¿Munawaqchu yanapakuq qhari kayta?

1. ¿Imaynatan apóstol Pablo qhawariq yanapakuq qharikunata?

YANAPAKUQ qharikuna otaq siervo ministerial hermanokunaqa imaymana ruwaypin iñiq t’aqapi yanapakunku. Apóstol Pabloqa anchatan munakurqan chay hermanokunata. Chaymi Filipos llaqtapi iñiqkunaman carta apachisqanpi, umalliqkunaman yanapakuq qhari hermanokunaman ima napaykuyta apachirqan (Filip. 1:1).

2. ¿Imaninmi hermano Luis yanapakuq qhari jina yanapakusqanmanta?

² Chay yanapakuq hermanokunaqa kusisqan Diospa llaqtanpi yanapakunku. Paykunamanta wakinqa waynallaraqmi kanku wakintaq kuraqña kanku. Devan sutiyoq hermanopas 18 watallanpis nombrasqa kasqa. Hermano Luistaq 50 más watanpiña. Paymi nin: “Kusisqan kashani yanapakuq qhari jina yanapakuspay. Astawanqa kusikuni hermanokunaq yanapawasqankuta munakuwasqankuta ima rikuspan”, nispa. Pay jinan nillankutaq juj yanapakuq qhari hermanokunapas.

3. ¿Ima tapuykunamantan kaypi yachasunchis?

³ Qharikuna, ñachus bautizasqaña kashankichis, ichaqa manaraqchus siervo ministerial kankichis chayqa, ¿munawaqchischu chaypaq nombrasqa kayta? Ichaqa, ¿imaraykun munawaq siervo ministerial kayta? ¿Imatan ruwanayki chaypaq nombrasqa kanaykipaq? Kaypin yachasunchis chay tapuykunamanta. Ñaupaqtan ichaqa yachasunchis imakunatas yanapakuq qharikuna ruwanku chayta.

¿IMATAN RUWAN JUJ YANAPAKUQ QHARI?

4. ¿Imakunatan ruwanku yanapakuq qharikuna? (Qhaway kay parrafopaq fotokuna).

⁴ Yanapakuq qharikunaqa bautizasqa hermanokunan kanku, Jehová Diospa santo espiritunwantaqmi ajllasqa kanku. Paykunaqa imaymana ruwaykunapin umalliqkunata yanapanku. Paykunamanta wakinqa maypichus predicakunqa, predicanapaq qelqakuna kashanchus icha manachus chaykunatan qhawarinku. Wakinqa juñunakuna wasi limpiaypi allichaypi iman yanapakunku. Wakintaq juñunakuyman jamuqkunata chaskinku; audio video nisqapi iman yanapakunku. Manan chayllapaschu, paykunaqa allin iñiyniyoq hermanokunan kanku. Tukuy sonqon Jehová Diosta munakunku, kamachisqanman jinan kausankupas. Hermanokunatapas anchatan munakunku (Mat. 22:​37-39). Chhaynataq chayqa, ¿imatan ruwanan mayqen bautizasqa hermanopas siervo ministerial kananpaq?

5. ¿Imatan bautizasqa hermanokuna ruwananku yanapakuq qhari kanankupaq?

⁵ Pipas yanapakuq kayta munashan chayqa Bibliapi kaq kamachikuykunatan kasukunan (1 Tim. 3:​8-10, 12, 13). Chhaynaqa, yanapakuq qhari kayta munashanki chayqa chay yuyaychaykunata t’aqwiriy, chayman jinataq kausay. Chaymantapas piensariy imaraykus chay llank’ayman aypayta munashanki chaypi.

¿IMARAYKUN YANAPAKUQ QHARI KAYTA MUNASHANKI?

6. ¿Iman hermanokunata tanqanan yanapakuq qhari kanankupaq? (Mateo 20:28; qhaway dibujota).

⁶ Jesuspa ejemplonpi piensasun. Payqa taytan Jehová Diosta munakuspa runakunata munakuspa iman imaymanata ruwarqan. Runakunata munakuspan jujkunatapas kamachi jina servirqan (leey Mateo 20:28; Juan 13:​5, 14, 15). Qanpas Jehová Diosta runakunatapas munakuspa yanapakuq qhari kayta munashanki chayqa bendecisunkin Jehová Diosqa, paymi yanapasunki chayman aypanaykipaq (1 Cor. 16:14; 1 Ped. 5:5).

7. ¿Imaraykun mana allinchu kanman jatunchakuq kay?

⁷ Jawapi runakunaqa allinta qhawarichikuyta munaspa, allin puestopi kayta munaspa iman ima ruwaymanpas aypayta munanku. Diospa llaqtanpin ichaqa mana chhaynachu. Manan pipas allinta qhawarichikuyta munaspachu yanapakuq qhari kaytaqa munanan, aswanpas hermanokunata munakusqanmi chaymanqa tanqanan. Pipas jatunchakuyta munaspalla yanapakuq qhari kanman chayqa, manan allintachu Jehová Diospa ovejachankunata qhawarinman. Wakin qosqanku llank’aytapas pisipaq qhawarispapaschá mana ruwayta munanmanchu (Juan 10:12). Jehová Diosqa manan jayk’aqpas jatunchakuq ni payllapi piensaq runataqa bendecinmanchu (1 Cor. 10:​24, 33; 13:​4, 5).

8. ¿Imanispan Jesús yuyaycharqan apostolninkunata?

⁸ Mayninqa Jesuspa wakin amigonkunapas allinpaq qhawarisqa kayta munaspan allin puestopi kayta munarqanku. Chaytan Santiagopas Juanpas munasharqanku. Chaymi Jesusta valekurqanku gobiernonpi allin puestota qonanpaq. Jesusqa manan allinpaqchu qhawarirqan chay mañakusqankuta. Chaymi llapan chunka iskayniyoq apostolkunata nirqan: “Pipas qankuna ukhupi kuraq kayta munaqqa serviqniykichismi kanan, mayqenniykichispas ñaupaqpi kayta munaqtaq llapaykichispa kamachin kanan”, nispa (Mar. 10:​35, 43, 44). Jujkunata serviyta munaspa ima llank’anamanpas aypayta munaq hermanokunaqa allintan iñiq t’aqapiqa yanapakunku, juj jatun regalon Diospa llaqtanpiqa kanku (1 Tes. 2:8).

¿IMAN YANAPASUNKIMAN JUJKUNATA SERVIYTA MUNANAYKIPAQ?

9. ¿Iman yanapasunkiman jujkunata sonqomanta serviyta munanaykipaq?

⁹ Qanqa anchatachá munakunki Jehová Diostaqa, munashankichá hermanokunata astawanraq yanapaytapas. Ichaqa manapaschá yanapakuq qhari jina llank’aytaqa munashankiraqchu. “Manapaschá junt’ayta atirusaqchu” nishankipaschá. Chhayna kaqtinqa kaypi piensay: Jujkunata yanapaspaqa kusisqan kanki. Jesús kikinpunin nirqan: “Qoypin aswan kusikuyqa kan, manan chaskiypichu”, nispa (Hech. 20:35). Chaytan Jesuspas ruwarqan, chaymi payqa kusisqa karqan. Qanpas atiwaqmi jujkunata yanapaspa kusisqa kayta.

10. ¿Imata ruwaspan Jesús kusisqa kaq? (Marcos 6:​31-34).

¹⁰ Nimusqanchis jina Jesusqa jujkunata yanapaspan kusisqa kaq (leey Marcos 6:​31-34). Juj kutinmi Jesuspas apostolkunapas sinchi sayk’usqa kasharqanku, chaymi ch’in ladoman rirqanku juj chhikanta samariq. Runakunan ichaqa maymanchus rishasqankuta yachaspa chakillapi phawarqanku, ñaupaqtaraqmi chayarqanku Jesuspa yachachisqanta uyariyta munaspa. Jesusqa atinmanmi karqan “manan kunanqa yachachisaykichisraqchu” niyta, jinaspataq mijuq rinman karqan. Manaña chaytachu ninman karqan chaypas, yaqapaschá juj chhikanta yacharichispa kachapunman karqan. Ichaqa manan chaytachu ruwarqan, aswanpas paykunata munakusqanraykun imaymanata yachachiyta qallarirqan. Manan ni reparakusqachu tardeña kasqantapas (Mar. 6:35). Jesusqa manan obligasqa jinachu chaytaqa ruwarqan, aswanpas paykunata munakusqanraykun yachachirqan. Arí, payqa anchatan chay runakunata khuyapayarqan chaymi paykunata yachachirqan. Chayta ruwaspan payqa kusisqa kaq.

11. ¿Imatawanmi Jesús ruwarqan jujkunata yanapananpaq? (Qhaway kay parrafopaq dibujota fototawan).

¹¹ Jesusqa manan yachachillarqanchu, necesitasqankuta iman qorqan. Juj milagrota ruwaspan paykunaman mijuchirqan. Discipulonkunapas chay mijunata rakispan yanapakurqanku (Mar. 6:41). Chhaynata runakunata yanapaspan Jesusqa allin ejemplota discipulonkunaman qorqan. Chaywanmi paykunata yachachirqan imaynas jujkunata serviyqa ancha allinpuni chayta. ¡Chay discipulokunaqa may kusisqachá karqanku jujkunata servispaqa! Chay kutipiqa runakunaqa “llapankun sajsanankukama mijurqanku” (Mar. 6:42). Manan chayllapaschu, Jesusqa payta qhepaman churakusparaqmi jujkunaq allinninta maskhaq, chhaynatapunin payqa ruwaq (Mat. 4:23; 8:16). Jesusqa kusisqan kaq jujkunata yachachispa, necesitasqankuta qospapas. Qanpas yanapakuq qhari jina jujkunata servinki chayqa kusisqan kanki.

12. ¿Imaraykun mana ninachu “noqaqa manan imapipas yanapakuyta atiymanchu” nispa?

¹² Mana yachaqpaq mana atiqpaq jinapaschá qhawarikushanki. Chhaynata qhawarikushanki chayqa ama llakikuychu. Jehová Diosqa sonqoykitan qhawan, sonqoyki imaynachá kashan chaypin ñawinqa kashan. Leey 1 Corintios 12:​12-30 textopi apóstol Pabloq imachus nisqanta, chaymantataq Diosmanta mañakuy imaynatapunichus pay qhawarisunki chayta reparanaykipaq. Chaypi apóstol Pabloq nisqan jina, qanqa ancha valeqmi kanki Diospa llaqtanpiqa. Imapas faltashasunkiraq yanapakuq qhari kanaykipaq chayqa, ama pisipaychu. Aswanpas tukuy sonqo servishallay Jehová Diosta, yanapashallay hermanokunatapas. Chayta ruwanki chayqa umalliqkunaqa reparanqakun chaykuna ruwaypi kallpachakusqaykita. Atinaykiman jinataqmi imapi yanapakunaykipaqpas nisunkiku (Rom. 12:​4-8).

13. ¿Yanapakuq qhari kayta munaqkunallachu Bibliapi yuyaychaykunata kasukunanku?

¹³ Bibliapi yanapakuq qharikunapaq yuyaychaykunataqa manan chaypi llank’aqkunallachu junt’ananku, llapa iñiqkunan chayta junt’anankupaqqa kallpachakunanku. Llapa iñiqkunan Jehová Diospi jap’ipakunankupaq kallpachakunanku; llapankun kallpachakunanku jujkunata yanapanankupaqpas, jujkunapaq ejemplo kanankupaqpas. Ichaqa, ¿ima yuyaychaykunatan pipas junt’anan yanapakuq qhari kananpaq?

¿IMA YUYAYCHAYKUNATAN KASUKUNANKU?

14. ¿Imaninantan Bibliapi nishan yanapakuq qharikunaqa “respetanapaq jinan kananku” nispa nisqanwan? (1 Timoteo 3:​8-10, 12).

¹⁴ Pipas yanapakuq kananpaq nombrasqa kayta munashan chayqa 1 Timoteo 3:​8-10, 12 textoq nisqantan kasukunan (leey). Chay textopi nisqanman jinaqa yanapakuq qharikunaqa “respetanapaq jinan kausananku”. Chaypiqa “allin qhawarisqa”, “respetanapaq jina”, “confianapaq jina” kaymantan rimashan. Chaywanqa manan “mana asirikuqmi kananku” nishanchischu (Ecl. 3:​1, 4). Aswanmi chaywanqa nishanchis imaynas paykunaqa chaskisqanku ima ruwanatapas allinta junt’ananku chayta. Arí, paykunaqa confianapaq jinan kananku. Chhayna kanqaku chayqa allin qhawarisqan kanqaku iñiq t’aqapiqa.

15. ¿Imaninantan nishan “manan iskay uyachu kananku” manataqmi “qolqe sonqochu kananku” nisqanwan?

¹⁵ “Manan iskay uyachu kananku”. Cheqaqllatan imatapas rimananku, manan jujkunatapas engañanankuchu (Prov. 3:32). “Manan qolqe sonqochu kananku”. Ima negociotaña ruwaspapas imachus kaqllatan vendenanku. Diospa llaqtanpi qolqeta jap’inanpaq encargasqa kaspapas honradon kananku. Manan iñiqmasikunatapas engañanankuchu, manan paykunamantaqa aprovechakunankuchu.

16. a) ¿Imaninantan nishan “manan nishu vino ujaqchu kananku” nisqanwan? b) ¿Iman “ch’uya concienciayoq” kay?

¹⁶ “Manan nishu vino ujaqchu kananku”. Manan machanankukamaqa ima ujanatapas tomanankuchu, manataqmi nishu ujaqmanta reqsisqachu kananku. Chaymantapas “ch’uya concienciayoqmi” kananku, chaywanqa Diospa kamachikuyninta kasukunankumantan rimashan. Arí, manan pipas mana pantaqqa kanmanchu, chaywanpas kallpachakunanmi Diospa sonqonpaq jina kausananpaq.

17. ¿Imatan umalliqkuna ruwananku imata ruwananpaqpas pipas preparasqachus kashan icha manachus chayta yachanankupaq? (1 Timoteo 3:10; qhaway kay parrafopaq fotota).

¹⁷ Chaymantapas “paykunataqa probakunanraqmi preparasqachus kashanku icha manachus chayta yachakunanpaq”. ¿Imatan chaywan nishan? Paykunaqa confianapaq jinan kananku, allin llank’aq iman kananku. Allintan junt’ananku umalliqkunaq qosqan ruwanatapas. Chaytaqa umalliqkunaq yuyaychasqanman Diospa llaqtanpi yuyaychaykunaman jinan ruwananku. Tiempollanpin llapa ima ruwanankutapas ruwananku. Chhaynachus kanqaku chayqa sut’itan hermanokunaqa reparanqaku imaynas iñiypi wiñarishanku chayta. Umalliqkuna, allinta qhawariychis pikunatas capacitawaqchis chayta (leey 1 Timoteo 3:10). ¿Kashanchu iñiq t’aqaykichispi adolescencianpi kashaq bautizasqa waynachakuna, aswan chikuchakunapas? Sichus paykuna leellankupuni Bibliata, juñunakuykunapipas participanku, Diosmanta willaqpas lloqsillanku chayqa atinankupaq jina ima ruwaytapas qoychis. Chhaynapin reparankichis ima ruwaykunapis yanapakuyta atinkuman chayta. Chhaynata paykunata capacitankichis chayqa yaqapaschá adolescencianku pasaytaqa atinkumanña yanapakuq kananpaq nombrasqa kayta.

18. ¿Imaninantan Bibliapi nishan “mana piqpa juchachananmi” kananku nisqanwan?

¹⁸ “Mana piqpa juchachananmi” kananku. Arí, paykunaqa manan mana allinta ruwaqmanta reqsisqachu kananku. Ichaqa allinta kausanankupaqña kallpachakunqaku chaypas yaqapaschá jujkuna yanqamanta paykunata tumpanman. Jesustapas chaymi pasarqan, willarqantaqmi imaynas qatikuqnin runakunapas yanqamanta tumpasqa kananku karqan chayta (Juan 15:20). Chaykunaña pasanman chaypas Jesús jina limpio kanankupaq kallpachakuq hermanokunaqa allin qhawarisqan kanqaku Diospa llaqtanpiqa (Mat. 11:19).

19. ¿Imaninantan nishan “juj esposallayoqmi kananku” nisqanwan?

¹⁹ Chaymantapas, yanapakuq qharikunaqa “juj esposallayoqmi kananku”. Jehová Diospa kamachisqanman jinan juj warmillawan casarakunanku (Mat. 19:​3-9). Manan qhelli juchapi puriqchu kananku (Heb. 13:4). Chaymantapas manan esposantaqa imaynamantapas traicionananchu, manataqmi juj warmikunataqa pujllapayananchu (Job 31:1).

20. ¿Imaynatan juj hermano familianta umallinan?

²⁰ “Wawankutapas wasinpi kaqkunatapas allintapunin umallinanku”. Familiayoq qharikunaqa allintan familiankuta umallinanku. Sapa semananmi familiantin estudiananku, Diosmanta willaqpas lloqsinallankun. Chaymantapas allintan wawankuta yanapananku Jehová Diosta tukuy sonqo munakunankupaq (Efes. 6:4). Familianta allinta cuidaq qhariqa iñiqkunatapas allintan cuidanqa (tupanachiy 1 Timoteo 3:5 textowan).

21. Juj hermano manaraq nombrasqachu kashan yanapakuq qhari kananpaq chayqa, ¿imatan ruwanan?

²¹ Manaraq yanapakuq kanaykipaq nombrasqachu kanki chayqa kallpachakuy chayman aypanaykipaq. Chaypaqqa Diospa yanapayninta mañakuy, allinta estudiay kaypi yachasqanchis yuyaychaykunatapas. Chaymantapas allinta t’aqwiriy imakunatas yanapakuq qharikuna junt’ananku chaymanta rimaq textokunata, kallpachakuytaq chaykunata kasukunaykipaq. Yachamusqanchis jina, Jehová Diospas hermanokunapas munakusunkin. Kallpachakuy paykunata servinaykipaq (1 Ped. 4:​8, 10). Hermanokunata servinki chayqa kusisqan kanki. Chhaynaqa llank’ashallay, Jehová Diospa yanapayninwanqa atillankin yanapakuq kanaykipaq nombrasqa kayta (Filip. 2:13).