mana yachayniyoqqa tukuy uyarisqantan creen, allin yuyayniyoqmi ichaqa allinta tanteakuspa imatapas ruwan” (Proverbios 14:15).
“Allin yuyayniyoqqa mana allin kaqtan reparan, jinaspan pakakun; mana yuyayniyoqkunan ichaqa pasallanku jinaspa ñak’ariypi tarikunku” (Proverbios 22:3).