Kusisqan Jehová Diosta servirqani

WASIYPI KAUSASQAYKU

1934 watapin nacerqani. Tayta-mamayqa Suiza nacionmantan kanku, ichaqa Canadá nacionmanmi astakapurqayku Ontario ladopi Timmins llaqtachaman. Chaypi kashaspan mamitayqa 1939 watapi jina Qhawaq revistata leeyta qallarirqan, chaymantataq testigokunaq juñunakuyninman riyta qallarirqan. Noqata soqtantin hermanoykunatawanmi pusawaqku chaymanqa. Chay qhepamanqa ratullan mamitayqa bautizakapurqan.

Papayqa sinchi phiñasqan kasharqan mamitaypa bautizakusqanwan. Chaywanpas mamitayqa tukuy sonqowanmi Jehová Diosta servirqan. 1940 watapi Diosmanta willayninchista jark’aqtinkupas mamitayqa manan jayk’aqpas Jehová Diostaqa kacharirqanchu, papaytapas sumaqllatan rimapayaq. Mayninpi papay millaytaña rimaq chaypas respetaqmi paytaqa. Mamitaypa ejemplonmi noqatapas hermanoykunatapas yanapawarqanku Jehová Diospa testigon kapunaykupaq. Papaypas tiempowanqa cambiapurqanmi, sumaqtan mamitaytapas noqaykutapas qhawariwaqku.

TUKUY TIEMPOYWAN JEHOVÁ DIOSTA SERVIYTA QALLARINI

1950 watapin Nueva York llaqtapi “Aumento de la Teocracia” nisqa asambleaman rirqani. Chaypin tukuy ladomanta askha hermanokunata hermanakunata reqsirqani. Paykunaqa Galaad escuelaman risqankumantan experienciankuta willakurqanku. Noqaqa qallariypiqa tukuy sonqoywanmi Jehová Diostaqa serviyta munasharqani. Paykunaq willakusqanta uyarispaqa astawanraqmi chayta munapurqani. Chaymi wasiyman chayaspa jina precursor kanaypaq juj solicitut-ta junt’arqani. Canadá sucursalmanta hermanokunan ichaqa niwarqanku: “Ñaupaqtaqa bautizarukuyraq”, nispa. Chaymi 1950 watapi 1 octubre killapi bautizakapurqani. Juj killa qhepamantaq precursor regular kapurqani. Chay qhepamanqa Kapuskasing llaqtachapi yanapakunaypaqmi kachawarqanku. Chay llaqtaqa karupin tiyasqay llaqtamantaqa kasharqan.

1951 watapin sucursalmanta hermanokuna llapa francés simita yachaq hermanokunata kallpachawarqanku Quebec ladopi yanapakunaykupaq. Chay llaqtapiqa pisichallan testigokuna karqanku. Noqaqa francés simita inglés simita iman yacharqani, chaymi chayman riyta munasharqani. Chaymi sucursalmanta hermanokunaqa Rouyn llaqtaman kachawarqanku. Qallariypi willamusqayman jinaqa manan pitapas chay llaqtapiqa reqsirqanichu. Ichaqa niwasqanku direccionmanmi rirqani. Chaypin Marcel hermanota reqsirqani, paywanqa allin amigontinmi kapurqayku. Tawa watan chay ladopi kuska Jehová Diosta servirqayku. Chay qhepamantaq precursor especial kapurqani.

GALAAD ESCUELAMAN RISQAY SUYAKUSQAY IMA

Quebec llaqtapi kashaqtiymi Galaad escuelaman invitawarqanku, 26 clase nisqaman. Chayqa Nueva York llaqtapin South Lansing ladopi aparikurqan. Chay kutiqa may kusisqan kasharqani. Chay escuelamantaqa 1956 watapin 12 febrero killapi graduakurqani. Chay qhepamantaq África Occidental ladoman rinaypaq niwarqanku, chaytaqa Ghana nispan kunanqa reqsikun.b Ichaqa chayman manaraq rishaspan Canadá nacionman rirqani, chaypin suyakurqani viajanaypaq documentoykunata. Noqaqa piensasharqani chay documentokunata ratulla qowanankupaqmi, ichaqa manan chhaynachu karqan.

Qanchis killan documentoykuna qowanankuta suyakurqani. Chay tiempopiqa Cripps hermanoq familianwanmi qhepakurqani. Chaypin reqsirqani ususinku Sheilata. Paywanmi reqsinakuyta qallarirqayku. Noqaqa Sheilaq papanwanmi rimaytaña munasharqani ususinwan casarakunaypaq, ichaqa manaraq paywan rimashaqtiymi viajanaypaq documentoykuna chayamurqan. Chaymi Sheilawan Jehová Diospa yanapayninta mañakurqayku, jinaspa rimanakurqayku Jehová Diostaraq ñaupaqta servinaykupaq. Chaymantapas ninakurqaykun cartakunata apachinakunaykupaq, chhaynapi tiempowan casarakapunaykupaq. Sheilata saqeyqa sasan karqan, ichaqa tiempowanmi repararqayku chay ruwasqayku allin kasqanta.

Chay qhepamanqa juj killa junt’an trenpi barcopi avionpi ima viajarqani Ghana nacionpi Accra llaqtakama. Chaypin watukuq umalli kanaypaq niwarqanku. Jinan Ghana, Costa de Marfil, Togo ladopi llaqtakunata visitarqani. Chaykunaman viajanaypaqmi sucursalqa juj carrota qowarqan. Ichaqa sapallaymi chay kutikunaqa campokunata qhawaspa viajaq kani.

Sapa semana tukuytan juj p’unchay aparikusqan asambleapi yanapakuq kani. Ichaqa manan asambleata aparinaykupaqqa wasi kaqchu. Chaymi hermanokuna carrizomanta carpakunata ruwaqku, techontataq palmeraq raphinkunawan tapaqku, chhaynapi intimanta pakaykuwanankupaq. Chaymantapas chaypiqa manan karqanchu mijunaykuta waqaychanaykupaq refrigeradora. Chaymi chaypi tiyaq hermanokunaqa uywasqanku animalkunata kasqan ratu wañuchispa mijunata wayk’uqku.

Chay asambleakunapiqa mayninqa asikunapaqmi imapas pasaq. Juj kutinmi hermano Herb Jennings discursota qosharqan.c Chayllamanmi juj toro chaupiykuta pasarparirqan. Chay toroqa manchasqan kasharqan, manan maymanpas ayqekuyta atisharqanchu; Herb hermanonchispas manan imaniytapas atirqanchu. Chayllamanmi tawa kallpasapa hermanokuna jamurqanku jinaspa chay torota jap’ispa apapurqanku. Chayta rikuspan llapayku asikuspa t’aqllakurqayku.

Sapa chaupi semanapin La Sociedad del Nuevo Mundo en acción nisqa peliculata tukuy llaqtakunapi runakunaman qhawachiq kani. Chayta qhawachinaypaqqa yuraq mantatan iskay k’aspiman otaq posteman wataq kani. Runakunaqa kusisqan chayta qhawaqku. Wakin runakunaqa chayraymi juj peliculata qhawasharqanku. Chaymi askha runakunata bautizakuqta rikuspa kusisqa t’aqllakuqku. Chay videota rikuspan paykunaqa sut’ita reparaqku pachantinpi hermanokuna juj familia jina kasqanchista.

África ladopi iskay wata kasqay qhepamanmi 1958 watapi juj jatun asambleaman rirqani. Chayqa Nueva York llaqtapin aparikurqan. Chaypin jujmanta Sheilawan tuparqani. Payqa precursora especial jinan Quebec ladopi yanapakusharqan. Paywanqa apachinakuqmi kayku cartakunata, chay asambleapi tupaspan ichaqa payta casarakunaypaq nirqani, paytaq “ya” niwarqan. Chaymantataq hermano Knorrta tapurqani: “¿Atikunmanchu Sheilata Galaad escuelaman invitakuyta? Atikunman chayqa, ¿manachu chaymanta África ladoman jamunman?”, nispa.d Hermano Knorrqa “arí atikunmi” niwarqanmi. Chaymi Sheilataqa graduakusqan qhepaman Ghana nacionman kachamurqanku. Chaypin 1959 watapi 3 octubre killapi Accra llaqtapi casarakapurqayku. Chayqa Jehová Diospa sumaq bendicionninmi karqan.

CAMERÚN NACIONPI YANAPAKUYKU

1961 watapin Camerún ladoman kachawarqanku. Chaypiqa chayraqmi juj mosoq sucursal kichakusharqan, chaymi niwarqanku sucursalmanta encargakuq jina yanapakunaypaq. Chaypiqa imaymana ruwaypin yanapakurqani, imaymanatan yacharqanipas. 1965 watapin ichaqa esposay onqoq rijurirqan. Chayta yacharuspaqa manan ima ruwaytapas atirqaykuchu, chaymantan ichaqa kusisqa kasharqayku. Imaymanatañan ruwasharqayku Canadá nacionman kutipunaykupaq, chaypi wawaykuta uywanaykupaq. Chay qhepallamanmi qonqaylla juj jatun llakipi tarikurqayku.

Wawaykun wijsallapiraq kashaspa wañukapurqan. Doctorpa nisqanman jinaqa wawaykuqa qharichas kasqa. Wañukapusqanmantaqa 50 watañan pasarun, chaywanpas manan qonqaykuchu paytaqa. Wañupusqanta yacharuspaqa sinchi llakisqan kasharqayku. Chaywanpas chay Betel-llapin qhepakurqayku Jehová Diosta servinaykupaq.

Camerún nacionpi hermanonchiskunaqa politicapi mana chhaqrukusqankuraykun imaymana sasachakuypi tarikurqanku. Astawanqa elecciones tiempopin paykunapaqqa sasa karqan. 1970 watapin 13 mayo killapi gobierno chaypi kaq sucursalta wisq’apurqan. Chaypiqa chayraqmi pisqa killa jinallaraq tiyasharqayku. Chaymantapas jark’arqankun Diosmanta willayninchista, juj semanallapin llapa misionerokunatapas qarqopuwarqanku. Chaykuna pasasqanwanmi noqaykuqa chaypi tiyaq hermanokunamanta llakisqa kasharqayku.

Chay qhepamanqa Francia sucursalmanmi kachawarqanku, chaypiqa soqta killan karqayku. Chay sucursalmantapachan Camerún ladopi tiyaq hermanokunata yanaparqayku. Chay wata tukuyllatan ichaqa Nigeria sucursalman kachawarqanku. Chaymantan qhawariq kayku imaynas Camerún ladopi Diosmanta willayninchis aparikusharqan chayta. Nigeria nacionpi hermanokunaqa sumaqtan chaskiwarqanku, may kusisqan chaypiqa kasharqayku.

SASAN KARQAN TUKUY TIEMPOYKUWAN SERVISQAYKUTA SAQEY

1973 watapin juj sasachakuypi tarikullarqaykutaq. Esposaymi unayña onqosharqan. Juj kutinmi Nueva York llaqtapi asambleaman rinaykupaq alistakushaqtiyku waqayuspa niwarqan: “Manañan aguantayta atinichu, nishu onqosqan kashani”, nispa. Esposaywanqa 14 watañan tukuy tiempoykuwan África Occidental ladopi Diosta servisharqayku, kusisqan chaypiqa kasharqayku. Ichaqa Jehová Diospa yanapaynintan mañakurqayku, jinaspa Canadá nacionman kutimpurqayku chaypi onqoyninmanta jampinankupaq.

Canadá nacionman kutispa jinan juj kaq amigoypa negocionpi carrota vendespa llank’arqani, chayqa Toronto llaqtapin karqan. Chay llaqtapin juj wasita alquilakurqayku. Chaymantapas necesitasqayku cosaskunallatan rantikurqayku, chhaynapin mana ima qolqetapas manukurqaykuchu. Noqaykuqa kaqnillaykuwanmi Jehová Diosta serviyta munasharqayku, chhaynapi tiempowanqa tukuy tiempoykuwan Jehová Diosta servinaykupaq. Ichaqa manaraq unaychu pasashaqtinmi chayta ruwayta qallarirqayku.

Ontario llaqtachapin asambleakunata aparikunanpaq juj jatun wasita ruwasharqanku. Chaypin sabadonkuna yanapakuq kani. Tiempowanqa chay asamblea wasimanta encargakunaypaqmi niwarqanku. Chay kutipaqqa allinñan esposayqa kasharqan. Chaymi chay llank’ayta chaskikurqayku, jinaspa 1974 watapi junio killapi chay asamblea wasiman astakurqayku. Chay kutiqa ancha kusisqan kasharqayku.

Esposayqa pisi-pisimantan qhaliyapurqan. Iskay wata qhepamanmi ichaqa niwarqanku jujmanta watukuq umalli kanaykupaq, jinaspa Manitoba llaqtapi iñiq t’aqakunata visitanaykupaq. Chay llaqtapiqa nishutan chirin, hermanokunan ichaqa munakuqllaña karqanku. Chaypin yacharqayku maypiña kaspapas Jehová Diosta tukuy sonqowan serviy aswan allin kasqanta.

JUCH’UYAYKUKUQ KAYTA YACHANI

Askha watakunañan watukuq umalli jina yanapakusharqayku, chayllamanmi 1978 watapi Canadá Betelpi yanapakunaykupaq niwarqanku. Chaypin sonqo nanayña noqapaq karqan chaypas k’umuykukuq juch’uyaykukuq kayta yacharqani. Juj kutinmi francés simipi Montreal llaqtapi juj discursota qonaypaq niwarqanku. Chay kutiqa juj hora kuskantan discursota qorqani. Ichaqa chay discurso qosqayqa manas kallpachanapaq jinachu kasqa. Chaymi predicacionta qhawariq hermano noqawan rimarqan. Chay ratuqa manan repararqanichu imaynas noqaqa mana discursota qonaypaq jinachu kani chayta. Jinan chay kutipiqa hermanoq imachus niwasqanmanta sinchita phiñakurqani. “Pantasqallaytachu qhawan, manachu imallapipas allinta ruwarqani”, nispan nisharqani. Manan allintachu consejo qowasqanta chaskikurqani. Pichá rimapayashawan imaynatachá rimapayashawan chayllapin piensayniy kasharqan.

Chay p’unchay qhepallatan sucursalmanta encargakuq hermano noqawan rimarqan. Chaypin imachus pasasqanmanta disculpata mañakurqani. Chay qhepamantaq consejo qowaqniy hermanowan rimarqani. Chaypin perdonta mañakurqani, payqa kusisqan perdonapuwarqan. Chay kutipin yacharqani juch’uyaykukuq kayta. Chaytaqa manan jayk’aqpas qonqasaqchu (Prov. 16:18). Sapa kutillanmi Jehová Diosman willakuni chay kuti phiñakusqayta. Chaymi yanapawan piña yuyaychawanqa chaypas ama phiñakunaypaq.

Tawa chunka wata masñan Canadá Betelpi yanapakushani. 1985 watamantapachan sucursalmanta encargakuq jina llank’ashani. Esposay Sheilaqa 2021 watapin febrero killapi wañukapurqan, chaywanpas yuyashallanin paytaqa. Noqapas sinchitan onqoshani, ichaqa imaymana ruwaypi yanapakuspan mana ni cuentatapas qokunichu p’unchaykunaq ni watakunaq pasasqantapas (Ecl. 5:​20, willakuy). Imaymana sasachakuypiña tarikurqani chaypas, ancha kusisqan kashani Jehová Diosta servispa. 70 watañan Jehová Diosta tukuy tiempoywan servishani, chayqa maytan kusichiwan. Maytan munayman wayna-sipaskunapas tukuy tiemponkuwan Jehová Diosta servinankuta. Chaymi paykunapaq Jehová Diosmanta mañakuni. Chayta ruwaspallan paykunaqa kusisqa kausanqaku.