Jehová Dios jina Jesús jina piensasun

1, 2. a) ¿Iman Jehová Diosta munakuy? b) ¿Imaynatan Jesucristo rikuchirqan Jehová Diosta tukuy yuyayninwan munakusqanta?

JUJ kutinmi Jesús willarqan Moisespa chaskisqan kamachikuykunamanta mayqenchus aswan jatun karqan chayta. Chaymanta rimaspan nirqan: “Jehová Diosniykitan munakunki tukuy sonqoykiwan, tukuy almaykiwan, tukuy kallpaykiwan, tukuy yuyayniykipiwan”, nispa (Luc. 10:27). Chhaynaqa Jehová Diostaqa tukuy kallpanchiswanmi tukuy almanchiswanmi munakunanchis. Chaymantapas tukuy yuyayninchiswan iman munakunanchis. ¿Imaninantaq chayri? Paypa munayninman jinan piensananchis. Noqanchisqa manapaschá jayk’aqpas yachasunchu imaynas Diospa piensaynin chayta. Ichaqa sichus estudiasun imaynas Cristoq yuyaynin chayta chayqa yachasunmi, payqa Dios jinapunin piensaq (1 Cor. 2:16).

² Jesusqa tukuy sonqon munakurqan Jehová Diostaqa. Payqa allintan yacharqan imas Diospa munaynin chaytapas. Ñak’arinanña karqan chaypas, chayman jinan imatapas ruwayta munarqan. Kusichiytapunitaq munasharqan Papanpa sonqonta chayqa, manan imawanpas jark’achikurqanchu chay ruwanantaqa.

3. ¿Imatan apóstol Pedro yacharqan Jesusmanta, imanispan iñiqkunata kallpacharqan? (1 Pedro 4:1).

³ Pedropas juj apostolkunapas allintan Jesustaqa reqsirqanku, paywanmi tiempota pasaqku. Chhaynapin allinta yacharqanku imaynatas Jesús piensan chayta. Chaychá Pedroqa ñaupaq kaq cartata qelqasqanpipas Jesusmanta rimashaspa llapa iñiqkunata nirqan: “Qankunapas preparakuychis pay jina piensanaykichispaq”, nispa (leey 1 Pedro 4:1). Apóstol Pedroqa “preparakuychis” nispaqa nisharqan soldadokunaq preparakusqankuta jina otaq alistakusqankuta jina preparakunamantan. Chhaynapin rikuchirqan imaynas Jesús jina yuyayniyoq kayqa allinpuni iñiqkunapaq chayta. Arí, Jesús jina piensasun chayqa mana allin piensaykunaqa manan faciltachu umanchisman jamunqa (2 Cor. 10:​3-5; Efes. 6:12).

4. ¿Imakunamantan kaypi yachasunchis chhaynapi Pedroq yuyaychasqanman jina ruwanapaq?

⁴ Kaypin yachasun imaynatas Jesús piensarqan chayta, imaynatas payta qatikusunman chaytapas. Chaypaqmi ñaupaqta yachasun imaynatas Jehová Dios piensan chayta. Chaymi yanapawasun llapa iñiqkunapas juj yuyaylla kananchispaq. Chaymantataq yachasun humilde sonqo kaymanta. Chay qhepamantaq yachasun allin yuyayniyoq kaymanta.

JEHOVÁ DIOS JINA PIENSASUN

5. ¿Imaynatan juj kuti Pedro rikuchirqan mana Jehová Dios jinachu piensasqanta?

⁵ Juj kuti imachus Pedrowan pasarqan chayta qhawarisun. Chay kutiqa manan payqa Jehová Dios jinachu piensarqan. Chay kutin Jesusqa discipulonkunaman willarqan imaynas Jerusalén llaqtaman riqtin umalliq runakuna umalliq sacerdotekunapas ñak’arichinanku sufrichinanku karqan chayta (Mat. 16:21). Pedroqa allintan yacharqan Jesusqa Diospa prometesqan Mesías kasqanta, paymi Diospa llaqtanta libranan karqan (Mat. 16:16). Chhaynataq karqan chayqa, “¿imaynapitaq Diosri jinallata qhawanman wañunanta?” nispapaschá nishanman karqan. Chaymi Pedroqa Jesusta juj ladoman pusaspa nirqan: “Señor, qan kikiykita khuyapayakuy, qanqa manapunin imaraykupas chhaynapiqa tarikunkichu”, nispa (Mat. 16:22). Chay kutipiqa manan Pedroqa Jehová Diospa yuyayninman jinachu piensasharqan. Chhaynataq karqan chayqa manan Jesús jinapaschu piensasharqan.

6. ¿Imaynatan Jesús rikuchirqan Jehová Dios jina piensasqanta?

⁶ Jesusqa Jehová Dios jinapunin piensarqan, chaymi payqa Pedrota nirqan: “¡Manan uyarisaykichu, Satanás! Jark’aytan munashawanki, qanqa manan Dios jinachu piensanki, aswanpas runakuna jinallan piensanki”, nispa (Mat. 16:23). Jesusqa allintan yacharqan imaynas Jehová Diospa munayninta junt’ananpaqqa imaymanapi sufrinan karqan chayta, imaynas wañunan karqan chaytapas. Chayraykun mana Pedroq nisqantaqa uyarirqanchu. Pedroqa Jesuspa allinninta munaspachá chaytaqa nirqan, ichaqa Jesuspa imachus nisqanta uyarispan yacharqan imaynas Jehová Diospa yuyayninman jina piensanan karqan chayta. Noqanchispas allintan chaypiqa piensarinanchis.

7. ¿Imaynatan apóstol Pedro rikuchirqan Jehová Diospa yuyayninman jina piensananpaq kallpachakusqanta? (Qhaway dibujota).

⁷ Chaymantaqa Pedroqa kallpachakurqanmi Jehová Dios jina piensananpaq. Chaypaq yachasun juj kuti imachus pasarqan chayta. Jehová Diosqa mana judío runakunapas llaqtanman jaykunantan munasharqan. Chaymi payqa Pedrota kacharqan Cornelio sutiyoq runata visitananpaq. Cornelioqa manan judío runachu karqan, paymi mana judío runakunamanta ñaupaq iñiq kapurqan. Judío runakunaqa manapunin munaqkuchu mana judío runakunawan juñukuytaqa. Chhaynataq karqan chayqa, Pedropaqqa manachá facilchu karqan Cornelioq wasinta riyqa. Chaywanpas imachus Diospa munaynin karqan chayta reparaspan kasukurqan payta. Jinan Cornelio Pedrota wajachimuqtinqa mana iskayaspa chay runaq wasinta rirqan (Hech. 10:​28, 29). Paypa wasinman chayaspataq Corneliota llapa familiantawan yachachirqan, jinan paykunaqa bautizakapurqanku (Hech. 10:​21-23, 34, 35, 44-48).

8. ¿Imaynatan rikuchisunman Jehová Dios jina piensasqanchista? (1 Pedro 3:8).

⁸ Askha watakuna qhepamanmi apóstol Pedroqa llapa iñiqkunata nirqan: “Llapaykichis juj yuyaylla kaychis”, nispa (leey 1 Pedro 3:8). Diosta llapa serviqkuna juj yuyaylla kananchispaqqa llapanchismi yachananchis Jehová Dios jina piensayta. Paypa imaynachus piensasqanqa Bibliapin kashan. Jujninmanta rimasun. Juj kutinmi Jesusqa qatikuqninkunata nirqan: “Diospa gobiernonta chanin kaynintawan ñaupaqtaqa maskhaychis”, nispa (Mat. 6:33). Yaqapaschá chayta kasukuspa iñiq t’aqapi mayqen hermanopas Diospa llaqtanpi astawan yanapakuyta qallarinman, precursor imapaschá kapunman. Chhaynataq chayqa, ¿nisunmanchu payta imaynan Pedropas Jesusta nirqan jinata? Manan ¿riki?, aswanchá paytaqa kallpachasunman apoyasunman ima.

HUMILDE SONQO KASUN

9, 10. ¿Imaynatan Jesús yachachirqan humilde sonqo kayta?

⁹ Señorpa Cenan nisqata ruwanankupaqmi Jesusqa Pedrota Juantawan kamachirqan maypichus mijunanku karqan chay wasita alistanankupaq. Chay kutipin Jesusqa Pedrota juj apostolkunatawan yachachirqan imaynas humilde sonqo kananku karqan chayta. Pedrowan Juanpiwanqa chay wasita alistashaspaqa alistarankupunichá chaki maqchikunapaq juj puruñatapas, alistarankuchá toallatapas. Ichaqa, ¿pin chay jamuqkunaq chakinta maqchinman karqan?

¹⁰ Chay tiempopiqa kamachi runakunan chayta ruwaqku. Kay Señorpa Cenan kutipiqa Jesusmi chayta ruwarqan. ¡Maytachá apostolkunaqa admirakurqanku Jesús jawa p’achanta orqokuspa cinturanman toallata watakuqta rikuspaqa; puruñaman unuta jich’aykuspa sapankankuq chakinta maqchiqta rikuspapas! (Juan 13:​4, 5). Chunka iskayniyoqtaq karqanku chayqa, unaypichá paykunaq chakinta maqchiytaqa tukurqan. Chay kutipiqa traicionaqnin Judaspa chakintawanmi maqchirqan. Rikusqanchis jina, ¡Jesusqa may humilde sonqon karqan, k’umuykukuqmi karqan! Chayta ruwasqan qhepamanmi paykunata nirqan: “¿Entiendenkichischu imaraykuchus chay ruwasqayta? Qankunaqa, yachachikuq, Señor niwankichismi ¿riki? Chaytaqa allintan ninkichis, chaypunin kani. Noqaqa Señorña yachachiqña kashaspapas maqchirqaykichistaq chakiykichista chayqa, qankunapas maqchinakunaykichismi chakiykichistaqa”, nispa (Juan 13:​12-14).

11. ¿Imaynatan apóstol Pedro rikuchirqan humilde sonqo kapusqanta? (1 Pedro 5:5; qhaway kay parrafopaq dibujota).

¹¹ Apóstol Pedropas qhepamanqa Jesús jinan humilde sonqo kapurqan. Chaypaq yachasun imachus juj kuti pasarqan chayta. Jesús janaq pachaman ripusqan qhepamanmi Pedroqa nacesqanmantapacha such’u runata qhaliyachirqan (Hech. 1:​8, 9; 3:​2, 6-8). ¡May admirakunapaqmi chay ruwasqanqa karqan! Chaymi askha runakuna chayman juñukamurqanku (Hech. 3:11). ¿Imatan Pedro ruwanman karqan chayta rikuspa? Yachasqanchis jinapas chay tiempopi runakunaqa jatunchasqa kaytan mastaqa maskhaqku. Chhaynaqa, ¿Pedropas jatunchasqa alabasqa kaytachu munanman karqan? Manan, aswanmi Jehová Diosta Jesustawan jatuncharqan. Jesusmanta rimaspan nirqan: “Paypa sutinraykun, sutinpi iñisqaykurayku iman kay rikusqaykichis reqsisqaykichis runaqa qhaliyapun”, nispa (Hech. 3:​12-16). Chaymantapas watakunaq pasasqan qhepamanmi Pedroqa llapa iñiqkunata yuyaycharqan humilde sonqo kanankupaq (leey 1 Pedro 5:5). Paypa qelqasqan simikunaqa Jesús apostolkunaq chakinta maqchisqan tiempotan yuyarichiwanchis ¿riki?

12. ¿Imaynatan rikuchisunman apóstol Pedro jina humilde sonqo kasqanchista?

¹² Apóstol Pedro jinan noqanchispas kananchis. Kallpachakunanchismi humilde sonqo kananchispaq, k’umuykukuq kananchispaq. Ichaqa humilde sonqo kasqanchisqa manan imayna rimasqallanchispichu rikukunqa. Chhayna kayqa sonqomantapunin lloqsimun. Apóstol Pedropas k’umuykukuymanta rimashaspaqa imachus piensasqanchismanta, imachus sonqonchispi kasqanmantan rimasharqan. Chhaynaqa Diospa llaqtanpi imata ruwaspapas, Jehová Diosta munakusqanchisrayku runamasinchista munakusqanchisrayku iman ruwananchis, manan jujkunaq jatunchasqan ni alabasqan kayta munaspachu. Chaymantapas Jehová Diosta tukuy sonqowan servisunchis chayqa, manan ima ruwasqanchistapas jujkuna rikunankutaraqchu ni qhawanankutaraqchu munasunchis. Chhaynapin rikuchisunchis k’umuykukuq kasqanchista humilde sonqo kasqanchistapas (Mat. 6:​1-4).

“ALLIN YUYAYNIYOQ KASUN”

13. ¿Iman “allin yuyayniyoq kay”?

¹³ ¿Iman “allin yuyayniyoq kay”? (1 Ped. 4:7). Allin yuyayniyoq runaqa allinta piensaspan imatapas ruwan, Jehová Diospa munayninman jinan ima decisiontapas ruwan. Chaymantapas allin yuyayniyoq runaqa Dioswan allinpi kaytan imamantapas aswan allinpaq qhawarin. Chaymantapas allin yuyayniyoq kasun chayqa, manan noqanchispichu masta piensasun. Imata ruwaspapas manan yachaqmanchu tukusunchis, aswanmi Jehová Diospa yanapayninta mañakusunchis.

14. ¿Jayk’aqmi Pedro rikuchirqan Jehová Diospi confiananmantaqa payllapi confiakusqanta?

¹⁴ Allin yuyayniyoq kaymanta yachanapaq apóstol Pedrowan imachus pasarqan chayta qhawarillasuntaq. Manaraq wañupushaspan Jesusqa discipulonkunata nirqan: “Llapaykichismi kunan tuta saqerpariwankichis”, nispa. Chayta uyarispan apóstol Pedroqa mana iskayaspa nirqan: “Llapankuña saqerparisunkiku chaypas, noqaqa manapunin saqerparisaykichu”, nispa. Chay kutillapitaqmi Jesusqa discipulonkunata nillarqantaq: “Rijch’ashallaychis, mañakushaychistaq”, nispa (Mat. 26:​31, 33, 41). Pedrochus Jesuspa llapa chaykuna nisqanta uyarikunman karqan, manataq paypichu confiakunman karqan chayqa, manapaschá Jesusta neganmanchu karqan. Jesusta negasqanraykun payqa ¡mayta sonqonta nanachikurqan, maytan waqarqanpas! (Mat. 26:​69-75).

15. ¿Iman Jesusta yanaparqan jap’inanku kashaqtin allin yuyaywan imatapas ruwananpaq?

¹⁵ Jesusqa Jehová Diosllapipunin tukuy sonqo confiaq. Payqa mana ima juchayoq ch’uya runaña karqan chaypas, sapa ratunmi chay tutaqa Diospa yanapayninta mañakurqan. Chay kallpawanmi mana imata manchakuspa Papanpa munayninta ruwarqan (Mat. 26:​39, 42, 44; Juan 18:​4, 5). Pedroqa rikusharqanmi Jesuspa chay ruwasqanta, chaytaqa manachá jayk’aqpas payqa qonqarqanchu.

16. ¿Imaynatan Pedro rikuchirqan allin yuyayniyoq kasqanta? (1 Pedro 4:7).

¹⁶ Tiempowanqa Pedropas yacharqanmi Jehová Diospi confiayta, mañakullaqmi paypa yanapayninta. Kausarimpusqan qhepamanmi Jesusqa Pedrota juj apostolkunatawan nirqan imaynas Diospa espiritunta chaskinanku karqan chayta. Chaykaman ichaqa Jerusalén llaqtallapiraq qhepakunanku karqan (Luc. 24:49; Hech. 1:​4, 5). ¿Imatan Pedro chaypi ruwanman karqan? Bibliaq willasqan jina, paywan juj discipulokunawan iman llapanku “juj sonqolla Diosmanta mañakusharqanku” (Hech. 1:​13, 14). Tiempowanqa paypunin iñiqkunata kallpacharqan allin yuyaywan imatapas ruwanankupaq, Jehová Diospa yanapayninta maskhanankupaq ima (leey 1 Pedro 4:7). Pedroqa yacharqanmi Diospi confiayta, allintan yanapakurqan iñiq t’aqa qaqata sayananpaqpas (Gál. 2:9).

17. Wakin ruwaykuna fácil ruwayña noqanchispaq kanman chaypas, ¿imatan ruwananchispuni? (Qhaway kay parrafopaq fotota).

¹⁷ Allin yuyaywan imatapas ruwanapaqqa Diospa yanapaynintan mañakunanchis. Wakin ruwaykuna fácil ruwayña kanman chaypas mañakunapunin paypa yanapaynintaqa. Imapas sasa ruway kaqtinqa, jatun decisión ruwana kaqtinpas astawanraqmi paypa yanapaynintaqa mañakunanchis. Payqa allintan yachan imas allinninchispaq kanman chayta.

18. ¿Imatan ruwananchis apóstol Pedro jina?

¹⁸ Jehová Diosqa imaynachus pay chayman jinan kamawarqanchis. Chhaynataq chayqa, atillasunmanmi pay jina imapas ruwayta. ¡May kusikunapaqmi chayqa riki! (Gén. 1:26). Ichaqa manan atisunmanchu pay jina mana pantaspa imapas ruwaytaqa (Isa. 55:9). Chaywanpas apóstol Pedro jina kallpachakusun chayqa, yachasunmi Jehová Dios jina piensayta, humilde sonqo kayta, allin yuyaywan imapas ruwayta.